ورتاعا شىعىپ، ءسوز العانداردىڭ ىشىندە قىزىلوردا وبلىسىنىڭ اكىمى نۇرلىبەك نالىباەۆ تا بولدى. نۇرلىبەك ماشبەكۇلىنىڭ بايانداماسىندا مەملەكەت باسشىسىنىڭ تاپسىرماسىمەن وڭىردە اتقارىلىپ جاتقان ىرگەلى ىستەر، ۇكىمەتتىك جوبالار مەن مەملەكەتتىك باعدارلامالار جۇيەلى قامتىلعان. اكىم بايانداعان باستى جۇمىستاردىڭ ءبىر سىپىراسىن بايانداساق.
وبلىستاعى قۇرىلىس قارقىنى جوعارى
قىزىلوردا وبلىسىندا قۇرىلىس جۇمىستارى رەسپۋبليكالىق ورتا كورسەتكىشتەن 41 پايىزعا جوعارى دەڭگەيدە جۇزەگە اسىرىلۋدا. بۇل تۋرالى مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا وبلىس اكىمى نۇرلىبەك نالىباەۆ ءمالىم ەتتى.
تۇرعىن ءۇي كەزەگىندەگى ازاماتتارعا 2 500-دەن استام پاتەر تابىستالدى. ايماقتا جاڭا الەۋمەتتىك نىساندار بوي كوتەرۋدە. 2024 جىلى 69 جاڭا عيمارات سالىنىپ، بۇگىندە 25 ءبىلىم، 16 دەنساۋلىق ساقتاۋ، 11 مادەنيەت، 17 سپورت نىسانى ەل يگىلىگىنە قىزمەت ەتۋدە. «جايلى مەكتەپ» ۇلتتىق جوباسى اياسىندا 21 مەكتەپ سالۋ جوسپارلانعان. بۇگىندە 5 ءبىلىم ورداسى پايدالانۋعا بەرىلدى، 5 مەكتەپ جاڭا وقۋ جىلىنا دەيىن تابىستالادى. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 28 نىسان سالىندى.
وبلىستىڭ بارلىق اۋىلىنداعى دەنساۋلىق ساقتاۋ مەكەمەلەرىنە 245 جاڭا سانيتارلىق كولىك الىنىپ، جەدەل جاردەم ماسەلەسى تولىق شەشىلدى. مەملەكەت باسشىسىنىڭ باستاماسىمەن قۇرىلعان «قازاقستان حالقىنا» قورى ءوڭىردىڭ دەنساۋلىق ساقتاۋ سالاسىن دامىتۋعا 4 ملرد. تەڭگە قارجى ءبولدى. بۇل قارجىعا ارال، جاڭاقورعان اۋداندارى مەن قىزىلوردا قالاسىندا «قامقورلىق» وڭالتۋ ورتالىقتارى اشىلدى. مۇنان بولەك، قوردىڭ 1 ملرد. 100 ملن. تەڭگە قارجىسىنا سكرينينگ جۇرگىزۋگە ارنالعان جىلجىمالى كەشەن الىنىپ، اۋىل تۇرعىندارىنا ۇزدىكسىز مەديتسينالىق قىزمەت كورسەتۋدە.
جەرگىلىكتى كاسىپكەرلەردىڭ دەمەۋشىلىگىمەن 50 ملرد. تەڭگەگە جۋىق قارجىعا وبلىس ورتالىعى مەن اۋدانداردا جاڭا عيماراتتار، پاركتەر، ويىن الاڭدارى سالىنىپ، مەملەكەت تەڭگەرىمىنە ءوتتى.
«اۋىل اماناتى» جوباسى اياسىندا اۋقىمدى جۇمىستار اتقارىلۋدا
قىزىلوردا وبلىسىندا «اۋىل اماناتى» جوباسى اياسىندا سوڭعى ەكى جىلدا 601 جوبا (4,3 ملرد.تەڭگە) جۇزەگە اسىرىلىپ، 917 جاڭا جۇمىس ورنى اشىلدى. بيىل 815 جوبانى (5,5 ملرد. تەڭگەگە) ىسكە قوسىپ،1 مىڭنان استام (1060) جۇمىس ورنىن اشۋ جوسپارلانعان. بۇل تۋرالى مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا وبلىس اكىمى نۇرلىبەك نالىباەۆ اتاپ ءوتتى.
وسى باعىتتا شاعىن ءوندىرىس ورتالىقتارىن قۇرۋعا باسىمدىق بەرىلۋدە. شارۋاشىلىق قۇرىلىمدارىنىڭ الەۋمەتتىك جاۋاپكەرشىلىگى شەڭبەرىندە كاسىبىن باستاۋشىلاردى عيماراتپەن، كەپىلدىكپەن قامتاماسىز ەتۋ تاجىريبەسى ەنگىزىلدى.
ەسكە سالايىق، وتكەن جىلى «وڭىرلىك جۇمىسپەن قامتۋ كارتاسى» اياسىندا 49 مىڭنان استام ادام جۇمىسپەن قامتىلدى.
«جۇمىسشى ماماندىقتارى جىلى» اياسىندا بيىل اگرو-يندۋستريالىق جوبالارعا قاجەت ماماندار دايارلاۋ ءۇشىن مەملەكەتتىك تاپسىرىس سانى 5 308 ورىنعا دەيىن ۇلعايتىلدى. راسىندا، "اۋىل اماناتى" بويىنشا وزگە وڭىرلەر ءالى دە قولعا الا قويماعان تىرلىكتەر، قىزىلوردا وبلىسىندا وسىدان كوپ ۋاقىت بۇرىن قولعا الىندى. ناتيجەسىندە، رەسپۋبليكالىق كورسەتكىشكە كوز جۇگىرتسەك، ءوڭىردىڭ كوش ىلگەرى ەكەنىن بايقايمىز.
سۋ ۇنەمدەۋ تەحنولوگيالارى كەڭىنەن قولدانىلۋدا
مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا وبلىس اكىمى نۇرلىبەك نالىباەۆ وتكەن جىلى سىر ەلىندە سۋ ۇنەمدەۋ تەحنولوگيالارىن كەڭىنەن قولدانۋ ارقىلى اۋىل شارۋاشىلىعى داقىلدارىنان مول ءونىم الىنعانىن ايتتى. ەسكە سالايىق، بىلتىر ايماقتا جارتى ميلليون تونناعا جۋىق كۇرىش (گەكتارىنا 58 تسەنتنەردەن، 496,4 مىڭ توننا) ءوندىرىلدى.
اۋىل شارۋاشىلىعى سالاسىنا تارتىلعان ينۆەستيتسيا 2023 جىلمەن سالىستىرعاندا 32 پايىزعا ارتتى. 2025-2029 جىلدارى 57 ملرد. تەڭگەگە 29 جاڭا جوبا جۇزەگە اسىرىلادى (488 جاڭا جۇمىس ورنى).
ايتا كەتەيىك، مەملەكەت باسشىسىنىڭ قولداۋىمەن مەملەكەتارالىق كەلىسىمدەر ناتيجەسىندە سوڭعى 2 جىلدا ارال تەڭىزىندەگى سۋ كولەمى 4 ملرد. تەكشە مەترگە دەيىن ارتتى (2022 جىلى – 18,5 ملرد. تەكشە مەتر، 2024 جىلى – 22,3 ملرد. تەكشە مەتر، سات كولەمى – 27 ملرد. تەكشە مەتر). بۇل بالىق شارۋاشىلىعىنىڭ دامۋىنا، ەكولوگيالىق احۋالدىڭ جاقسارۋىنا وڭ سەپتىگىن تيگىزۋدە. باياندامانىڭ مازمۇنىن ىشتەي ۇقققان مەملەكەت باسشىسى قاسىم-جومارت توقاەۆ ءوڭىر اكىمىنە سۋدى ۇنەمدەۋدىڭ ەكو جۇيەسىن ءتيىمدى پايدالانۋدا ۇلكەن ءىس تىندىرعانىن اتاپ ءوتتى.
قىزىلوردادا اۋقىمدى ينۆەستيتسيالىق جوبالار جۇزەگە اسىرىلۋدا
مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا وبلىس اكىمى نۇرلىبەك نالىباەۆ بايانداما جاساپ، وڭىردەگى ينۆەستيتسيالىق جوبالار تۋرالى ايتتى.
ەكونوميكانى ءارتاراپتاندىرۋدا 2024 جىلى ايماقتا 37 ملرد. تەڭگەنىڭ 21 ينۆەستيتسيالىق جوباسى ىسكە قوسىلدى.
نەگىزگى كاپيتالعا 640 ملرد. تەڭگە ينۆەستيتسيا تارتىلىپ، ءوسىم 21,7 پايىزدى قۇرادى (رەسپۋبليكانىڭ ورتاشا كورسەتكىشىنەن 14 پايىزعا جوعارى، قر – 107,5%). ونىڭ 70,5 پايىزى – جەكە ينۆەستيتسيا. شەتەل ينۆەستورلارىمەن ناتيجەلى جۇمىستىڭ ارقاسىندا 9 اي قورىتىندىسىمەن 171 ملن. اقش دوللارى كولەمىندە تىكەلەي ينۆەستيتسيا تارتىلىپ، ءوسىم 16,6 پايىزعا جەتكەن.
2025-2029 جىلدارى ايماقتا قۇنى 1 ترلن. 900 ملرد. تەڭگە بولاتىن 65 ينۆەستيتسيالىق جوبا ىسكە اسىرىلىپ، 8 100 جاڭا جۇمىس ورنى اشىلادى. ەل پرەزيدەنتىنىڭ تىكەلەي قولداۋىنىڭ ارقاسىندا جانە قاتار مەملەكەتىنە جاساعان ءىسساپارى قورىتىندىسىمەن وڭىردە 800 ملرد. تەڭگەنىڭ، قۋاتتىلىعى 1 100 مەگاۆاتتىق بۋ-گاز قوندىرعىسىنىڭ جوباسى قولعا الىنادى. قازىرگى تاڭدا جەر بەرىلىپ، تەحنيكا-ەكونوميكالىق نەگىزدەمەسى ازىرلەنۋدە.
بيىل «شالقيا» قورعاسىن-مىرىش كەنىشىن قايتا جاڭعىرتۋ ءۇشىن قۇنى 215 ملرد. تەڭگە بولاتىن جاڭا كەن بايىتۋ كومبيناتىنىڭ، 147 ملرد. تەڭگەگە جىلىنا 300 مىڭ توننا كالتسيلەنگەن سودا شىعاراتىن زاۋىت قۇرىلىسى باستالادى. سونداي-اق، 62 ملرد. تەڭگەگە قۋاتتىلىعى 201 مەگاۆاتتىق 5 كۇن جانە 1 جەل ەلەكتر ستانتسياسى ىسكە قوسىلادى.
مەملەكەت باسشىسىنىڭ قاتىسۋىمەن وتكەن قازاقستان – گەرمانيا، قازاقستان – كورەيا فورۋمدارىندا قول قويىلعان مەموراندۋمدارعا سايكەس، 31 ملرد. تەڭگەگە «حورن» نەمىس تەحنولوگياسى بويىنشا جىلىنا 220 ملن. دانا شىنى بوتەلكە شىعاراتىن، 19 ملرد. تەڭگەگە كورەيالىق «With You E&C Kyzylorda» كومپانياسىنىڭ تۇرمىستىق قاتتى قالدىقتار وڭدەيتىن زاۋىتتارىنىڭ قۇرىلىسى باستالادى.
ەستەرىڭىزگە سالا كەتسەك، بۇگىنگى جيىننىڭ كۇن تارتىبىنە سايكەس، وتىرىستا پرەمەر-مينيستر ولجاس بەكتەنوۆ، پرەمەر-ءمينيستردىڭ ورىنباسارى سەرىك جۇمانعارين، ۇلتتىق بانك توراعاسى تيمۋر سۇلەيمەنوۆ، «سامۇرىق-قازىنا» اق باسقارما توراعاسى نۇرلان جاقىپوۆ، استانا قالاسىنىڭ اكىمى جەڭىس قاسىمبەك، شىمكەنت قالاسىنىڭ اكىمى عابيت سىزدىقبەكوۆ، قىزىلوردا وبلىسىنىڭ اكىمى نۇرلىبەك نالىباەۆ بايانداما جاساعان بولاتىن.
اقپارات قىزىلوردا وبلىسى اكىمدىگىنىڭ ءباسپاسوز قىزمەتى تاراتقان ماتەريالدار نەگىزىندە دايىندالدى