قارجىلىق مونيتورينگ اگەنتتىگى ونلاين-كازينولارعا قىزمەت كورسەتۋ ءۇشىن بىرنەشە ەلدىڭ اۋماعىن قامتيتىن دروپپەرلەر جەلىسىن قۇرعان قىلمىستىق توپتاردىڭ ارەكەتىنە توسقاۋىل قويدى.
تەرگەۋ بارىسىندا تولەمدەردى وڭدەۋمەن اينالىسقان دەلدالداردىڭ قازاقستان، وزبەكستان جانە قىرعىزستان ازاماتتارىنىڭ بانك شوتتارىن پايدالانىپ، «دروپ-فەرمالار» ۇيىمداستىرعانى انىقتالدى.
قازاقستانعا كەلگەن شەتەل ازاماتتارىنا جەكە سايكەستەندىرۋ نومىرلەرى (جسن) بەرىلىپ، ولاردىڭ اتىنا SIM-كارتالار مەن بانك شوتتارى اشىلعان. كەيىن بانك قوسىمشالارىنا كىرۋگە رۇقساتى بار ۇيالى تەلەفوندار وسى شوتتار ارقىلى اقشا اينالىمىن باسقاراتىن ادامدارعا بەرىلگەن.
اقشا اينالىمىن باسقارۋ ءۇشىن ويىنشىلاردان تولەم قابىلداۋعا، ولاردى اۆتوماتتى تۇردە انىقتاۋعا جانە ۇتىستاردى تولەۋگە مۇمكىندىك بەرەتىن P2P پلاتفورماسى پايدالانىلعان. قىلمىستىق توپ مۇشەلەرى ءوزارا ەسەپ ايىرىسۋ ءۇشىن كريپتوۆاليۋتانى دا قولدانعان.
تۇركىستان وبلىسى مەن الماتى قالاسىندا قازاقستان بانكتەرىنىڭ 89 كارتاسىن پايدالانعان وزبەكستاننىڭ ءۇش ازاماتى ۇستالدى. ولاردان بانك شوتتارىن باسقارۋعا ارنالعان 20 تەلەفون تاركىلەندى. اتالعان كارتالار ارقىلى جۇرگىزىلگەن وپەراتسيالاردىڭ جالپى كولەمى 500 ملن تەڭگەگە جەتكەن.
جامبىل وبلىسىندا دا بىرنەشە ەلدىڭ اۋماعىندا ارەكەت ەتكەن تاعى ءبىر قىلمىستىق توپتىڭ جولى كەسىلدى. ونىڭ مۇشەلەرى قىرعىزستان مەن وزبەكستان ازاماتتارىن، سونىڭ ىشىندە كامەلەتكە تولماعانداردى تارتىپ، تاراز بەن الماتى قالالارىندا وزگە ادامداردىڭ بانك شوتتارى ارقىلى اقشا اينالىمىن جۇرگىزەتىن جەلى قۇرعان.
ءتىنتۋ بارىسىندا 180 بانك كارتاسى، 15 تەلەفون، 26 SIM-كارتا، 50 مىڭ اقش دوللارى، 27 مىڭ USDT, ءتورت اۆتوكولىك، قارۋ-جاراق جانە وق-دارىلەر تاركىلەندى. بانك كارتالارىنا تۇسكەن اقشانىڭ جالپى كولەمى 9,8 ملرد تەڭگەدەن اسقان.
سوت بەس كۇدىكتىنى قاماۋعا الۋعا سانكتسيا بەردى.
تەرگەۋ جالعاسىپ جاتىر. وزگە مالىمەتتەر قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس جاريا ەتىلمەيدى.
قما ءباسپاسوز قىزمەتى