پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ جامبىل وبلىسىنا جۇمىس ساپارى اياسىندا حيميا ونەركاسىبىندەگى ءىرى ينۆەستيتسيالىق جوبالاردىڭ جۇزەگە اسىرىلۋ بارىسىمەن تانىستى. ءوڭىر باسشىسى ەربول قاراشوكەەۆپەن بىرگە جۇمىس ىستەپ تۇرعان كاسىپورىنداردى، سالىنىپ جاتقان ءوندىرىس ورىندارىن ارالادى.
پرەزيدەنت قاسىم-جومارت توقاەۆتىڭ جاڭا ەكونوميكالىق مودەلگە كوشۋ بويىنشا قويعان مىندەتتەرىن جۇزەگە اسىرۋ ءۇشىن ەنەرگەتيكالىق، ينجەنەرلىك جانە كولىك-لوگيستيكالىق ينفراقۇرىلىمدى كەشەندى تۇردە دامىتۋعا ەرەكشە نازار اۋدارىلادى. بۇل باعىت – ۇكىمەت جۇمىسىنداعى باستى باعىتتاردىڭ ءبىرى.
جۇمىس ساپارى ەلىمىزدەگى حيميا ونەركاسىبىنىڭ جەتەكشى كاسىپورىندارىنىڭ ءبىرى – «قازفوسفات» جشس-دان باستالدى. كاسىپورىن 2026 جىلدىڭ قاڭتار-ءساۋىر ايلارىندا 64,2 ملرد تەڭگەنىڭ 246,1 مىڭ توننا ءونىمىن وندىرگەن.
«قازاقمىس حولدينگ» جشس ديرەكتورلار كەڭەسىنىڭ توراعاسى ەدۋارد وگايدىڭ ايتۋىنشا، «قازفوسفات» جشس مينەرالدى تىڭايتقىشتارمەن وتاندىق اگروونەركاسىپ كەشەنىن قامتاماسىز ەتىپ قانا قويمايدى، رەسەي، بەلارۋس، تۇرىكمەنستان، ليتۆا، لاتۆيا، پولشا جانە باسقا دا ەلدەردىڭ نارىعىنا ەكسپورتتايدى.
ۇكىمەت باسشىسىنىڭ ءبىرىنشى ورىنباسارى سارىسۋ اۋدانىنداعى Qazaq Soda كالتسيلەندىرىلگەن سودا زاۋىتىنىڭ قۇرىلىسى مىسالىندا ونەركاسىپ سالاسىنداعى ينۆەستيتسيالىق ىنتىماقتاستىقتىڭ جاڭا باعىتتارىمەن دە تانىستى.
جوبانىڭ ءبىرىنشى كەزەڭىندە زاۋىتتىڭ وندىرىستىك قۋاتى جىلىنا 500 مىڭ تونناعا جەتسە، كەيىن 1 ملن تونناعا دەيىن ۇلعايتىلادى. قۇرىلىس كەزىندە 1 500 ۋاقىتشا جۇمىس ورنى اشىلىپ، ىسكە قوسىلعاننان كەيىن 375 ادام تۇراقتى جۇمىسپەن قامتىلادى. زاۋىت قازاقستاننىڭ كالتسيلەندىرىلگەن سوداعا دەگەن ىشكى سۇرانىسىن تولىق قامتاماسىز ەتەدى.
ءبىرىنشى كەزەڭدى 2026 جىلدىڭ ءتورتىنشى توقسانىندا اياقتاۋ جوسپارلانعان. YILDIRIM Holding كومپانياسىنىڭ اتقارۋشى ديرەكتورى يسمايل دجەيلان مەملەكەتتىك قولداۋ اياسىندا وندىرىستىك الاڭعا گاز جانە ەلەكترمەن جابدىقتاۋ جەلىلەرى، تەمىرجول تارماعى مەن سۋ جۇيەسى تارتىلىپ جاتقانىن جەتكىزدى.
جۇمىس ساپارى سارىسۋ اۋدانىنداعى جالپى قۇنى 500 ملرد تەڭگەنى قۇرايتىن، ەلىمىزدىڭ حيميا سالاسىنداعى ەڭ ءىرى ينۆەستيتسيالىق جوبالاردىڭ ءبىرى جۇزەگە اسىرىلىپ جاتقان «ەۋروحيم-قاراتاۋ» جشس-دا جالعاستى.
مۇندا العاشقى كەزەڭدە جىلىنا 800 مىڭ توننا كۇكىرت قىشقىلىن ءوندىرۋ جولعا قويىلعان. ەكىنشى كەزەڭدە جىلىنا 1 ملن تونناعا دەيىن مينەرالدى تىڭايتقىش شىعاراتىن ءوندىرىستى ىسكە قوسۋ كوزدەلگەن جانە ونى اياقتاۋ 2027 جىلدىڭ ءبىرىنشى توقسانىنا جوسپارلانعان. كاسىپورىن تولىق وندىرىستىك قۋاتىنا شىققان كەزدە 1 200 تۇراقتى جۇمىس ورنى اشىلادى. ال قۇرىلىس كەزەڭىندە مۇندا 2 مىڭعا دەيىن ادام ەڭبەك ەتۋدە.
نىسانداردى ارالاعان سوڭ مەملەكەتتىك قولداۋ مەن ينۆەستيتسيا تارتۋ ناقتى ەكونوميكالىق ناتيجەگە ۇلاسۋى ءتيىس ەكەنى اتاپ ءوتىلدى. بۇل – جاڭا وندىرىستەردى ىسكە قوسۋ، تۇراقتى جۇمىس ورىندارىن اشۋ، ەكسپورتتىق الەۋەتتى كەڭەيتۋ جانە ەلدىڭ ونەركاسىپتىك نەگىزىن نىعايتۋ. وسى ورايدا جاۋاپتى مەملەكەتتىك ورگاندار مەن جامبىل وبلىسىنىڭ اكىمدىگىنە ينۆەستيتسيالىق جوبالاردى تۇراقتى سۇيەمەلدەۋ، تۋىندايتىن ماسەلەلەردى جەدەل شەشۋ تاپسىرىلدى.
ودان ءارى قاراي تۇرعىن ءۇي قۇرىلىسى، ەنەرگەتيكا جانە كولىك ينفراقۇرىلىمى سالالارىنداعى جوبالاردىڭ ورىندالۋ بارىسىن تەكسەردى.
تاراز قالاسىنداعى «بالاۋسا» جاڭا شاعىن اۋدانىندا 145 تۇرعىن ءۇي، ەكى مەكتەپ، ءۇش بالاباقشا، ونكولوگيالىق ديسپانسەر، كوپبەيىندى اۋرۋحانا، ليتسەي-ينتەرنات، نەكە سارايى، يننوۆاتسيالىق شىعارماشىلىق ورتالىق جانە دەنە شىنىقتىرۋ-ساۋىقتىرۋ كەشەنىن سالۋ كوزدەلگەن.
جاڭا شاعىن اۋدان بىرىڭعاي ساۋلەتتىك تۇجىرىمداما نەگىزىندە سالىنىپ، زاماناۋي تۇرعىن ۇيلەرمەن قاتار، قاجەتتى ينجەنەرلىك ينفراقۇرىلىممەن تولىق قامتاماسىز ەتىلەدى.
الداعى جىلىتۋ ماۋسىمىنا دايىندىققا ەرەكشە نازار اۋدارىلدى. «تارازەنەرگوورتالىق» اق-نىڭ №4 جىلۋ ەلەكتر ورتالىعىنداعى (جەو-4) جوندەۋ، جابدىقتاردى، 1,4 شاقىرىمدىق م-3 ماگيسترالدىق جىلۋ جەلىسىن قايتا جاڭعىرتۋ جۇمىستارىنىڭ بارىسىن كوردى.
سونىمەن قاتار اباي داڭعىلىنىڭ تەمىرجول ۇستىنەن وتەتىن جول جانە جاياۋ جۇرگىنشىلەر وتكەلى قاراستىرىلعان جاڭا ۋچاسكەسى قۇرىلىسىمەن، تاراز تەمىرجول ۆوكزالىن قايتا جاڭعىرتۋ جۇمىستارىمەن تانىستى. بارلىق جوبا بەلگىلەنگەن مەرزىمدە ءارى ساپا تالاپتارىنا ساي اياقتالۋى ءتيىس ەكەنىن اتاپ ءوتتى. جاۋاپتى مەملەكەتتىك جانە جەرگىلىكتى اتقارۋشى ورگاندارعا ەنەرگەتيكا نىساندارىن جىلىتۋ ماۋسىمىنا ساپالى دايىنداۋعا، جىلۋمەن قامتۋ جۇيەسىنىڭ سەنىمدىلىگىن قامتاماسىز ەتۋگە جانە الەۋمەتتىك ماڭىزى بار ينفراقۇرىلىمدىق جوبالاردىڭ قۇرىلىسىن ۋاقىتىلى اياقتاۋعا ەرەكشە نازار اۋدارۋ تاپسىرىلدى.