مەملەكەت باسشىسىنىڭ ەكونوميكانىڭ باسىم سالالارىنا ءىرى ينۆەستيتسيالىق جوبالاردى ەنگىزۋ جونىندەگى تاپسىرمالارىن جۇزەگە اسىرۋ بارىسى تۋرالى قور باسقارما توراعاسى نۇرلان جاقىپوۆتىڭ بايانداماسى تىڭدالدى. قوردىڭ نەگىزگى قارجىلىق، وندىرىستىك كورسەتكىشتەرىنە جانە ساتىپ الۋ پروتسەسىن جەتىلدىرۋ بويىنشا جۇرگىزىلىپ جاتقان جۇمىستارعا نازار اۋدارىلدى.
«سامۇرىق-قازىنا» باسشىسى ديرەكتورلار كەڭەسىنە مۇناي-گاز، مۇناي حيمياسى، ەنەرگەتيكا، كولىك-لوگيستيكا، تاۋ-كەن جانە باسقا دا سالالارداعى ينۆەستيتسيالىق 46 جوبانى جۇزەگە اسىرۋ تۋرالى ايتتى. بيىلعى 4 ايدا ولار بويىنشا قارجىنىڭ يگەرىلۋى 98%-دى قۇرادى.
وسى جىلى جالپى قۇنى 355 ملرد تەڭگەگە جۋىق 5 جوبا پايدالانۋعا بەرىلدى.
اقتاۋ پورتىندا كونتەينەرلىك حاب ىسكە قوسىلدى. نىسان تەمىرجول قۇرامدارىن قابىلداۋعا، جۇكتەردى وڭدەۋ جانە ولاردى تەڭىز كولىگى ارقىلى ءارى قاراي جونەلتۋگە قاۋقارلى. كاسپي تەڭىزى سۋ ايماعىنداعى ەڭ ءىرى كونتەينەرلىك حاب جۇك تاسىمالداۋ كولەمىن ارتتىرىپ، قازاقستاننىڭ حالىقارالىق باعىتتارداعى ۇستانىمىن نىعايتۋعا مۇمكىندىك بەرەدى.
الماتىدا جوبالىق قۋاتى 115 مىڭ جفە (جيىرما فۋتتىق كونتەينەرلەر) Zhetysu حالىقارالىق لوگيستيكالىق تەرمينالى پايدالانۋعا بەرىلدى. سيان پورتىمەن (قحر) بىرلەسىپ ىسكە اسىرىلعان جوبا قازاقستاننىڭ قىتايمەن جانە ەۋروپا ەلدەرىمەن كولىك بايلانىسىن نىعايتادى.
اقتاۋداعى CASPI BITUM زاۋىتىن جاڭعىرتۋ جۇمىستارى اياقتال، قۋاتتىلىعىن جىلىنا 750 مىڭ تونناعا دەيىن، 50%-عا ارتتىردى.
الماتىدا 350 توسەك-ورىنعا ارنالعان ينفەكتسيالىق اۋرۋلاردىڭ جوعارى تەحنولوگيالىق عىلىمي ورتالىعى سالىندى.
كەندىرلىدە سۋ تۇششىتۋ زاۋىتىنىڭ قۇرىلىسى اياقتالۋعا جاقىن، نىساندا ىسكە قوسۋ-باپتاۋ جۇمىستارى جانە جابدىقتاردى جۇمىسقا دايىنداۋ جۇرگىزىلۋدە.
بۇدان باسقا، جەتىسۋ وبلىسىندا ۇزىندىعى 302,4 كم «تالدىقورعان – ءۇشارال» ماگيسترالدى گاز قۇبىرىنىڭ جەلىلىك بولىگىنىڭ قۇرىلىسى كەستەدەن وزىپ اياقتالىپ، پوليەتيلەن جانە «بەينەۋ – بوزوي – شىمكەنت» ماگيسترالدى گاز قۇبىرىنىڭ ەكىنشى جەلىسىن وندىرۋگە ارنالعان گاز ءبولۋ كەشەنىنىڭ جوبالارى بويىنشا ەرتە قۇرىلىس جۇمىستارى باستالدى.
پرەمەر-مينيستر ولجاس بەكتەنوۆ "سامۇرىق-قازىنا" باسشىلىعى مەن جاۋاپتى مينيسترلىكتەرگە ينۆەستيتسيالىق جوبالاردىڭ ۋاقتىلى ىسكە اسىرىلۋىن جانە وتاندىق تاۋار وندىرۋشىلەردى قولداۋ تەتىكتەرىن ودان ءارى جەتىلدىرۋدى قامتاماسىز ەتۋدى تاپسىردى.