ن. نالىباەۆ سىر وڭىرىنە ارنايى ساپارمەن كەلگەن اقىنعا العىس ءبىلدىرىپ، رۋحانيات پەن مادەنيەتكە قوسقان ەڭبەگىن ەرەكشە اتاپ ءوتتى.
"ەڭ الدىمەن، مۇحتار اعا، مەملەكەت باسشىسىنىڭ جارلىعىمەن قازاقستاننىڭ ەڭبەك ەرى اتانۋىڭىزبەن شىن جۇرەكتەن قۇتتىقتايمىن. بۇل اتاق ەگەمەن ەلىمىزدىڭ رۋحاني-مادەني دامۋىنا قوسقان ولشەۋسىز ەڭبەگىڭىزگە بەرىلگەن لايىقتى باعا دەپ بىلەمىز. ءسىزدىڭ قالامىڭىزدان تۋعان «جۇبايلار جىرى»، «تۋعان كۇن كەشىندە»، «گۇل داۋرەن»، «مەن ساعان عاشىق ەدىم» سەكىلدى تاعى دا باسقا كوپتەگەن تۋىندىلارىڭىز قالىڭ جۇرتشىلىققا كەڭىنەن تاراپ، جۇرەكتەردەن وشپەستەي ورىن الدى. شىعارمالارىڭىز 50-دەن استام تىلگە اۋدارىلىپ، رەسپۋبليكامىزدىڭ، شەت ەلدەردىڭ تەاترلارىندا قويىلىپ كەلەدى. ۇلت رۋحانياتىنا قوسقان زور ۇلەسىڭىز ءۇشىن «وتان» وردەنى، قازاقستاننىڭ حالىق جازۋشىسى، قىرعىز رەسپۋبليكاسىنىڭ حالىق اقىنى، تاعى باسقا اتاق پەن ماراپاتتار يەلەندىڭىز. وزىڭىزگە دەگەن سىر حالقىنىڭ قۇرمەتى، ءىلتيپاتى ارقاشان دا ەرەكشە. شىعارماشىلىق ساپارىڭىزعا قۇتتى قادام، دەنىڭىزگە ساۋلىق، وتباسىڭىزعا اماندىق تىلەيمىن. عاسىر جاساڭىز!", – دەدى ايماق باسشىسى.
بۇگىن سىر جۇرتشىلىعى اقىننىڭ «تاناكوز» شىعارماسىنىڭ جەلىسىمەن قويىلعان سپەكتاكلدى ازەربايجان مامبەتوۆ اتىنداعى مەملەكەتتىك دراما جانە كومەديا تەاترىنىڭ ساحنالاۋىندا تاماشالايدى.
كەزدەسۋ سوڭىندا ايماق باسشىسى مۇحتار شاحانوۆ پەن جۇبايى حانشايىم كوكەنقىزىنا سىر ەلى اتىنان ءىلتيپات ءبىلدىرىپ، قۇرمەت كورسەتتى.
سونداي-اق، بۇگىن جاستار رەسۋرستىق ورتالىعىندا مۇحتار شاحانوۆتىڭ جاستارمەن تاعىلىمدى كەزدەسۋى ءوتتى. وعان قاتىسۋشىلار اقىننىڭ رۋحتى، ومىرشەڭ جىرلارىن، وزدەرىنىڭ ارناۋ ولەڭدەرىن وقىدى. ەركىن سۇقبات قۇرىپ، سۇراق-جاۋاپ فورماتىندا اڭگىمە ءوربىتتى.