2026 جىلعى 4 ماۋسىمدا قىزىلوردا قالاسىنداعى جاستار رەسۋرستىق ورتالىعىندا «Omirlik Maqsat» باعدارلاماسى اياسىندا ورتالىق ازيانىڭ ەۋرازيا قورىنىڭ (فەتسا) جانە Citi قورىنىڭ قولداۋىمەن جۇزەگە اسىرىلىپ جاتقان «قىزىلوردا وڭىرىندەگى مۇگەدەك ايەلدەر مەن ەرەكشە بالاسى بار انالاردىڭ قاۋىپسىز ءارى قولجەتىمدى باسپاناعا قول جەتكىزۋىن قولداۋ» جوباسىنىڭ تابىستى كەيستەرىن تانىستىرۋعا ارنالعان قورىتىندى ءىس-شارا ءوتتى.
ءىس-شاراعا مەملەكەتتىك ورگانداردىڭ وكىلدەرى، ءماسليحات دەپۋتاتتارى، ۇكىمەتتىك ەمەس ۇيىمدار، ساراپشىلار، تۇرعىن ءۇي سالاسىنىڭ ماماندارى، كاسىپكەرلەر پالاتاسىنىڭ وكىلدەرى، جوبا سەرىكتەستەرى مەن بەنەفيتسيارلار قاتىستى.
كەزدەسۋدىڭ باستى ماقساتى – الەۋمەتتىك وسال توپتاردىڭ تۇرعىن ۇيگە قولجەتىمدىلىگى ماسەلەسىن كوتەرىپ قانا قويماي، ناقتى ناتيجەلەر مەن ءومىرىن وزگەرتكەن تابىستى تاجىريبەلەردى كورسەتۋ، تۇرعىن ءۇي ساياساتىن جەتىلدىرۋگە باعىتتالعان ۇسىنىستار ازىرلەۋ بولدى.
شارا بارىسىندا «اق بوساعا» ايەلدەر قوعامدىق بىرلەستىگىنىڭ ءتورايىمى زەينارا تاجيەۆا جوبا اياسىندا اتقارىلعان جۇمىستار تۋرالى بايانداپ، 2025 جىلدىڭ شىلدە ايىنان بەرى مۇگەدەكتىگى بار ايەلدەر مەن ەرەكشە قاجەتتىلىگى بار بالالاردى تاربيەلەپ وتىرعان انالارعا قۇقىقتىق، پسيحولوگيالىق جانە الەۋمەتتىك قولداۋ كورسەتۋ باعىتىندا جۇيەلى جۇمىستار جۇرگىزىلگەنىن اتاپ ءوتتى.
ءىس-شاراعا ارنايى قاتىسقان ورتالىق ازيانىڭ ەۋرازيا قورىنىڭ وكىلى ايگەرىم قارلىباەۆا جوبانىڭ وڭىردەگى الەۋمەتتىك ماسەلەلەردى شەشۋدەگى ماڭىزدىلىعىنا توقتالىپ، ازاماتتىق قوعام ۇيىمدارىنىڭ باستامالارى حالىقتىڭ ءومىر ساپاسىن جاقسارتۋدا ماڭىزدى ءرول اتقاراتىنىن اتاپ ءوتتى.
قىزىلوردا وبلىسى قوعامدىق دامۋ باسقارماسى باسشىسىنىڭ ورىنباسارى ارتۋر قامباروۆ وڭىردەگى الەۋمەتتىك ساياساتتىڭ باسىم باعىتتارى مەن الەۋمەتتىك وسال توپتاردى قولداۋ بويىنشا اتقارىلىپ جاتقان جۇمىستار تۋرالى بايانداما جاسادى.
جيىنعا قاتىسقان – زاڭگەر، باسپاناسىزدىق پەن تۇرعىن ۇيگە جەتكىلىكتىلىك قۇقىعى سالاسىنداعى ادام قۇقىقتارىن قورعاۋشى، حالىقارالىق ساراپشى الىشەر قوجاعۇلوۆ قازاقستانداعى تۇرعىن ءۇي قۇقىعىنىڭ وزەكتى ماسەلەلەرىنە توقتالىپ، حالىقارالىق تاجىريبە نەگىزىندە تۇرعىن ۇيگە قولجەتىمدىلىكتى ارتتىرۋدىڭ ءتيىمدى تەتىكتەرى تۋرالى وي ءبولىستى. ساراپشى تۇرعىن ءۇي ماسەلەسى الەۋمەتتىك ادىلەتتىلىك پەن ادام قۇقىقتارىنىڭ ماڭىزدى قۇرامداس بولىگى ەكەنىن ەرەكشە اتاپ ءوتتى.
سونىمەن قاتار قىزىلوردا قالالىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ ورىنباسارى ايگۇل قياسوۆا الەۋمەتتىك قىزمەتتەر مەن مەملەكەتتىك قولداۋ شارالارى تۋرالى باياندادى.
ء ىس-شارانىڭ ەڭ اسەرلى بولىگى – جوبا بەنەفيتسيارلارىنىڭ ناقتى ومىرلىك وقيعالارى بولدى. جوبا قاتىسۋشىلارى اقمارال داستەنوۆا، سارسەنكۇل ايتجانوۆا ءوز تاجىريبەسىمەن ءبولىسىپ، قۇقىقتىق سۇيەمەلدەۋ مەن الەۋمەتتىك قولداۋدىڭ ارقاسىندا تۇرعىن ءۇي ماسەلەسىن شەشۋگە باعىتتالعان ناقتى مۇمكىندىكتەرگە قول جەتكىزگەنىن ايتتى. ونىڭ وقيعاسى كوپتەگەن انالار ءۇشىن ءۇمىت پەن سەنىمنىڭ جارقىن ۇلگىسىنە اينالدى.
جوبا اياسىندا كاسىپتىك كۋرستاردان وتكەن 20 قاتىسۋشى قور تاراپىنان جاريالانعان شاعىن گرانت كونكۋرسىنا قاتىسىپ، ۇزاقباەۆا لاززات، داستەنوۆا اقمارال 750 مىڭ تەڭگە كولەمىندە ءوز كاسىبىن باستاۋعا شاعىن گرانت جەڭىپ الدى. 4 قاتىسۋشى باسپانالى بولدى.
تالقىلاۋ بارىسىندا ساراپشىلار، مەملەكەتتىك ورگان وكىلدەرى جانە ازاماتتىق قوعام مۇشەلەرى حالىقتىڭ الەۋمەتتىك وسال توپتارىنىڭ تۇرعىن ۇيگە قولجەتىمدىلىگىن ارتتىرۋ بويىنشا ۇسىنىستارىن ورتاعا سالىپ، ولاردى ءتيىستى مەملەكەتتىك ورگاندارعا جولداۋ تۋرالى شەشىم قابىلدادى.
جوبا ىسكە اسىرىلعان ۋاقىت ىشىندە ونداعان ايەل مەن وتباسى قۇقىقتىق كەڭەس الىپ، مەملەكەتتىك باعدارلامالارعا قاتىسۋ مۇمكىندىگىنە يە بولدى، الەۋمەتتىك قىزمەتتەرگە قول جەتكىزدى جانە تۇرعىن ءۇي ماسەلەلەرىن شەشۋ بويىنشا كاسىبي سۇيەمەلدەۋمەن قامتىلدى.
شارا قورىتىندىسىندا قاتىسۋشىلار باسپانا ماسەلەسى تەك تۇرعىن ۇيمەن قامتاماسىز ەتۋ عانا ەمەس، ول ادامنىڭ قاۋىپسىزدىگى، الەۋمەتتىك تۇراقتىلىعى، بالالارىنىڭ بولاشاعى جانە لايىقتى ءومىر ءسۇرۋ قۇقىعىمەن تىكەلەي بايلانىستى ەكەنىن اتاپ ءوتتى.
«اق بوساعا» ايەلدەر قوعامدىق بىرلەستىگى الداعى ۋاقىتتا دا الەۋمەتتىك وسال توپتاردىڭ قۇقىقتارىن قورعاۋ، تۇرعىن ۇيگە قولجەتىمدىلىكتى ارتتىرۋ جانە قوعامداعى الەۋمەتتىك ادىلەتتىلىكتى نىعايتۋ باعىتىنداعى جۇمىستارىن جالعاستىرادى.