وبلىس اكىمى نۇرلىبەك نالىباەۆ، دەنساۋلىق ساقتاۋ ءمينيسترى اقمارال ءالنازاروۆا، پارلامەنت ءماجىلىسىنىڭ دەپۋتاتتارى مۇرات ابەنوۆ، مارحابات جايىمبەتوۆ، مۇرات ەرگەشباەۆ، قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى، زيالى قاۋىم وكىلدەرى، ەل اعالارىنىڭ ارنايى قاتىسۋىمەن تيتوۆ قىستاعىنداعى 400 ورىندىق جاڭا ەمحانانىڭ ىرگەتاسىن قالاۋ ءراسىمى ءوتتى.
ايماق باسشىسى جينالعان جۇرتشىلىقتى جاڭا نىسان قۇرىلىسىنىڭ باستالۋىمەن قۇتتىقتاپ، دەنساۋلىق سالاسىنداعى اتقارىلعان جۇمىستاردى اتاپ ءوتتى.
«مەملەكەتتىڭ ەڭ باستى بايلىعى – ادام، ادامداعى بايلىقتىڭ نەگىزىسى – دەنساۋلىق. دەننىڭ ساۋلىعى – مەملەكەتتىڭ دامۋى مەن وركەندەۋىنىڭ ارقاۋى.
پرەزيدەنتىمىزدىڭ الەۋمەتتىك ساياساتتاعى باسىم باعىتتارىنىڭ ءبىرى دە – حالىققا قولجەتىمدى ءارى ساپالى مەديتسينالىق قىزمەت ۇسىنۋ. بۇگىن ءبىز قىزىلوردا قالاسى ءۇشىن، سونىڭ ىشىندە تيتوۆ مولتەك اۋدانىنىڭ 40 مىڭنان استام تۇرعىندارى ءۇشىن اسا ماڭىزدى، تاريحي ءساتتىڭ باسىندا تۇرمىز.
اۋىسىمىنا 400 كەلۋشىگە ارنالعان №5 قالالىق ەمحانانىڭ جاڭا عيماراتىنىڭ ىرگەتاسىن قالاۋ راسىمىنە كۋا بولۋعا جينالدىق. جالپى 9 ملرد. 823 ملن. تەڭگەگە سالىناتىن جاڭا ەمحانا عيماراتىنىڭ اۋماعى 9 مىڭ شارشى مەتر، زاماناۋي تالاپتارعا ساي جوعارى ساپالى تەحنولوگيالارمەن جابدىقتالادى.
بۇل – انا مەن بالا ءومىرىن ساقتاۋعا، قازىنالى قارتتارىمىزدىڭ دەنساۋلىعىن جاقسارتۋعا باعىتتالعان مەملەكەت قولداۋى. الداعى ۋاقىتتا دا ءوڭىر حالقىنىڭ ءومىر ساپاسىن ارتتىرۋعا ارنالعان كەشەندى جۇمىستار جالعاسادى»، – دەدى ن.نالىباەۆ.
ءىس-شارادا اقمارال شارىپبايقىزى، مارحابات جايىمبەتۇلى قۇتتىقتاۋ ءسوز الىپ، قىزىلوردا وبلىسىنىڭ قۇرمەتتى ازاماتى تۇرعانباي ماحانۇلى باتا بەردى.
ايتا كەتەيىك، 2022-2025 جىلدارى وڭىردە 26 ملرد 400 ملن. تەڭگەگە 40 مەديتسينالىق نىسان سالىنىپ، پايدالانۋعا بەرىلگەن. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىمەن 10 ملرد 700 ملن. تەڭگەگە بوي كوتەرگەن 28 نىسان بۇگىندە حالىق يگىلىگىنە اينالدى. سونىمەن قاتار، اۋىل تۇرعىندارىنا شۇعىل مەديتسينالىق كومەك كورسەتۋ ءۇشىن 9 ملرد 900 ملن. تەڭگەگە 6 جوبا ىسكە اسىرىلدى.
ارال، قازالى، شيەلى، جاڭاقورعان اۋداندىق كوپبەيىندى اۋرۋحانالارى جانىنان قوسىمشا قۇرىلىستار، شيەلى مەن ارال اۋدانىنداعى جۇقپالى اۋرۋلار بولىمشەلەرىنە ارناپ جاڭا عيماراتتار سالىندى.
جەرگىلىكتى بيۋدجەت ەسەبىنەن جاڭاقورعان اۋدانىنداعى تومەنارىق اۋىلىندا 15 توسەكتىك اۋىلدىق اۋرۋحانا مەن امبۋلاتوريا، ارال اۋدانىنىڭ سەكسەۋىل كەنتىندە 40 توسەكتىك اۋىلدىق اۋرۋحانا، وبلىستىق قان ورتالىعى پايدالانۋعا بەرىلدى.
قىزىلوردا وبلىسى اكىمىنىڭ ءباسپاسوز قىزمەتى