استانا قالاسىنىڭ اكىمى جەڭىس قاسىمبەك Instagram پاراقشاسىندا قاجىمۇقان مۇڭايتپاسوۆ اتىنداعى ايگىلى فۋتبول ستاديونىنىڭ قۇرىلىسى اياقتالعانى تۋرالى جازدى
«قاجىمۇقان مۇڭايتپاسوۆ اتىنداعى فۋتبول ستاديونىنىڭ قۇرىلىسىن تولىقتاي اياقتادىق. اڭىزعا اينالعان بۇل ستاديوننىڭ تاريحى 1936 جىلدان باستاۋ الادى جانە بۇگىن ول قايتا جاڭعىرىپ، زاماناۋي كەلبەتكە يە بولدى.
بۇگىن قر باس پروكۋرورى بەرىك اسىلوۆپەن بىرگە قۇرىلىس جۇمىسى تولىق اياقتالعان نىساندى ارالاپ كوردىك. ستاديون ارنايى مەملەكەتتىك قوردىڭ قاراجاتى ەسەبىنەن سالىندى. باس پروكۋراتۋرا زاڭسىز جولمەن يەمدەنىلگەن اكتيۆتەردى مەملەكەتكە قايتارۋ باعىتىندا جۇيەلى جۇمىس جۇرگىزىپ كەلەدى.
سپورت نىسانىنىڭ جالپى اۋدانى 18 مىڭ 951 شارشى مەتردى قۇرايدى. ستاديون UEFA-نىڭ 2-ساناتىنا ساي كەلەدى جانە 3 مىڭ 600 كورەرمەنگە ارنالعان. ستاديون UEFA مەن قازاقستان فۋتبول فەدەراتسياسىنىڭ ستاندارتتارىنا ساي كەلەتىن زاماناۋي سپورت جابدىقتارىمەن جانە جاساندى جابىنمەن قامتاماسىز ەتىلگەن.
نىساندا كورەرمەنگە ارنالعان تريبۋنالار، كونفەرەنتس-زال، كيىم اۋىستىراتىن بولمەلەر، مەديتسينالىق كابينەتتەر، اكىمشىلىك بلوك پەن تەحنيكالىق ايماقتار، سونداي-اق VIP-لوجالار قاراستىرىلعان.
سول سياقتى ستاديوندا جاتتىعۋ وتكىزىپ جاتقان بالالار-جاسوسپىرىمدەر سپورت مەكتەبىنىڭ تاربيەلەنۋشىلەرىمەن اڭگىمەلەستىك.
جوبانى ىسكە اسىرۋ ەلوردانىڭ سپورت ينفراقۇرىلىمىن دامىتۋعا جانە قالالىق ءارى رەسپۋبليكالىق دەڭگەيدەگى جارىستاردى وتكىزۋ ءۇشىن زاماناۋي جاعدايلار جاساۋعا باعىتتالعان.
قازىرگى ۋاقىتتا نىساندى پايدالانۋعا بەرۋ بويىنشا زاڭدىق جانە ۇيىمداستىرۋشىلىق راسىمدەر جۇرگىزىلىپ جاتىر. الداعى ۋاقىتتا ستاديون استانا قالاسى اكىمدىگىنىڭ «№8 وليمپيادالىق رەزەرۆتىڭ مامانداندىرىلعان بالالار-جاسوسپىرىمدەر سپورت مەكتەبى» كمم تەڭگەرىمىندە بولادى.
ستاديوننىڭ تولىقتاي اشىلۋى 4 ماۋسىمعا جوسپارلانىپ وتىر. ول 2013 جىلى تۋعان جاسوسپىرىمدەر اراسىندا بجسم مەن ورمبجسم كوماندالارى قاتىساتىن قازاقستان رەسپۋبليكاسىنىڭ جىل سايىنعى فۋتبول چەمپيوناتى اياسىندا وتەدى. چەمپيوناتقا ەلىمىزدىڭ ءتۇرلى وڭىرلەرىنەن مامانداندىرىلعان بالالار-جاسوسپىرىمدەر سپورت مەكتەپتەرى، وليمپيادالىق رەزەرۆ مەكتەپتەرى مەن فۋتبولشىلار دايارلاۋ ورتالىقتارى اتىنان ەڭ مىقتى 15 كوماندا قاتىسادى.
تۋرنير قازاقستانداعى بالالار-جاسوسپىرىمدەر فۋتبولى جۇيەسىندەگى ماڭىزدى رەسپۋبليكالىق جارىستاردىڭ ءبىرى بولىپ سانالادى جانە بۇقارالىق سپورتتى دامىتۋعا، بالالار مەن جاسوسپىرىمدەر اراسىندا فۋتبولدى ناسيحاتتاۋعا، سونداي-اق جاس سپورتشىلاردىڭ دايارلىق دەڭگەيىن ارتتىرۋعا باعىتتالعان»، – دەپ جازدى جەڭىس قاسىمبەك.