قازاقستاننىڭ فرانتسياداعى ەلشىلىگى جانە قىزىلوردا وبلىسى اكىمدىگىنىڭ، “Sumbe” كومپانياسىنىڭ قولداۋىمەن پاريجدەگى اتاقتى ديپلوماتيالىق زالداردىڭ ءبىرى – Cercle de l’Union Interalliée عيماراتىندا قىزىلوردا وبلىستىق فيلارمونياسىنىڭ كونتسەرتى ءوتتى. مادەني شارا ەۋروپاداعى وتانداستار مەن قانداستاردىڭ باسقوسۋى اياسىندا مادەني بايلانىستى نىعايتۋ جانە ۇلتتىق ونەر ارقىلى ۇلت بىرلىگىن دارىپتەۋدى نەگىز ەتتى.
سىر وڭىرىنەن ارنايى بارعان شىعارماشىلىق ۇجىم كورەمەنگە حالقىمىزدىڭ ءتول ونەرىن، ءداستۇرلى مۋزىكاسىن، كۇي مەن ءبيدىڭ وزىق ۇلگىلەرىن ۇسىندى. كەش شىمىلدىعى قۇرمانعازىنىڭ «بالبىراۋىن» كۇيىمەن اشىلىپ، قورقىت مۇراسى، حالىق اندەرى مەن اباي شىعارمالارى ورىندالىپ، كورەرمەننىڭ زور قوشەمەتىنە بولەندى.
كونتسەرتتى فرانتسياداعى شەتەلدىك ەلشىلىكتەردىڭ باسشىلارى مەن قىزمەتكەرلەرى، كورنەكتى تۇلعالارى، ەۋروپانىڭ بىرقاتار ەلدەرىندە تۇرىپ جاتقان قانداستارىمىز، سونداي-اق پاريج قالاسىنىڭ تۇرعىندارى تاماشالادى.
گاسترولدىك ساپارعا وبلىس اكىمىنىڭ ورىنباسارى ارداق زەبەشەۆ باستاعان سىر مادەنيەتى مەن ونەرىنىڭ ناسيحاتشىلارى، ونەر ۇجىمدارى مەن ارتىستەرىنەن قۇرالعان شىعارماشىلىق دەلەگاتسيا بارىپ قايتتى. كونتسەرتتە حالىق اسپاپتار ءانسامبلى، (كوركەمدىك جەتەكشىسى نۇرعيسا نۇرباي), قازاقستاننىڭ ەڭبەك سىڭىرگەن قايراتكەرى، پروفەسسور ءمۇسىلىم امزە (دومبىرا), كۇيشى بولات كۇزەمباەۆ (دومبىرا), ءداستۇرلى ورىنداۋشىلار، حالىقارالىق جانە رەسپۋبليكالىق كونكۋرستاردىڭ لاۋرەاتى بيسەنبەك تولەۋباەۆ، جانىبەك جاقسان، فيلارمونيا سوليستەرى، حالىقارالىق جانە رەسپۋبليكالىق كونكۋرستاردىڭ لاۋرەاتتارى گاۋحار بيسەكەنوۆا، ينديرا بايمبەتوۆا، جالىن ءجۇسىپوۆ، ولجاس نۇراليەۆ، نازىم تىلەۋلەسوۆا، الىشەر شوجەن، ارايلىم ماحانبەتجانوۆا جانە «Ai-Aru» زاماناۋي بي ءانسامبلى ونەر كورسەتتى.
عاسىرلار سىرىن ساقتاعان، ەيفەل مۇناراسى اسقاقتاعان، سەنا جاعاسىندا سان تاعدىر مەن سان ونەر توعىسقان عاجايىپ شاھاردىڭ تۇرعىندارى مەن قوناقتارى ۇلتتىق قولونەر تۋىندىلارىن تاماشالاپ، ۇلتتىق مۋزىكامىز مەن الەمدىك كلاسسيكانىڭ تانىمال شىعارمالارىن تىڭداۋعا مۇمكىندىك الدى. سىر بويىنىڭ ءتولتۋما ونەرىن، قازاق ۇلتتىق فولكلورىن جوعارى دەڭگەيدە ناسيحاتتاعان ونەر يەلەرى كورەرمەننىڭ زور ىقىلاسى مەن قۇرمەت-قوشەمەتىنە بولەندى.
كونتسەرت رەجيسسەرى – «ەرەن ەڭبەگى ءۇشىن» مەدالىنىڭ جانە «مادەنيەت سالاسىنىڭ ۇزدىگى» توسبەلگەسىنىڭ يەگەرى ازيزا ىزدىقۇلوۆا
قىزىلوردا وبلىسى اكىمىنىڭ ءباسپاسوز قىزمەتى