قىزىلوردا وبلىسىنىڭ اكىمى مۇرات ەرگەشباەۆ سىرداريا اۋدانىنا جۇمىس ساپارى كەزىندە اقجارما اۋىلىنا گاز قوسۋ راسىمىنە قاتىستى. سالتاناتتى شارادا ايماق باسشىسى اۋىل تۇرعىندارىن كوپتەن كۇتكەن يگىلىكتىڭ ىسكە اسۋىمەن قۇتتىقتاپ، ىزگى تىلەگىن ءبىلدىردى. «مەملەكەت باسشىسى اۋىلدارعا ينفراقۇرىلىم جەتكىزۋگە ەرەكشە كوڭىل بولۋدە. بۇگىن سىزدەر كوپتەن كۇتكەن، اۋىل حالقىنىڭ تۇرمىس-تىرشىلىگىنە جاڭا تىنىس بەرەتىن تابيعي گاز قوسۋعا جينالدىق. بۇل جوباعا بيۋدجەتتەن 1,8 ملرد تەڭگەدەن استام قارجى ءبولىندى. وتكەن جىلى ناعي ءىلياسوۆ، شاعان اۋىلدارىنا گاز قوسىلىپ، ەل يگىلىگىن كورۋدە. الداعى ۋاقىتتا دا بۇل باعىتتاعى جۇمىستار جالعاسىن تابادى. ەگەمەن ەلىمىز ەڭسەلى، تاۋەلسىزدىگىمىز تۇعىرلى بولعاي!»، - دەدى ايماق باسشىسى. راسىمنەن كەيىن ايماق باسشىسى اۋىل تۇرعىندارىنىڭ ۇيلەرىنە بارىپ، ەستەلىك سىيلىق تابىستادى. وڭىردە 2022 جىلدان بەرى 65 ملرد. تەڭگەدەن استام قارجىعا 77 گازداندىرۋ جوباسى جۇزەگە استى. ناتيجەسىندە وبلىس حالقىن گازداندىرۋ دەڭگەيى 83 پايىز بولدى. بيىل جىل سوڭىنا دەيىن 10 ەلدى مەكەنگە كوگىلدىر وتىن قوسىلىپ، قامتۋ دەڭگەيى 85 پايىزعا جەتكىزىلەدى. جاقىن كۇندەرى سىرداريا اۋدانىنا قاراستى شىركەيلى، قوعالىكول جانە بەسارىق اۋىلدارىن گازداندىرۋ باستالادى. ساپار بارىسىندا ايماق باسشىسى اقجارما، شاعان، ىڭكارداريا، ناعي ءىلياسوۆ، شىركەيلى اۋىلدارىنىڭ تۇرعىندارىمەن كەزدەستى. وندا اۋداننىڭ الەۋمەتتىك-ەكونوميكالىق دامۋى تۋرالى ايتىلىپ، جينالعان جۇرتشىلىق ۇسىنىس-پىكىرلەرىن ورتاعا سالدى.
قىزىلوردا وبلىسى اكىمىنىڭ ءباسپاسوز قىزمەتى