بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ايماق باسشىسى نۇرلىبەك نالىباەۆ ايتتى.
«ۋەفا-نىڭ ءىV ساناتتى سەرتيفيكاتىن العان 11 مىڭ ورىندىق زاماناۋي نىساندا اۋقىمدى سپورتتىق شارالاردى وتكىزۋگە بارلىق مۇمكىندىك بار. جاڭا ستاديون 4 قازان كۇنى فۋتبولدان قازاقستان كۋبوگىنىڭ فينالدىق ويىنىمەن اشىلدى.
ايماعىمىزدا حالىقتىڭ بارلىق ساناتىنىڭ بۇقارالىق جانە كاسىبي سپورتپەن شۇعىلدانۋىنا جاعداي جاسالعان. سوڭعى 3 جىلدا 21 سپورت كەشەنى بوي كوتەرىپ، ەل يگىلىگىنە تابىستالدى.
وبلىس ورتالىعىنداعى ءىرى جوبالاردىڭ ءبىرى – اۋماعى 25 مىڭ شارشى مەتر، قۇنى 20 ملرد. 500 ملن. تەڭگە بولاتىن كوپبەيىندى «قىزىلوردا ارەنا» سپورت كەشەنى. بۇگىندە كەشەننىڭ قۇرىلىس الاڭىنداعى جۇمىس قارقىندى.
«سامۇرىق قازىنا تراست» قورىمەن بىرلەسىپ سالىنعان «تەننيس ورتالىعى»، «قازاقستان حالقىنا» قورىنىڭ قولداۋىمەن شيەلى، جالاعاش اۋداندارىندا جاڭا سپورت كەشەندەرى ەل يگىلىگىنە تابىستالدى. قوردىڭ دەمەۋشىلىگىمەن تاعى ءبىر دەنە شىنىقتىرۋ-ساۋىقتىرۋ كەشەنى سالىنۋدا. نىسان جاقىن كۇندەرى پايدالانۋعا بەرىلەدى»، – دەدى ن.نالىباەۆ.
ايتا كەتەيىك، جەرگىلىكتى كاسىپكەرلەردىڭ دەمەۋشىلىگىمەن ورناتىلعان 80 سپورت-ويىن الاڭى ەل يگىلىگىنە اينالدى. «اۋىل – ەل بەسىگى» باعدارلاماسىمەن 5 سپورت كەشەنى بوي كوتەرىپ كەلەدى.
بۇگىندە وبلىستا 1538 سپورت عيماراتى بار، سالانى قارقىندى دامىتۋعا ۇلتتىق كومپانيالار، قورلار جانە جەرگىلىكتى كاسىپكەرلەر دە بەلسەندى اتسالىسۋدا.
سونىڭ ءبىرى – «Samruk Kazyna Trust» الەۋمەتتىك جوبالاردى قولداۋ قورىمەن بىرلەسكەن، قىزىلوردا قالاسىنىڭ سول جاعالاۋىنا 3 ملرد. 400 ملن تەڭگەگە سالىنعان «تەننيس ورتالىعى».
«قازاقستان حالقىنا» قوعامدىق قورىنىڭ دەمەۋشىلىگىمەن 2 ملرد. 900 ملن تەڭگەگە ەرەكشە قاجەتتىلىگى بار جاندارعا ارنالعان دەنە شىنىقتىرۋ-ساۋىقتىرۋ كەشەنى سالىنۋدا. اتالعان قوردىڭ كومەگىمەن وسى جىلى شيەلى جانە جالاعاش اۋداندارىندا جاڭا سپورت كەشەندەرى سالىنىپ، اۋىل تۇرعىندارىنا تابىستالدى.
قازاقستان فۋتبول فەدەراتسياسىنىڭ «الاڭ» باعدارلاماسىمەن 2024 جىلى قىزىلوردا قالاسىنداعى عاني مۇراتباەۆ اتىنداعى ورتالىق ستاديوننىڭ قوسالقى الاڭى قايتا جاڭعىرتۋدان وتكەن بولاتىن. وسى جىلى دا فەدەراتسيا قولداۋىمەن جالاعاش اۋدانىنىڭ ورتالىق ستاديونى كۇردەلى جوندەۋدەن ءوتىپ، اۋدان جۇرتشىلىعى مەن سپورتشىلارىنا پايدالانۋعا بەرىلدى.
بيىلعى جىلدىڭ تاعى ءبىر جاڭالىعى – وبلىس اكىمىنىڭ قولداۋىمەن جەكە تەڭگەرىمدەگى «تارلان» سپورت كەشەنى باسقارما مەنشىگىنە بەرىلىپ، «قىزىلوردا ەرلەر جانە ايەلدەر بوكس كلۋبى» بولىپ رەسمي تۇردە اشىلدى. عيمارات دەمەۋشىلەر ەسەبىنەن كۇردەلى جوندەۋدەن ءوتىپ، زامان تالابىنا ساي تولىق جاڭعىرتىلدى.
وسىلايشا حالىقتىڭ سپورتتىق ينفراقۇرىلىممەن قامتىلۋ كورسەتكىشى 56,5 پايىزعا جەتتى.