بۇگىن قىزىلورداداعى «دوستىق ۇيىندە» «انا برەندى: تسيفرلىق داۋىردەگى تاربيە كودى» تاقىرىبىندا «اناعا تاعزىم» ءىىى رەسپۋبليكالىق فورۋمى ءوتتى.
وعان وبلىس اكىمى مۇرات ەرگەشباەۆ، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن، عالىم، بيوتەحنولوگ، وتاندىق «QazVac» ۆاكتسيناسىنىڭ اۆتورى كۇنسۇلۋ زاكاريا، قازاقستان حالىق كەڭەسىنىڭ مۇشەسى، «انالار كەڭەسى» ۇيىمىنىڭ ءتورايىمى نازيپا شاناي، قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆا، مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆ، دەنساۋلىق ساقتاۋ مينيسترلىگى انا مەن بالا دەنساۋلىعىن ساقتاۋ دەپارتامەنتىنىڭ ديرەكتورى ماعريپا ەمبەرگەنوۆا، ءانشى ءمادينا سادۋاقاسوۆا جانە ەلىمىزدىڭ بارلىق وڭىرىنەن كەلگەن دەلەگاتتار قاتىستى.
فورۋمنىڭ ماقساتى – ەلىمىزدىڭ رۋحاني ومىرىندەگى انانىڭ بيىك مارتەبەسىن ايشىقتاۋ، ۇلت تاربيەسىنە ولشەۋسىز ۇلەس قوسىپ جۇرگەن جانداردىڭ ەڭبەگىن دارىپتەۋ، ولاردىڭ ونەگەسىن كەڭىنەن ناسيحاتتاۋ، سونداي-اق وتباسى قۇندىلىقتارى مەن ۇلتتىق تاربيەنى نىعايتۋ.
ايماق باسشىسى ءوز سوزىندە ءۇشىنشى مارتە ۇيىمداستىرىلىپ وتىرعان رەسپۋبليكالىق فورۋمعا قاتىسۋشىلارعا شاقىرتۋدى قابىل العانى ءۇشىن ريزاشىلىق ءبىلدىردى.
«مەملەكەت باسشىمىز قاسىم-جومارت كەمەلۇلى اتاپ وتكەندەي: «اناعا دەگەن قۇرمەت – قازاق حالقىنىڭ عاسىرلار قويناۋىنان تامىر تارتقان اسىل قۇندىلىقتارىنىڭ ءبىرى. وتباسى – ۇلتتىڭ تۇپقازىعى، ال انا – سول شاڭىراقتىڭ شايقالماس تىرەگى».
قالامىزداعى انالاردىڭ قۇرمەتىنە ارنالىپ سالىنعان «اناعا تاعزىم»، جاس وتباسىلاردىڭ باقىت مەكەنىنە اينالعان «وتباسى ورتالىقتارى» ەل يگىلىگىنە قىزمەت ەتۋدە. بۇل عيماراتتار ارۋلار مەن انالاردىڭ، جاس وتباسىلاردىڭ قۇتتى شاڭىراعىنا اينالدى.
بۇگىندە ۋاقىت وزگەردى. تسيفرلىق تەحنولوگيالار قارىشتاپ دامىپ، جاساندى ينتەللەكت ءداۋىرى كەلىپ جەتتى. اقپارات اعىنى ەسەلەپ ارتتى. پرەزيدەنتىمىز ايتقانداي، بۇل جاھاندىق وزگەرىستەر جاڭا مۇمكىندىكتەرمەن قاتار، جاڭا مىندەتتەر دە جۇكتەيدى.
وسىنداي كەزەڭدە قوعام مەن وتباسىنداعى انانىڭ ءرولى بۇرىنعىدان دا ماڭىزدى ءارى جاۋاپتى بولا ءتۇستى. تسيفرلىق داۋىردە ۇرپاققا زامان تالابىنا ساي ءبىلىم مەن تاربيەنى قاتار بەرۋ – باستى مىندەتىمىز»، – دەدى مۇرات نالقوجاۇلى.
بۇگىنگى زامان انالارى تەك تاربيە بەرۋشى عانا ەمەس، بالانىڭ تسيفرلىق الەمدەگى ساناسىن قالىپتاستىرۋدى، ءتۇرلى اقپاراتتى ەكشەپ، جالعان مەن شىنايىنىڭ اراسىن اجىراتۋدى، دۇرىس باعىت بەرۋدى ۋاقىت تالاپ ەتىپ وتىر. سوندىقتان باسقوسۋدا تسيفرلىق داۋىردەگى تاربيەنىڭ ەرەكشەلىكتەرىنە، انانىڭ قوعامداعى جاڭا ميسسياسىن ايقىنداۋعا باسا نازار اۋدارىلدى.
فورۋمدا ءسوز العان قاتىسۋشىلار ءداستۇر ساباقتاستىعى مەن ۇرپاقتىڭ باعدارى، ەلىمىزدەگى ايەل عالىمداردىڭ ورنى، قوعامداعى انا مەن بالانىڭ جايى، تالانتتى تانىتۋ، تۇلعانى قالىپتاستىرۋداعى انانىڭ ءرولى، وتباسى قۇندىلىقتارى، قولداۋ جانە جاڭا باستامالار، انا ساۋلىعى تاقىرىپتارىندا ويلارىن ورتاعا سالدى.
قىزىلوردا وبلىسى اكىمىنىڭ ءباسپاسوز قىزمەتى