بۇگىن قىزىلوردا قالاسىنىڭ ورتالىق الاڭىندا 12 تامىز – حالىقارالىق جاستار كۇنىنە ارنالعان جاستار ونكۇندىگىنىڭ قورىتىندى شاراسى ءوتتى.
ونكۇندىك «جاستارمەن بىرگە!» اتتى اۋقىمدى Open Air فورماتىنداعى مەرەكەلىك كونتسەرتپەن تۇيىندەلدى.
اشىق اسپان استىندا وتكەن مەرەكەلىك كەشكە 12 مىڭنان استام قالا تۇرعىنى مەن جاستار جينالدى.
مەرەكەلىك شاراعا وبلىس اكىمىنىڭ ورىنباسارى، قازاقستان رەسپۋبليكاسى پرەزيدەنتىنىڭ «بايقوڭىر» كەشەنىندەگى ارناۋلى وكىلى قايرات نۇرتاي قاتىسىپ، ءوڭىر جاستارىن مەرەكەمەن قۇتتىقتادى.
«جاستار – ەلدىڭ ەرتەڭىن كۇتەتىن بۋىن عانا ەمەس، بۇگىنگى قوعامنىڭ قوزعاۋشى كۇشى. مەرەكە قارساڭىندا سوڭعى ون كۇن ىشىندە وڭىرىمىزدە جاستاردىڭ ءبىلىمىن جەتىلدىرۋگە، شىعارماشىلىق قابىلەتىن شىڭداۋعا، قوعامدىق بەلسەندىلىگىن ارتتىرۋعا جانە سالاۋاتتى ءومىر سالتىن ناسيحاتتاۋعا باعىتتالعان ءتۇرلى ءىس-شارالار ۇيىمداستىرىلدى.
بۇل – جاستار ساياساتىنىڭ ءبىر كۇندىك ناۋقانى ەمەس، جۇيەلى ءارى تۇراقتى باعىت ەكەنىن كورسەتەدى. سىر جاستارى قاي كەزدە دە ەلدىك باستامالاردىڭ بەل ورتاسىنان تابىلىپ كەلەدى»، – دەدى قايرات ىرزاقۇلۇلى.
جاستار مەرەكەسىنە ارنالعان ونكۇندىك اياسىندا ءوڭىر جاستارىنىڭ باسىن قوسقان قوعامدىق، مادەني، سپورتتىق، شىعارماشىلىق جانە تانىمدىق باعىتتاعى ءتۇرلى ءىس-شارالار ۇيىمداستىرىلدى.
باستى نازار جاستاردىڭ بەلسەندىلىگىن ارتتىرۋعا، ازاماتتىق جاۋاپكەرشىلىگىن نىعايتۋعا جانە ولاردىڭ شىعارماشىلىق الەۋەتىن دامىتۋعا باعىتتالدى.
سونىمەن قاتار، «تازا قازاقستان»، «زاڭ مەن ءتارتىپ»، «ادال ازامات» قاعيداتتارىن ناسيحاتتاۋعا ارنالعان مازمۇندى كەزدەسۋلەر مەن ءتۇرلى اكتسيالار، ينتەللەكتۋالدىق ويىندار، پىكىرتالاس الاڭدارى جانە شىعارماشىلىق جوبالار وتكىزىلدى.
اتالعان باستامالار جاستاردىڭ بوس ۋاقىتىن ءتيىمدى ۇيىمداستىرۋمەن قاتار، ولاردىڭ قوعامدىق ومىرگە بەلسەندى ارالاسۋىنا، جاڭا يدەيالارى مەن باستامالارىن جۇزەگە اسىرۋىنا مۇمكىندىك بەردى.
كەش بارىسىندا جەرگىلىكتى ونەرپازدارمەن قاتار، قازاق ەستراداسىنىڭ تانىمال جۇلدىزدارى MYNBAY, قايرات تۇنتەكوۆ جانە دوسبول نۇرىللا ونەر كورسەتىپ، كوپشىلىككە تانىمال اندەرىن ورىندادى. تانىمال ورىنداۋشىلاردىڭ ونەرى مەرەكەلىك كەشتىڭ اجارىن اشىپ، جاستارعا كوتەرىڭكى كوڭىل كۇي سىيلادى.
وسىلايشا، حالىقارالىق جاستار كۇنىنە ارنالعان ونكۇندىك قىزىلورداداعى اۋقىمدى «جاستارمەن بىرگە!» Open Air كونتسەرتىمەن قورىتىندىلانىپ، جاس بۋىننىڭ جالىندى ءۇنى مەن شىعارماشىلىق قۋاتىن، بەلسەندىلىگى مەن كوتەرىڭكى كوڭىل كۇيىن توعىستىرعان جارقىن مەرەكەگە اينالدى.