شارانىڭ ماقساتى – شەتەلدەگى ەتنيكالىق قازاق اقىن-جازۋشىلارىنىڭ شىعارماشىلىعىن قولداۋ، ولاردىڭ ەڭبەكتەرىن قالىڭ اۋديتورياعا تانىستىرۋ جانە قازاق مادەنيەتىنىڭ بىرەگەيلىگىن ساقتاپ، نىعايتۋ.
قر پارلامەنتى دەپۋتاتتارى، قوعام قايراتكەرلەرى، كىتاپ اۆتورلارى، قازاقستان جازۋشىلار وداعى مەن وتانداستار قورىنىڭ باسشىلىعى قاتىستى. شارا بارىسىندا شەتەلدەگى قازاق اقىن-جازۋشىلارىنىڭ شىعارماشىلىق ەڭبەكتەرى العاش رەت قازاق وقىرماندارىنا ۇسىنىلدى. كىتاپتار قازاق ادەبيەتىنىڭ بايلىعىن كورسەتىپ، شەتەلدەگى ەتنيكالىق قازاقتاردىڭ ۇلتتىق بىرەگەيلىگىن ساقتاۋعا باعىتتالعان.2024 جىلى بايقاۋ جەڭىمپازى اتانىپ، شىعارىلعان كىتاپتار:
«قوبدانىڭ قوڭىر جەلى» – رىسبەك زۇرعانبايۇلى (موڭعوليا).
«ۇركەر اۋىپ بارادى» – زۇلكاپىل ءماۋلىتۇلى (موڭعوليا).
«تاجىكستانداعى قازاقتار» – ابدۋساتتار نۋراليەۆ (تاجىكستان).
«اقيقاتتىڭ ءدامى اششى» – جاراسقان مىرزامۇراتوۆ (وزبەكستان).
«كىمدى كىنالارسىڭ…» – ەرباقىت ءنۇسىپۇلى (موڭعوليا).
«ۇرپاعىڭ ۇزىلمەسىن» – مۇحتاسىروۆ پيونەر سولتانوۆيچ (رەسەي).
«قاراسۋ جىرلارى» – لالا جۇنىسقىزى جۇمانوۆا (وزبەكستان).
«ورىكتى كول» – ەلەۋسىز مۇقاماديۇلى (موڭعوليا).
«ايتاعالى سالت اتتى» – بامان قۇرمانحانۇلى (موڭعوليا).
«ۇلى دالا» جوباسى شەتەلدەگى قازاقتاردىڭ مادەني جانە ادەبي مۇرالارىن زەرتتەۋدى، جيناقتاۋدى، باسىپ شىعارۋدى جانە كوپشىلىككە تاراتۋدى ماقسات ەتەدى. شەتەلدەگى قازاقتاردىڭ شىعارماشىلىق ەڭبەكتەرى قازاقستاندا كەڭىنەن تانىلىپ، ولاردىڭ مادەني مۇراسى ناسيحاتتالادى. قازاق ادەبيەتى جاڭا شىعارمالارمەن تولىعىپ، ۇلتتىق بىرەگەيلىك نىعايتىلادى. جاس ۇرپاق قازاقتىڭ مادەني جانە ادەبي قۇندىلىقتارىنا تەرەڭ قىزىعۋشىلىق تانىتۋعا مۇمكىندىك الادى.
قر سىرتقى ىستەر مينيسترلىگىنە قاراستى «وتانداستار قورى» كەاق مەن قازاقستان جازۋشىلار وداعى بيىل دا شەتەلدەگى قازاقتاردىڭ شىعارماشىلىق ەڭبەكتەرىن جيناقتاپ، ناسيحاتتاۋدى جالعاستىراتىنىن اتاپ ءوتتى. «ۇلى دالا – 2025» حالىقارالىق بايقاۋىنا ءوتىنىم قابىلداۋ باستالدى.