ايماق باسشىسى نۇرلىبەك نالىباەۆ وڭىردە جۇزەگە اسىرىلعان ءىرى ينۆەستيتسيالىق جوبالاردى اتاپ ءوتىپ، جينالعان قاۋىمدى جاڭا نىساننىڭ اشىلۋىمەن قۇتتىقتادى.
«پرەزيدەنتىمىز قاسىم-جومارت كەمەلۇلى: «ەكونوميكانى ءارتاراپتاندىرۋدى تىڭ قارقىنمەن جالعاستىرۋ كەرەك. ىشكى جانە سىرتقى نارىقتا باسەكەگە قابىلەتتى، تەرەڭ وڭدەلگەن ءونىم شىعارۋعا باسىمدىق بەرىلۋگە ءتيىس»، – دەگەن بولاتىن.
وڭىرىمىزدە قولايلى ينۆەستيتسيالىق كليمات قالىپتاسىپ، اۋقىمدى جوبالار جۇزەگە اسىرىلۋدا. 2022-2024 جىلدارى ايماق ەكونوميكاسىنا 1 تريلليون 600 ملرد. تەڭگەگە جۋىق ينۆەستيتسيا تارتىلدى.
بيىل 631 ملرد. 400 ملن. تەڭگەدەن استام ينۆەستيتسيا تارتۋ باعىتىندا جۇمىس جۇرگىزىلۋدە. وتكەن 8 ايدا 408 ملرد. 200 ملن. تەڭگە ينۆەستيتسيا تارتىلىپ، جوسپاردىڭ ورىندالۋى بويىنشا قىزىلوردا وبلىسى رەسپۋبليكادا ءبىرىنشى ورىنعا شىقتى. جىل سوڭىنا دەيىن جاڭا جوبالاردى ىسكە قوسۋ ەسەبىنەن جوسپار 716 ملرد. تەڭگەگە دەيىن ارتىعىمەن ورىندالادى. تىكەلەي شەتەلدىك ينۆەستيتسيا تارتۋ بويىنشا 280 ملن. اقش دوللارى بەكىتىلگەن، وسى جىلدىڭ ءىى توقسانىندا 172,9 ملن. اقش دوللارى تارتىلىپ، جوسپار 62%-عا ورىندالدى.
بۇگىن ءوڭىر ەكونوميكاسىنا تىڭ سەرپىن بەرەتىن «قىزىلوردا-نان» سەرىكتەستىگىنىڭ نان ونىمدەرى كەشەنىنىڭ اشىلۋ سالتاناتىندا باس قوستىق. بارشاڭىزدى جاڭا كاسىپورىننىڭ ىسكە قوسىلۋىمەن شىن جۇرەكتەن قۇتتىقتايمىن. جوباعا اتسالىسقان ينۆەستورلارعا، قۇرىلىسشىلارعا، بارلىق سەرىكتەس ۇيىمدارعا العىسىمىزدى بىلدىرەمىز. كەشەننىڭ جۇمىسى تابىستى، ءوندىرىسى بەرەكەلى بولسىن! ەگەمەن ەلىمىزدىڭ ەڭسەسى بيىك، تاۋەلسىزدىگىمىز تۇعىرلى بولعاي!»، – دەدى نۇرلىبەك ماشبەكۇلى.
راسىمدە وبلىستىق ارداگەرلەر كەڭەسىنىڭ توراعاسى سەرىك دۇيسەنباەۆ قۇتتىقتاۋ ءسوز سويلەدى. ايماقتىڭ الەۋمەتتىك-ەكونوميكالىق دامۋىنا سىڭىرگەن ەڭبەگى، وندەۋ ونەركاسىبى سالاسىنا اۋقىمدى ينۆەستيتسيا سالعانى ءۇشىن مەتسەنات نەيليا ءجۇسىپوۆا قىزىلوردا وبلىسىنىڭ قۇرمەت گراموتاسىمەن ماراپاتتالدى. قىزمەتكەرلەرگە وبلىس اكىمىنىڭ العىس حاتى تابىستالدى.
قىزىلوردادا العاش رەت 1957 جىلى ىسكە قوسىلعان نان زاۋىتى 1995 جىلعا دەيىن تۇرعىنداردى ساپالى ونىممەن قامتاماسىز ەتكەن بولاتىن. اراعا وتىز جىل سالىپ، بۇل يگى ءداستۇر جالعاسىن تاۋىپ، جاڭا كەشەن جۇمىسىن باستادى.
جالپى 5,6 ميلليارد تەڭگە قارجى جۇمسالعان بۇل كەشەن – تەك وندىرىستىك عانا ەمەس، الەۋمەتتىك جانە ۇلتتىق ماڭىزعا يە ءىرى نىسان. بۇگىندە مۇندا 120 ادام ەڭبەك ەتۋدە، الداعى ۋاقىتتا جۇمىس ورىندارىنىڭ سانى 170-كە دەيىن كوبەيەدى.
كەشەنگە مەملەكەتتىك قولداۋ رەتىندە 5 گەكتار جەر تەلىمى ءبولىنىپ، قاجەتتى ينفراقۇرىلىممەن قامتاماسىز ەتىلدى. سونىمەن قاتار، 1,2 ميلليارد تەڭگە جەڭىلدەتىلگەن نەسيە بەرىلىپ، ونىڭ پايىزدىق مولشەرلەمەسى سۋبسيديالاندى. ءبىرىنشى كەزەڭدە 3,1 ميلليارد تەڭگەگە زاماناۋي، تولىق اۆتوماتتاندىرىلعان جابدىقتارى بار ءتورت وندىرىستىك تسەح ىسكە قوسىلدى. الداعى جىلى جوبانىڭ ەكىنشى كەزەڭىندە 2,5 ميلليارد تەڭگەگە ۇن كومبيناتىن سالۋ جوسپارلانعان.
@قىزىلوردا وبلىسى اكىمىنىڭ ءباسپاسوز قىزمەتى