وتكەن جىلدىڭ قورىتىندىسى بويىنشا قىتاي، رەسەي جانە يتاليا ەلىمىزدىڭ ءىرى ساۋدا سەرىكتەستەرى بولدى — ءدال وسى ءۇش مەملەكەتكە ەكسپورتتىڭ دا، يمپورتتىڭ دا نەگىزگى كولەمى تيەسىلى.
قازاقستاننىڭ ەكسپورتتىق كىرىسى 2024 جىلى 81 ملرد اقش دولللارىنان استى. بۇل سومانىڭ جارتىسىنان استامى، ياعني 42,9 ملرد اقش دوللارى شيكى مۇنايعا تيەسىلى، بۇل بۇكىل قازاقستاندىق ەكسپورتتىڭ 52,5% قۇرايدى. سونىمەن قاتار، ەل سىرتقى نارىققا ۋران ( 4,6 ملرد اقش دوللارى), مىس جانە مىس كاتودتارىن (4,1 ملرد اقش دوللارى), سونداي-اق مىس كەندەرى مەن كونتسەنتراتتارىن 3,2 ملرد اقش دوللارى) بەلسەندى تۇردە جەتكىزدى. فەرروقورىتپالارعا، تابيعي گازعا، بيدايعا جانە مۇناي ونىمدەرىنە تۇراقتى سۇرانىس ساقتالىپ وتىر.
2024 جىلى تەحنيكا، كولىك جانە فارماتسەۆتيكا سالاسىندا يمپورت بەلسەندىلىگىمەن ەرەكشەلەندى. ەڭ ۇلكەن كولەم جەڭىل اۆتوموبيلدەرگە ($2,3 ملرد), ۇشۋ اپپاراتتارىنا ($1,8 ملرد), دارىلىك پرەپاراتتارعا ($1,7 ملرد) جانە تەلەكوممۋنيكاتسيالىق جابدىققا تيەسىلى بولدى. قازاقستاندىق نارىق دايىن بۇيىمداردى دا، جيىنتىقتاۋىشتاردى — شاناقتاردى، قوسالقى بولشەكتەردى، ەسەپتەۋ تەحنيكاسىن دا يمپورتتاي وتىرىپ، جاھاندىق وندىرىستىك تىزبەككە كىرۋىن جالعاستىرۋدا.
2025 جىلدىڭ باسى وسى تەندەنتسيالاردىڭ تۇراقتىلىعىن راستادى. قاڭتار ايىندا قازاقستاننىڭ ەكسپورتى $4,5 ملرد قۇرادى، ونىڭ 60% - ى تاعى دا مۇنايعا تيەسىلى. جەتكىزۋ قۇرىلىمىندا مىس، فەرروقورىتپالار، بيداي، سونداي-اق ۋران، تابيعي گاز جانە كۇنباعىس مايى ماڭىزدى پوزيتسيالار بولىپ قالا بەردى. قاڭتار ايىندا يمپورت 2,8 ملرد اقش دوللارىنان استى. جەتەكشى ساناتتارعا تەلەفوندار، اۆتوموبيل كورپۋستارى، ءدارى-دارمەكتەر جانە جەڭىل اۆتوموبيلدەر جاتادى. سونداي-اق قۇرىلىس تەحنيكاسى مەن قوزعالتقىشتاردى جەتكىزۋدىڭ ءوسىمى بايقالادى.
شيكىزات ەكسپورتى مەن جوعارى تەحنولوگيالىق ءونىم يمپورتى اراسىنداعى تەڭگەرىمنىڭ ساقتالۋى قازاقستاننىڭ سىرتقى ەكونوميكالىق باعىتىنىڭ ورنىقتىلىعىن راستايدى. 2025 جىلى قىتايمەن، رەسەيمەن جانە ەۋروپالىق وداق ەلدەرىمەن ستراتەگيالىق ارىپتەستىكتى دامىتۋ، سونداي-اق ورتالىق ازيا نارىقتارىنداعى پوزيتسيالاردى نىعايتۋ باسىمدىق بولىپ قالا بەرەدى.
ساۋدا جانە ينتەگراتسيا مينيسترلىگى