جوعارى ەكسپورتتىق الەۋەتى بار قازاقستاندىق كومپانيالاردىڭ ونىمدەرىن تانىستىرۋ ماقساتىندا ۇيىمداستىرىلعان كورمەگە «BB Partners» جشس دە ءوز ونىمدەرىن تانىستىردى. كومپانيا ديرەكتورى بولات امانباەۆتىڭ ايتۋىنشا، مۇنداي باستامالار تەك ساۋدانى ىلگەرىلەتىپ قويماي، ءوزارا دوستىقتى دا نىعايتا تۇسەدى.
كومپانيا الداعى ۋاقىتتا كۇنىنە 10 توننا ءسۇتتى وڭدەپ، قازاقستان نارىعىن عانا ەمەس، قىتاي نارىعىن دا باعىندىرۋدى جوسپارلاپ وتىر. وسى ماقساتتا الماتى وبلىسى ماڭىنداعى قوشمامبەت اۋىلىنان 10 گەكتار جەر الىنعان. زاۋىتتى ۇلكەيتۋ جۇمىستارى مەن جوبالاۋ ماقساتتارى ءۇشىن 2,5 ملرد تەڭگە جۇمسالعان. جىلقى مەن تۇيەلەردەن بولەك، 1200 ەشكىگە ارنالعان فەرما قۇرىلىسى اياقتالعان.
2017 جىلدان بەرى زاماناۋي تەحنولوگيا كومەگىمەن، اتاپ ايتقاندا سۋبليماتسيا تاسىلىمەن «Neo milk» دەگەن جالپى اتاۋمەن ۇلتتىق سۋسىنداردى كاپسۋلا تۇرىندە وندىرەتىن «BB Partners» جشس كومپانياسىنىڭ جوعارى ساپادا بيە ءسۇتى نەگىزىندە دايىندالاتىن – «Neo Saumal»، تۇيە سۇتىنەن جاسالاتىن – «Shubat»، ال ەشكى سۇتىنەن دايىندالاتىن «Goat milk» جانە قۇرعاتىلعان ءسۇت «ماما زناەت» ونىمدەرى قىتايدىڭ تاۋار وندىرۋشىلەرىنىڭ نازارىن اۋدارىپ، قىزىعۋشىلىعىن تۋدىردى. قىتايدىڭ بيزنەس وكىلدەرى كەلىسىمشارت جاساسىپ، الداعى ۋاقىتتا حالقىمىزدىڭ ءنارلى دە، قۇنارلى شيپالى ۇلتتىق سۋسىندارىن ساتىپ الۋعا نيەت ءبىلدىرىپ وتىر.
قىتايلىق بيزنەس وكىلدەرىنىڭ ايتۋىنشا، قازاقستان مەن قىتاي اۋىل شارۋاشىلىعى ونىمدەرىن شىعارۋ جانە وڭدەۋ سالاسى بويىنشا ءوزارا تىعىز ىنتىماقتاستىق ورناتا الادى. قىتاي تۇرعىندارىنىڭ قازاقستاندىق تاماق جانە اۋىل شارۋاشىلىعى ونىمدەرىنە دەگەن سۇرانىسى جوعارى، سول سەبەپتى، قىتاي نارىعىن جاۋلاپ الۋعا قازاقستاندىق تاۋار وندىرۋشىلەردىڭ مۇمكىندىگى جەتەدى.
ايتا كەتەيىك، 2017 جىلى قۇرىلعان «BB Partners» كومپانياسىنىڭ ءوندىرىسى الماتى وبلىسىندا. كومپانيا مۇزداتىپ، قاتىرۋ (سۋبليماتتاۋ) ءادىسى ارقىلى كەپتىرىلگەن سۇتتەن جاسالعان بىرەگەي ونىمدەردىڭ ءوندىرۋشىسى ءارى جەتكىزۋشىسى.
ءسۇتتى مۇزداتىپ كەپتىرۋ – ءونىمنىڭ باستاپقى قۇرىلىمىن بۇزباي، مۇزداتۋ ارقىلى ىلعالدىعىن جويۋ. ونىمنەن ىلعالدىڭ شامامەن 70-90% وتە تومەن تەمپەراتۋرادا الىنادى، ال قالعان بولىگى، ياعني تابيعي ىلعالدىلىعى وڭ تەمپەراتۋرادا الىنادى. مۇزداتىپ كەپتىرۋ ارقىلى الىنعان ءسۇتتىڭ تاعامدىق قۇندىلىعىن باعالاۋ ورگانولەپتيكالىق جانە بيولوگيالىق قاسيەتتەرىنىڭ باستاپقى ونىمنەن ەرەكشەلەنبەيتىنىن كورسەتتى.
ونىمدەر نەمىس تەحنولوگياسىمەن الەمدىك حالال ستاندارتىنا ساي جاسالادى. بارلىق ونىمدەرىن قازاق تاعامتانۋ اكادەمياسى ماقۇلدانعان، مەملەكەتتىك تىركەۋدەن وتكەن جانە قمدب حالال دامۋ سەرتيفيكاتىن جىل سايىن الىپ وتىرادى.
ءونىم شيكىزاتى كومپانيا مەنشىگىندەگى 500 جىلقى، 300 زاانەن تۇقىمداس ەشكىلەرىنەن الىنادى. 250 ادامدى جۇمىسپەن قامتىپ وتىرعان كومپانيا بولاشاقتا جۇمىسكەرلەر سانىن 500-گە دەيىن ارتتىرماق.
اقپارات كوزى: Naryk.kz