قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ «سامۇرىق-قازىنا» اق ديرەكتورلار كەڭەسىنىڭ وتىرىسىن وتكىزدى. وندا قور قىزمەتىنىڭ نەگىزگى ناتيجەلەرى، ونىڭ ىشىندە وندىرىستىك جانە قارجىلىق كورسەتكىشتەر، سونداي-اق وتاندىق تاۋار وندىرۋشىلەردى قولداۋ ماسەلەلەرى قارالدى.
«سامۇرىق-قازىنا» اق باسقارما توراعاسى نۇرلان جاقىپوۆ 2026 جىلعى قاڭتار-شىلدە ايلارىنىڭ قورىتىندىسى بويىنشا قوردىڭ كىرىسى 12,5 ترلن تەڭگەنى قۇراپ، جوسپارلى كورسەتكىشتەن 5%-عا اسقانىن باياندادى. سونداي-اق EBITDA – 3,4 ترلن تەڭگە بولدى، بۇل جوسپاردان 7%-عا جوعارى، تازا پايدا 1,2 ترلن تەڭگەنى قۇراپ، جوسپارلى كورسەتكىشتەن 4%-عا ارتقان.
ساتىپ الۋلار ارقىلى وتاندىق تاۋار وندىرۋشىلەردى قولداۋ جانە وتاندىق ءوندىرىستى دامىتۋ شەڭبەرىندە توپ كومپانيالارى جىل باسىنان بەرى جەرگىلىكتى تاۋار وندىرۋشىلەرمەن 694 ملرد تەڭگەگە كەلىسىمشارتتار جاسادى. بۇل وتكەن جىلدىڭ سايكەس كەزەڭىمەن سالىستىرعاندا 32%-عا كوپ. ساتىپ الۋ جۇيەسىندە وتاندىق وندىرۋشىلەردى قولداۋدىڭ 16-دان استام شاراسى قولدانىلادى. ونىڭ ىشىندە قازاقستاندىق تاۋارلارعا باسىمدىق بەرۋ، ۇزاقمەرزىمدى شارتتار جاساسۋ، 30% مولشەرىندە مىندەتتى اۆانس بەرۋ جانە جەدەل تولەم جۇرگىزۋ تەتىكتەرى بار. 2026 جىلعى قاڭتار-شىلدە ايلارىندا 52,8 ملرد تەڭگەگە وفتەيك-كەلىسىمشارتتار جاسالدى. عىلىم مەن يننوۆاتسيالاردى دامىتۋ بولىگىندە عىلىمي-زەرتتەۋ جانە تاجىريبەلىك-كونسترۋكتورلىق جۇمىستار پورتفەلى 13,9 ملرد تەڭگە سوماسىنداعى 55 جوبانى قامتيدى، ونىڭ ىشىندە 7 جوبا اياقتالدى.
ولجاس بەكتەنوۆ ينۆەستيتسيالىق جوبالاردى ۋاقتىلى جۇزەگە اسىرۋ جانە توپتىڭ ساتىپ الۋ جۇيەسىن ودان ءارى جەتىلدىرۋ جونىندە بىرقاتار تاپسىرما بەردى.