سوڭعى ءتورت جىلدا قاراعاندى وبلىسىندا 31 قارجىلىق پيراميدا اشكەرەلەنىپ، ولاردىڭ زاڭسىز قىزمەتى توقتاتىلدى. الاياقتىق سحەمالارعا ەلىمىز بويىنشا 100 مىڭنان استام ادام تارتىلعان، ونىڭ ىشىندە 5 مىڭنان استامى — وسى ءوڭىردىڭ تۇرعىندارى. تەك بيىلعى جىلدىڭ وزىندە وبلىستىق ەكونوميكالىق تەرگەپ-تەكسەرۋ دەپارتامەنتى سەگىز جاڭا قارجى پيراميداسىن انىقتادى.
بۇل تۋرالى قاراعاندى وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە ەكونوميكالىق تەرگەپ-تەكسەرۋ دەپارتامەنتىنىڭ تەرگەۋ باسقارماسىنىڭ باسشىسى قۋات ءىزبانوۆ مالىمدەدى. ونىڭ ايتۋىنشا، ۆەدومستۆو ءتورت جىل ىشىندە 40 قىلمىستىق ءىستى تىركەگەن. ازاماتتارعا كەلتىرىلگەن زالالدىڭ جالپى كولەمى 2,1 ميلليارد تەڭگەنى قۇراپ وتىر.
— قارجى پيراميداسىن قۇرۋ جانە باسقارۋ — تەرگەۋ تاجىريبەسىندە ەڭ كۇردەلى ءارى قاۋىپتى قىلمىستاردىڭ ءبىرى. بيىل بەس مىڭنان استام جابىرلەنۋشى تىركەلگەن التى قىلمىستىق ءىستى تەرگەپ جاتىرمىز، — دەدى قۋات ءىزبانوۆ.
جىل باسىنان بەرى ەكى قىلمىستىق ءىس بويىنشا سوت ۇكىمى شىقتى. قارجى پيراميداسىنىڭ قۇرىلىمدىق بولىمشەلەرىن باسقارىپ، ازاماتتاردان 100 ميلليون تەڭگە جيناعان ەكى ادام جاۋاپقا تارتىلدى. سوتتىڭ شەشىمىمەن ولاردىڭ ءبىرى 7 جىلعا باس بوستاندىعىنان ايىرىلدى، ال ەكىنشىسىنە كەلتىرىلگەن شىعىندى تولىق وتەگەنى ءۇشىن 5 جىل شارتتى جازا تاعايىندالدى.
رەسپۋبليكالىق دەڭگەيدە جۇمىس ىستەگەن ءبىر قارجىلىق سحەمانىڭ ءوڭىر اۋماعىندا ءتورت بىردەي كەڭسەسى بولعان: ەكەۋى قاراعاندىدا، بىرەۋى تەمىرتاۋدا، بىرەۋى بالقاشتا. ونىڭ قىزمەتى توقتاتىلىپ، ءىس سوتقا جولداندى.
تەرگەۋ جۇمىستارىمەن قاتار، دەپارتامەنت قارجى پيراميدالارىنىڭ الدىن الۋ باعىتىندا اقپاراتتىق-ءتۇسىندىرۋ شارالارىن دا بەلسەندى جۇرگىزۋدە. ماماندار مەكتەپتەر مەن جوعارى وقۋ ورىندارىندا دارىستەر وقىپ، جەرگىلىكتى اتقارۋشى ورگاندار مەن ولاردىڭ قۇرىلىمدىق بولىمشەلەرىندە كەزدەسۋلەر وتكىزىپ كەلەدى. سونداي-اق ۇيىمداردىڭ قارجى پيراميداسىنىڭ بەلگىلەرىنە يە ەكەنىن تەكسەرۋگە مۇمكىندىك بەرەتىن Baiqa, piramida! اتتى Telegram-بوت ازىرلەنگەن.
الايدا بارلىق ەسكەرتۋ مەن ءتۇسىندىرۋ جۇمىستارىنا قاراماستان، تۇرعىنداردىڭ كۇماندى جوبالارعا قىزىعۋشىلىعى ءالى دە باسەڭدەمەي تۇر.
— ءبىز اقپاراتتىق-ءتۇسىندىرۋ جۇمىستارىن جۇيەلى تۇردە جۇرگىزىپ كەلەمىز، دەگەنمەن ازاماتتار ءالى دە بولسا كۇماندى جوبالارعا اقشا سالۋىن توقتاتپاي وتىر، — دەپ اتاپ ءوتتى قۋات ءىزبانوۆ.
جارتى جىل ىشىندە قارجى پيراميداسىنىڭ بەلگىلەرى بار مىڭنان استام ينتەرنەت-رەسۋرس بۇعاتتالدى. سونىمەن قاتار، دەپارتامەنت قىزمەتكەرلەرى ەسىرتكى، زاڭسىز الكوگول ونىمدەرى جانە وزگە دە تىيىم سالىنعان تاۋارلاردى جارنامالايتىن سايتتارعا قولجەتىمدىلىكتى شەكتەۋ جۇمىستارىن قاتار جۇرگىزۋدە.