پرەزيدەنتكە ۇسىنىلعان اقپاراتقا سايكەس، بىلتىر 4 ءىرى ينفراقۇرىلىمدىق جوبا اياقتالعان. اتاپ ايتقاندا، ەكىباستۇزداعى ءبىرىنشى مەملەكەتتىك ايماقتىق ەلەكتر ستانساسىنىڭ №1 ەنەرگوبلوگى قالپىنا كەلتىرىلدى، سيان قالاسىندا كولىك-لوگيستيكا تەرمينالى جۇمىس ىستەي باستادى، الماتىنىڭ ەنەرگەتيكا كەشەنىنە قاجەتتى گاز ينفراقۇرىلىمىنىڭ قۇرىلىسى اياقتالدى، قاراشىعاناق كەن ورنىندا گازدى كەرى ايداۋعا ارنالعان بەسىنشى كومپرەسسور پايدالانۋعا بەرىلدى.
نۇرلان جاقىپوۆ بيىل مامىر ايىندا بيتۋم ءوندىرىسىن كەڭەيتۋ جوباسى باستالعانىن جەتكىزدى. جىل سوڭىنا دەيىن تاعى 7 ءىرى ينۆەستيتسيالىق جوبا، سونىڭ ىشىندە، كەندىرلى كەنتىندە سۋ تۇشىتۋ زاۋىتى، الماتى قالاسىن اينالىپ وتەتىن تەمىرجول جەلىسى، اقتاۋ پورتىندا كونتەينەرلىك حاب، تالدىقورعان – ءۇشارال ماگيسترالدى گاز قۇبىرى، جامبىل وبلىسىندا جەل قوندىرعىلارى بولشەكتەرىن شىعاراتىن زاۋىت قۇرىلىستارى ىسكە اسىرىلادى. ال دوستىق – مويىنتى ۋچاسكەسىندەگى ەكىنشى تەمىرجولدى مەرزىمىنەن ءبىر جىل بۇرىن پايدالانۋعا بەرۋ جوسپارلانىپ وتىر.
Qazaq Air اق اۋە كومپانياسى مەن «موبايل تەلەكوم-سەرۆيس» جشس (تەلە2) ۇيالى بايلانىس وپەراتورىن ستراتەگيالىق ينۆەستورلارعا ساتۋ جونىندە مامىلەلەر جاسالدى. بۇل نارىقتاعى باسەكەلەستىكتى ارتتىرۋعا جانە قازاقستان ەكونوميكاسىنىڭ نەگىزگى سەكتورلارىنا ينۆەستيتسيا تارتۋعا ىقپال ەتەدى.
مەملەكەت باسشىسىنا «جايلى مەكتەپ» ۇلتتىق جوباسىنىڭ ورىندالۋى تۋرالى مالىمەت بەرىلدى. قازىرگى كەزدە 106 مەكتەپتىڭ قۇرىلىسى بىتۋگە جاقىن، جىل سوڭىنا دەيىن تاعى 102 وقۋ وشاعىن سالۋ جوسپارلانعان.
قاسىم-جومارت توقاەۆ «سامۇرىق-قازىنا» اق قىزمەتىنىڭ نەگىزگى باعىتتارىنا قاتىستى بىرقاتار مىندەت جۇكتەپ، كومپانيا اكتيۆتەرىنىڭ تيىمدىلىگىن جوعارىلاتۋ، قۇنىن ارتتىرۋ، سونداي-اق ينۆەستيتسيالىق جوبالاردى ۋاقتىلى جانە ساپالى جۇزەگە اسىرۋ جۇمىستارىن جالعاستىرۋدى تاپسىردى.
اقوردا.كز