قما استانا قالاسى بويىنشا دەپارتامەنتى اسا ءىرى كولەمدەگى الاياقتىق فاكتىسى بويىنشا بىرنەشە قۇرىلىس كومپانياسىنىڭ باسشىسى ءمولدىر سۋيۋنشاليگە قاتىستى تەرگەپ-تەكسەرۋ جۇرگىزۋدە.
تەرگەۋ امالدارىنا ساي، 2021–2024 جىلدار ارالىعىندا ءمولدىر سۋيۋنشالي «Nura Elite» كوتتەدج قالاشىعىن سالۋ سىلتاۋىمەن ازاماتتاردان قاراجات تارتقان.
جوبا اياسىندا 37 كوتتەدج جانە 24 تاۋنحاۋس سالۋ كوزدەلگەن. الايدا بۇگىنگى كۇنى تاۋنحاۋستار تولىق اياقتالماعان (تەك قاڭقالارى عانا تۇر), 2023 جىلدىڭ 4-توقسانىنا دەيىن اياقتاۋ جونىندەگى مىندەتتەمەلەر ورىندالماعان.
ساتىپ الۋشىلارمەن الدىن الا ساتىپ الۋ-ساتۋ شارتتارى جاسالعان.
ناتيجەسىندە 56 ادام جابىرلەنۋشى رەتىندە تانىلىپ، تارتىلعان قاراجاتتىڭ جالپى سوماسى 3,9 ملرد تەڭگەنى قۇراعان.
ونىڭ ىشىندە 322 ملن تەڭگە ءمولدىر سۋيۋنشالي، جۇبايىنىڭ جانە اناسىنىڭ ەسەپشوتتارىنا اۋدارىلعان، سونداي-اق 145 ملن تەڭگە قولما-قول اقشاعا اينالدىرىلعان.
سونداي-اق ءبىر جىلجىمايتىن مۇلىكتى بىرنەشە رەت ساتۋ فاكتىسى انىقتالعان. ماسەلەن، جابىرلەنۋشى تولىق تولەگەن كوتتەدجدىڭ ءبىرى كۇدىكتى تاراپىنان جەكە مىندەتتەمەلەرى بويىنشا كەپىلگە قويىلىپ، كەيىن ءۇشىنشى تۇلعالاردىڭ اتىنا راسىمدەلىپ، بىرنەشە رەت قايتا ساتىلعان.
سۋيۋنشالي ءمولدىر ساتىپ الۋشىلارمەن ءىس جۇزىندە جەر ۋچاسكەلەرىنە قۇقىق بەرۋدى كوزدەيتىن شارتتار جاساسقان، الايدا ولاردى يەلىكتەن شىعارۋعا زاڭدى قۇقىعى بولماعان.
ۇلەسكەرلەردىڭ قاراجاتىنىڭ ءبىر بولىگى استانا قالاسىندا «اسىلحان» تۇرعىن ءۇي كەشەنىن سالۋعا ارنالعان جەر تەلىمىن ساتىپ الۋعا جۇمسالعان.
سونىمەن قاتار، قۇرىلىسقا قاجەتتى رۇقسات قۇجاتتارى بولماعانىنا قاراماستان، ول پەريزات قايراتتىڭ «ءبىز بىرگەمىز» قايىرىمدىلىق قورى ارقىلى بۇقارالىق اقپارات قۇرالدارىندا مۇقتاج ايەلگە پاتەر بەرىلەتىنى تۋرالى مالىمدەگەن.
الايدا ءىس جۇزىندە تۇرعىن ءۇي كەشەنىنىڭ قۇرىلىسى باستالماعان.
سوتتىڭ سانكتسياسىمەن وعان ۇيقاماق تۇرىندەگى بۇلتارتپاۋ شاراسى قولدانىلدى.
تەرگەۋ جالعاسۋدا.
قازاقستان رەسپۋبليكاسىنىڭ قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريالاۋعا جاتپايدى.
قازاقستان رەسپۋبليكاسى كونستيتۋتسياسىنىڭ 77-بابى 3-تارماعىنىڭ 1) تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، ادامنىڭ كىناسى زاڭدى كۇشىنە ەنگەن سوت ۇكىمىمەن دالەلدەنگەنگە دەيىن ول كىناسىز دەپ ەسەپتەلەدى.
قر قما ءباسپاسوز قىزمەتى