«قۇزىرەتتىلىك ورتالىعىندا» «مەرەيلى وتباسى – 2026» ۇلتتىق بايقاۋىنىڭ وبلىستىق كەزەڭىن قورىتىندىلاۋعا ارنالعان سالتاناتتى شارا ءوتتى. وعان وبلىس اكىمى مۇرات ەرگەشباەۆ، وبلىستىق ءماسليحات توراعاسى مۇرات تلەۋمبەتوۆ، زيالى قاۋىم وكىلدەرى مەن قوعامدىق ۇيىمداردىڭ بەلسەندىلەرى قاتىستى.
ايماق باسشىسى وتباسى – قوعامنىڭ التىن دىڭگەگى، ۇلتتىڭ رۋحاني تىرەگى ەكەنىن اتاپ ءوتىپ، قاتىسۋشىلارعا ريزاشىلىعىن ءبىلدىردى.
«بارشاڭىزدى وتباسى قۇندىلىعىن ۇلىقتاپ، شاڭىراقتىڭ شىرايىن، ۇرپاق تاربيەسىنىڭ ونەگەسىن دارىپتەيتىن «مەرەيلى وتباسى» ۇلتتىق بايقاۋىنىڭ وبلىستىق كەزەڭىنىڭ قورىتىندىسىمەن شىن جۇرەكتەن قۇتتىقتايمىن!
جىل سايىن ءار ايماقتان ونەگەلى وتباسىلار بايقاۋعا بەلسەنە قاتىسىپ، قۇرمەتكە يە بولىپ كەلەدى. بيىل قالا، اۋدانداردان 220 وتباسى قاتىسىپ، 16 وتباسى ۇزدىك دەپ تانىلدى. وسىنداي ۇلگىلى اۋلەتتەر ۇرپاق ساباقتاستىعىن ساقتاپ، قۇندىلىقتاردى ناسيحاتتاۋعا نەگىز قالايدى.
پرەزيدەنتىمىز قاسىم جومارت كەمەلۇلى: «وتباسى ينستيتۋتى ەڭبەكقورلىق، بىلىمپازدىق، تىلەكتەستىك سىندى «ادال ازاماتقا» ءتان قاسيەتتەردى قوعامدا جان-جاقتى دارىپتەۋ ارقىلى ۇلتتىڭ جاڭا ساپاسىن قالىپتاستىرۋعا ولشەۋسىز ۇلەس قوسادى»، - دەپ اتاپ ءوتتى.
حالىقتىق كونستيتۋتسيامىزدا وتباسى مەن ۇرپاق تاربيەسىنىڭ قوعام ومىرىندەگى ورنى ايقىن كورىنىس تاپقان. سوندىقتان وتباسىنىڭ مارتەبەسىن كوتەرۋ، اتا-انانىڭ بالا تاربيەسىندەگى جاۋاپكەرشىلىگىن ارتتىرۋ، بالالاردىڭ قۇقىقتارى مەن مۇددەلەرىن قورعاۋ – بارشامىزعا ورتاق مىندەت.
شاڭىراقتىڭ بەرىكتىگىن ساقتاپ، سىيلاستىق پەن مەيىرىمدىلىكتى ءومىرىنىڭ وزەگىنە اينالدىرعان بارشا وتباسىلارعا شىنايى ريزاشىلىعىمدى بىلدىرەمىن. ءاربىر شاڭىراققا باياندى باقىت، اماندىق پەن باق-بەرەكە تىلەيمىن!»، - دەدى مۇرات نالقوجاۇلى.
«مەرەيلى وتباسى» ۇلتتىق كونكۋرسى وبلىستىق كەزەڭىنىڭ جەڭىمپازى قۇتمامبەتوۆتەر وتباسى بولىپ (ارال اۋدانى), باس جۇلدەنى يەلەندى.
شيەلىلىك باكىروۆتەر وتباسىنا ءى ورىن، قازالىلىق دوسحوجاەۆتار وتباسىنا ءىى ورىن، قىزىلوردالىق بيمۇراتوۆتار وتباسىنا ءىىى ورىن بەرىلدى.
مۇنان بولەك، «ۇلاعاتتى وتباسى» نوميناتسياسى جۇماعاليەۆتەر وتباسىنا (ارال اۋدانى), «بەرەكەلى وتباسى» نوميناتسياسى شاحمارانوۆتار وتباسىنا (قازالى اۋدانى), «بايتەرەك وتباسى» نوميناتسياسى تورتاەۆتار وتباسىنا (قارماقشى اۋدانى), «كەمەل وتباسى» نوميناتسياسى قياسوۆتار وتباسىنا (قارماقشى اۋدانى), «جىگەرلى وتباسى» نوميناتسياسى تۇلەكوۆتەر وتباسىنا (جالاعاش اۋدانى), «ىنتىماقتى وتباسى» نوميناتسياسى احمەتوۆتەر وتباسىنا (جالاعاش اۋدانى), «ەڭبەكقور وتباسى» نوميناتسياسى بيسەنوۆتەر وتباسىنا (سىرداريا اۋدانى), «ونەگەلى وتباسى» نوميناتسياسى بۇرحانوۆتار وتباسىنا (سىرداريا اۋدانى), «ماۋەلى وتباسى» نوميناتسياسى ابىشوۆتەر وتباسىنا (شيەلى اۋدانى), «ۇلگىلى وتباسى» نوميناتسياسى اقىلبەكوۆتەر وتباسىنا (جاڭاقورعان اۋدانى), «ونەرلى وتباسى» نوميناتسياسى اۋەلبەكوۆتەر وتباسىنا (جاڭاقورعان اۋدانى), «شۋاقتى وتباسى» نوميناتسياسى بودانوۆتار وتباسىنا (قىزىلوردا قالاسى) تابىستالدى.
جەڭىمپازدار سىيلىقتار جانە قارجىلاي سەرتيفيكاتتارمەن ماراپاتتالدى. شارا سوڭى مەرەكەلىك باعدارلاماعا ۇلاستى.
وڭىردە ءار وتباسىنىڭ الەۋمەتتىك تۇراقتىلىعىن قامتاماسىز ەتۋگە ەرەكشە ءمان بەرىلۋدە. بۇگىندە وبلىستا 17 500-گە جۋىق كوپبالالى وتباسى مەملەكەت تاراپىنان تۇراقتى قولداۋعا يە.
سوڭعى ءتورت جىلدا تۇرعىن ءۇي كەزەگىندەگى ازاماتتارعا 8 مىڭعا جۋىق پاتەر كىلتى بەرىلىپ، 30 مىڭنان اسا جەرلەسىمىز باسپانالى بولدى. 2026-2027 جىلدارى 6200-دەن استام پاتەر ەل يگىلىگىنە تابىستالىپ، 25 مىڭعا جۋىق تۇرعىننىڭ باسپانا ماسەلەسىن شەشۋ جوسپارلانۋدا.
وتباسى قۇندىلىعىن دارىپتەۋ، ۇرپاق تاربيەسىنە ەرەكشە ءمان بەرۋ باعىتىندا «اناعا تاعزىم»، «وتباسى ورتالىعى» جۇيەلى جۇمىس جۇرگىزەدى. اۋداندارداعى «رۋحانيات ورتالىقتارى» جاس وتباسىلارعا قولداۋ كورسەتىپ، ماڭىزدى باستامالاردى جۇزەگە اسىرىپ كەلەدى.
قىزىلوردا وبلىسى اكىمىنىڭ ءباسپاسوز قىزمەتى