«زاڭ مەن ءتارتىپ» يدەولوگياسىن ىلگەرىلەتۋ، ازاماتتاردىڭ قۇقىقتىق ساۋاتتىلىعىن ارتتىرۋ جانە ينتەرنەت كەڭىستىگىندەگى الاياقتىقتىڭ الدىن الۋ ماقساتىندا قىزىلوردا وبلىسى پوليتسيا دەپارتامەنتىنىڭ قىزمەتكەرلەرى وڭىرگە تانىمال بلوگەر ەرسۇلتان بايجانوۆپەن بىرلەسىپ، اقپاراتتىق-ءتۇسىندىرۋ جۇمىستارىن جۇرگىزدى.
ءىس-شارا بارىسىندا پوليتسيا قىزمەتكەرلەرى مەن بلوگەر حالىق كوپ شوعىرلاناتىن ورىنداردا تۇرعىندارمەن كەزدەسىپ، ينتەرنەت الاياقتارىنىڭ كەڭ تارالعان تاسىلدەرى تۋرالى ءتۇسىندىردى. سونداي-اق ازاماتتارعا جەكە جانە بانكتىك دەرەكتەردى قورعاۋ، كۇماندى سىلتەمەلەرگە وتپەۋ، بەيتانىس نومىرلەردەن كەلەتىن قوڭىراۋلارعا ساقتىقپەن قاراۋ جانە الاياقتاردىڭ ارباۋىنا تۇسپەۋ جولدارى جونىندە كەڭەستەر بەرىلدى.
تۇرعىندارعا ينتەرنەتتەگى قاۋىپسىزدىك ەرەجەلەرى كورسەتىلگەن اقپاراتتىق پاراقشالار تاراتىلدى. سونىمەن قاتار ازاماتتاردىڭ نازارىن اۋدارۋ ماقساتىندا ينتەرنەت الاياقتىقتىڭ الدىن الۋعا باعىتتالعان ارنايى بەينەروليك ءتۇسىرىلدى.
ءىس-شارا بارىسىندا قازىرگى تاڭدا وزەكتى ماسەلەلەردىڭ ءبىرى – «دروپپەرلىك» تۋرالى دا كەڭىنەن ءتۇسىندىرىلدى.
دروپپەر – ءوزىنىڭ بانك كارتاسىن، شوتىن نەمەسە وزگە دە تولەم قۇرالدارىن ءۇشىنشى تۇلعالارعا بەرىپ، زاڭسىز اقشا اۋدارىمدارىن جۇزەگە اسىرۋعا مۇمكىندىك بەرەتىن ادام. الاياقتار مۇنداي شوتتاردى جابىرلەنۋشىلەردەن تۇسكەن قاراجاتتى باسقا شوتتارعا اۋدارۋ نەمەسە قولما-قول اقشاعا اينالدىرۋ ءۇشىن پايدالانۋى مۇمكىن.
پوليتسيا ازاماتتاردى وزدەرىنىڭ بانك كارتالارىن، شوتتارىن جانە بانك قوسىمشالارىنا قاتىستى دەرەكتەردى بوگدە ادامدارعا بەرمەۋگە شاقىرادى. كۇماندى ۇسىنىستارعا سەنبەي، كەز كەلگەن قارجىلىق وپەراتسياعا بارىنشا ساقتىقپەن قاراۋ قاجەت.
پوليتسيا ينتەرنەت الاياقتىقتىڭ الدىن الۋ باعىتىنداعى ءتۇسىندىرۋ جۇمىستارىن تۇراقتى تۇردە جالعاستىرادى.