سكرينينگ 2 200 اۋىلدىق ەلدى مەكەندى قامتىدى. جۇمىس "اۋىل اماناتى" جوباسى اياسىندا ۇلتتىق ەكونوميكا مينيسترلىگى، وبلىس اكىمدىكتەرى جانە "Amanat" پارتياسىمەن بىرلەسىپ جۇرگىزىلدى.
ماقسات – بولاشاعى بار ينۆەستيتسيالىق جوبالاردى ىرىكتەۋ جانە وبلىستىق ماڭىزى بار اۋداندار مەن قالالاردىڭ دامۋ جوسپارلارىن ناقتىلاۋ.
بارلىعى 55 ملرد تەڭگە كولەمىندەگى 6 مىڭنان استام جوبا وڭىرلىك دامۋ باسىمدىقتارىنا باسا نازار اۋدارىلدى. قازىرگى ۋاقىتتا اۋىلدىق ينۆەستيتسيالىق جوبالاردى باعالاۋدىڭ بىرىڭعاي ادىستەمەسى ازىرلەنىپ جاتىر. ول ينفراقۇرىلىم، دەموگرافيا، جۇمىسپەن قامتۋ قۇرىلىمى مەن رەسۋرس بازاسىن ەسكەرە وتىرىپ، جوبالاردىڭ تيىمدىلىگىن ءادىل باعالاۋعا جانە تابىستى تاجىريبەلەردى ەل بويىنشا كەڭىنەن ەنگىزۋگە مۇمكىندىك بەرەدى.
قانات بوزىمباەۆ 15 مامىرعا دەيىن ادىستەمەنى ازىرلەۋدى، ال 15 ماۋسىمعا دەيىن وبلىستىق ماڭىزى بار قالالار مەن ءاربىر اۋداننىڭ بەس جىلدىق دامۋ جوسپارلارىن ماسليحاتتاردا بەكىتۋدى تاپسىردى. بۇل قۇجاتتار كەلىسىلگەن تاسىلدەر مەن الەۋمەتتىك ينفراقۇرىلىمدى ەسكەرە وتىرىپ دايىندالۋى ءتيىس.
«وبلىس اكىمدىكتەرى «اۋىل اماناتى» جوبالارىن سكرينينگپەن ايقىندالعان باسىم باعىتتارعا سايكەستەندىرۋ جۇمىسىن 25 ساۋىرگە دەيىن اياقتاۋى قاجەت»، — دەدى ۆيتسە-پرەمەر.
وتىرىستا اۋىلدىق جەرلەردە شاعىن ونەركاسىپتىك ايماقتار ء(شوا) قۇرۋ ماسەلەسىنە دە ەرەكشە نازار اۋدارىلدى. قازىردىڭ وزىندە كەيبىر وڭىرلەردە، مىسالى، تۇركىستان وبلىسىندا بۇل جوبالار ىسكە قوسىلا باستادى.
ۆيتسە-پرەمەر وبلىس اكىمدىكتەرىنە جانە «ونەركاسىپتى دامىتۋ قورى» اق-عا قوستاناي، پاۆلودار، جامبىل، باتىس قازاقستان، قىزىلوردا، الماتى، اقمولا جانە تۇركىستان وبلىستارىندا 10 پيلوتتىق ءشوا جوباسىن ىسكە قوسۋدى مامىر ايىنىڭ سوڭىنا دەيىن باستاۋ جونىندە تاپسىرما بەردى.
سونداي-اق شىعىس قازاقستان، قىزىلوردا، تۇركىستان وبلىستارى مەن قوناەۆ قالاسىنىڭ اكىمدىكتەرى «اۋىل اماناتى» باعدارلاماسىن ىسكە اسىرۋ بويىنشا ءوز ۇسىنىستارىن تانىستىردى. ناتيجەسىندە ۆيتسە-پرەمەر ۇلتتىق ەكونوميكا مينيسترلىگىنە اۋىلدىق ەلدى مەكەندەر مەن شاعىن قالالاردا ميكروكرەديت بەرۋ مەن ليزينگ ەرەجەلەرىن 10 مامىرعا دەيىن بەكىتۋدى تاپسىردى. جوبالىق وفيس جۇمىستى وڭىرلەرگە شىعىپ، جەرگىلىكتى اكىمدىكتەردىڭ اتقارعان جۇمىستارىن تىڭداۋ ارقىلى جالعاستىرادى.