ەڭ الدىمەن مينيستر اباي وبلىسىنىڭ تۇرعىندارىمەن كەزدەسۋ وتكىزدى. شارا Alikhan Bokeikhan University عيماراتىندا ءوتتى. كەزدەسۋ بارىسىندا قانات شارلاپاەۆ ءوڭىر ەكونوميكاسىنداعى وڭ ديناميكاعا توقتالدى. ماسەلەن، وڭدەۋ ونەركاسىبى ونىمدەرىن ەكسپورتتاۋ كولەمى وتكەن جىلمەن سالىستىرعاندا 46%-عا ارتتى. سونداي-اق، سۋمەن جابدىقتاۋ جانە سۋ بۇرۋ جۇيەسىن دامىتۋعا قالالاردا 8 جوبانى جۇزەگە اسىرۋعا 2,3 ملرد تەڭگە، اۋىلدىق جەرلەردە 16 جوباعا – 3,8 ملرد تەڭگە ءبولىندى. جەرگىلىكتى تۇرعىندار كوتەرگەن ماسەلەلەر قۇرىلىس سالاسىنداعى وتاندىق ماتەريالداردىڭ پايدالانىلۋىن مەملەكەتتىك قولداۋدىڭ مونيتورينگى، وتاندىق ءونىمنىڭ الەمدىك نارىقتاعى باسەكەگە قابىلەتتىلىگىن ارتتىرۋ شارالارى، سونداي-اق سالادا بىلىكتى كادرلاردىڭ جەتىسپەۋشىلىگى تاقىرىپتارىنا قاتىستى. مينيستر وتاندىق ماتەريالداردىڭ پايدالانىلۋىن باقىلاۋدى تاپسىرىس بەرۋشى، جوبالاۋشى جانە تەحنيكالىق قاداعالاۋ جۇرگىزەتىنىن اتاپ ءوتتى. الايدا بۇل تالاپتاردى ورىنداماعانى ءۇشىن اكىمشىلىك جاۋاپكەرشىلىك ءالى قاراستىرىلماعان. وسىعان بايلانىستى مينيسترلىك اكىمشىلىك قۇقىق بۇزۋشىلىق تۋرالى كودەكسكە مەردىگەرلەرگە قاتىستى جاۋاپكەرشىلىكتى قاراستىرۋ جونىندەگى ۇسىنىستار ازىرلەۋدە. سونداي-اق قانات شارلاپاەۆ ونەركاسىپتەگى شاعىن جانە ورتا بيزنەستى قولداۋدىڭ اعىمداعى شارالارى تۋرالى باياندادى. ونىڭ ىشىندە دامۋ ينستيتۋتتارىنان 9%-بەن جەڭىلدىكتى نەسيەلەر، جەڭىل ونەركاسىپ كاسىپورىندارى ءۇشىن 3%-دىق مولشەرلەمەمەن ليزينگتىك قارجىلاندىرۋ جانە شاعىن جانە ورتا بيزنەس ءۇشىن 9%-دىق مولشەرلەمەمەن، سونداي-اق جاڭعىرتۋ مەن اككرەديتتەۋ بويىنشا شىعىنداردىڭ 40%-عا دەيىن وتەلۋى بار.
مينيستر سالانى بىلىكتى كادرلارمەن قامتاماسىز ەتۋ ءۇشىن جاڭا كاسىبي ستاندارتتار ازىرلەنىپ، جاڭارتىلىپ جاتقانىن اتاپ ءوتتى. ماسەلەن، بيىل ماشينا جاساۋ، مەتاللۋرگيا، حيميا ءوندىرىسى جانە قۇرىلىس ءوندىرىسى سياقتى سالالار ءۇشىن 13 ستاندارت ازىرلەندى. 2025 جىلعا 40, ال 2026 جىلعا 101 كاسىبي ستاندارت ازىرلەۋ جوسپارلانۋدا.
جۇمىس ساپارى ازاماتتاردى جەكە ماسەلەلەرى بويىنشا قابىلداۋمەن اياقتالدى. جۇگىنۋشىلەر ماسەلەلەرىنىڭ باسىم بولىگى وڭىردەگى تۇرعىن ءۇي قۇرىلىسى مەن وتاندىق تاۋار وندىرۋشىلەردى قولداۋعا قاتىستى. ولاردى تىڭداعان مينيستر جان-جاقتى جاۋاپتار بەرىپ، ونەركاسىپ، قۇرىلىس جانە تۇرعىن ءۇي-كوممۋنالدىق شارۋاشىلىق كوميتەتتەرىنىڭ، سونداي-اق وبلىس اكىمدىگىنىڭ وكىلدەرىنە ناقتى تاپسىرمالار بەردى.
ءباسپاسوز قىزمەتى