جازعى دەمالىس كەزەڭىندە كامەلەتكە تولماعاندار اراسىنداعى قۇقىق بۇزۋشىلىقتاردىڭ، قاراۋسىز جانە باقىلاۋسىز ءجۇرۋدىڭ الدىن الۋ ماقساتىندا قىزىلوردا وبلىسىنىڭ پوليتسيا قىزمەتكەرلەرى تۇراقتى تۇردە رەيدتىك-پروفيلاكتيكالىق ءىس-شارالار وتكىزۋدە.
رەيد بارىسىندا ويىن-ساۋىق ورىندارى، ساياباقتار، سكۆەرلەر جانە باسقا دا قوعامدىق ورىندار تەكسەرىلىپ، تۇنگى ۋاقىتتا زاڭدى وكىلدەرىنىڭ ەرىپ ءجۇرۋىنسىز جۇرگەن جاسوسپىرىمدەر انىقتالدى.
سوڭعى ءۇش تاۋلىك ىشىندە قىزىلوردا وبلىسى پوليتسيا دەپارتامەنتىنىڭ يۋۆەنالدى پوليتسيا قىزمەتكەرلەرىمەن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 442-بابى بويىنشا كامەلەتكە تولماعانداردىڭ زاڭدى وكىلدەرىنە قاتىستى 109 اكىمشىلىك حاتتاما راسىمدەلدى. سونىمەن قاتار، اتا-انالاردىڭ نەمەسە وزگە دە زاڭدى وكىلدەردىڭ بالالاردى تاربيەلەۋ جونىندەگى مىندەتتەرىن تيىسىنشە ورىنداماۋىنا بايلانىستى كودەكستىڭ 127-بابى بويىنشا 12 اكىمشىلىك حاتتاما تولتىرىلدى.
سونداي-اق رەيدتىك ءىس-شارالار بارىسىندا كامەلەتكە تولماعانداردىڭ زاڭدى وكىلدەرىنسىز تۇنگى ساعات 22:00-دەن كەيىن ويىن-ساۋىق مەكەمەلەرىندە بولۋىنا جول بەرگەن 3 ويىن-ساۋىق ورنى انىقتالدى. اتالعان مەكەمەلەردىڭ يەلەرىنە قاتىستى قولدانىستاعى زاڭناما تالاپتارىنا سايكەس ءتيىستى شارالار قابىلداندى.
پوليتسيا دەپارتامەنتى اتا-انالار مەن زاڭدى وكىلدەردى بالالاردىڭ قاۋىپسىزدىگىنە ەرەكشە نازار اۋدارۋعا، ولاردىڭ بوس ۋاقىتىن ءتيىمدى ۇيىمداستىرۋعا جانە زاڭ تالاپتارىن قاتاڭ ساقتاۋعا شاقىرادى.