قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ Mitsui O.S.K. Lines كومپانياسى ديرەكتورلار كەڭەسىنىڭ توراعاسى تاكەشي حاشيموتو باستاعان Keidanren جاپونيا بيزنەس فەدەراتسياسىنىڭ دەلەگاتسياسىمەن كەزدەسۋ وتكىزدى.
وندا پرەزيدەنت قاسىم-جومارت توقاەۆتىڭ 2025 جىلدىڭ جەلتوقسانىنداعى جاپونياعا رەسمي ساپارى كەزىندە قول جەتكىزىلگەن ۋاعدالاستىقتاردى دامىتۋعا قاتىستى ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرى تالقىلاندى. ساپار بارىسىندا $3,7 ملرد-تان استام سوماعا 47 ەكىجاقتى كوممەرتسيالىق قۇجاتقا قول قويىلعان بولاتىن.
ولجاس بەكتەنوۆ جاپونيا قازاقستاننىڭ شىعىس ازياداعى نەگىزگى ساۋدا-ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. وتكەن جىلدىڭ قورىتىندىسى بويىنشا ەكىجاقتى تاۋار اينالىمى $1,7 ملرد-تان استى. ەلىمىزدە جاپون كاپيتالى قاتىساتىن 68 كاسىپورىن بار. قازاقستاندىق نارىقتا INPEX, Marubeni, Sumitomo, Mitsui جانە تاعى دا باسقا كومپانيالار تابىستى جۇمىس ىستەۋدە.
قازاقستان وزىق تەحنولوگيالىق ەلدەردىڭ ءبىرى رەتىندە جاپونيامەن جان-جاقتى ىنتىماقتاستىقتى كەڭەيتۋگە مۇددەلى. قر ۇكىمەتىنىڭ جاپون ارىپتەستەردىڭ قاتىسۋىمەن جاڭا سەرپىندى جوبالاردى جۇزەگە اسىرۋعا، كاپيتال تارتۋعا، وزىق تەحنولوگيالاردى الۋعا جانە وندىرىستەردى لوكاليزاتسيالاۋعا قاجەتتى قولداۋ كورسەتۋگە دايىن ەكەندىگى اتاپ ءوتىلدى.
«مەملەكەت باسشىسى قاسىم-جومارت توقاەۆتىڭ باسشىلىعىمەن ەلىمىز اۋقىمدى ساياسي جانە ەكونوميكالىق وزگەرىستەر كەزەڭىنە اياق باستى. جالپىۇلتتىق رەفەرەندۋمدا قابىلدانعان كونستيتۋتسيا سىندارلى حالىقارالىق ارىپتەستىككە اشىق ادىلەتتى ءارى وزىق قازاقستاندى قۇرۋ باعىتىن بەكىتتى. بۇل تۇرعىدا جاپونيامەن ءوزارا ءىس-قيمىل ءبىز ءۇشىن ەرەكشە ماڭىزعا يە. ءبىز ساۋدا مەن ينۆەستيتسيالاردى كەڭەيتۋگە عانا ەمەس، سونىمەن قاتار ەكونوميكاعا جاڭا تەحنولوگيالار، زاماناۋي وندىرىستەر مەن ۇزاق مەرزىمدى قۇزىرەتتەر اكەلەتىن بىرلەسكەن جوبالاردى ىسكە قوسۋعا مۇددەلىمىز»، — دەپ اتاپ ءوتتى ولجاس بەكتەنوۆ.
ءوز كەزەگىندە Mitsui O.S.K. Lines كومپانياسى ديرەكتورلار كەڭەسىنىڭ توراعاسى تاكەشي حاشيموتو جاپونيا مەن قازاقستان اراسىنداعى ىنتىماقتاستىقتى كەڭەيتۋگە مول الەۋەت بار ەكەنىن اتاپ ءوتتى.
«قازاقستانداعى تسيفرلىق ترانسفورماتسيانىڭ دامۋ قارقىنى ەرەكشە اسەر قالدىرۋدا. قازاقستان – بۇل باعىتتا تابىستى ىلگەرىلەپ كەلە جاتقان جاس مەملەكەت. مۇندا تسيفرلاندىرۋدى دامىتۋعا ۇلەس قوسىپ جۇرگەن جاستار وتە كوپ. ءبىز ادامي كاپيتالدى دامىتۋ، ونىڭ ىشىندە IT جانە تسيفرلىق ترانسفورماتسيا سالالارى ءۇشىن جوعارى بىلىكتى كادرلار دايارلاۋ باعىتىندا قازاقستانمەن ىنتىماقتاستىقتى جالعاستىرۋعا مۇددەلىمىز. جاپون كومپانيالارىنىڭ ۇزاقمەرزىمدى ينفراقۇرىلىمدىق جوبالاردى جۇزەگە اسىرۋدا مول تاجىريبەسى بار. ءبىز تسيفرلىق جانە لوگيستيكالىق ينفراقۇرىلىمدى دامىتۋدا، سونداي-اق «جاسىل» تەحنولوگيالار سالاسىندا ىنتىماقتاستىقتى كەڭەيتۋدىڭ زور الەۋەتىن كورىپ وتىرمىز. «جاپونيا تاۋ-كەن ونەركاسىبى ءۇشىن ەكولوگيالىق قاۋىپسىز شەشىمدەردى ۇسىنۋعا جانە قازاقستان ەكونوميكاسىنىڭ تۇراقتى دامۋىنا ءوز ۇلەسىن قوسۋعا دايىن»، – دەپ اتاپ ءوتتى تاكەشي حاشيموتو.
كەزدەسۋ بارىسىندا ورتا ءدالىزدى جانە كاسپي تەڭىزىنىڭ پورتتىق ينفراقۇرىلىمىن دامىتۋ، كولىك-لوگيستيكا سالاسى، ەنەرگەتيكا، تسيفرلاندىرۋ مەن جاساندى ينتەللەكت، سونداي-اق ونەركاسىپتىك كووپەراتسيا باعىتتارىنداعى ىنتىماقتاستىقتى ودان ءارى كەڭەيتۋدىڭ الەۋەتى اتاپ ءوتىلدى. قازاقستان جاپوندىق بيزنەستىڭ قاتىسۋىمەن تەحنولوگيالار ترانسفەرىنە، ءوندىرىستى لوكاليزاتسيالاۋعا جانە ەكونوميكالىق ءوسۋدىڭ جاڭا نۇكتەلەرىن قۇرۋعا باعىتتالعان بىرلەسكەن جوبالاردى جۇزەگە اسىرۋعا مۇددەلى.
انىقتاما: Keidanren – جاپونيانىڭ ىسكەر توپتارىنىڭ ەڭ ءىرى جانە ىقپالدى بىرلەستىگى. فەدەراتسياعا 1574 كومپانيا، 106 سالالىق قاۋىمداستىق جانە 47 ايماقتىق ەكونوميكالىق ۇيىم كىرەدى.
ۇكىمەتتىڭ ءباسپاسوز قىزمەتى