ۇلتتىق ەكونوميكا مينيسترلىگى پارلامەنت ماجىلىسىنە جاڭا جانە قولدانىستاعى سالىق كودەكسىنىڭ جوباسىنا ەكىنشى تۇزەتۋلەر پاكەتىن ەنگىزدى.
تۇزەتۋلەردىڭ نەگىزگى باعىتتارىنىڭ ءبىرى – قىزمەتكەرلەردىڭ تابىس دەڭگەيىنە قاراي جەكە تابىس سالىعىنىڭ سارالانعان مولشەرلەمەلەرىن ەنگىزۋ. تومەن تابىس تاباتىن ازاماتتار جوعارى جالاقى الاتىندارعا قاراعاندا تومەن مولشەرلەمە بويىنشا سالىق تولەيتىن بولادى.
سونداي-اق، ازاماتتاردىڭ مەديتسينا، ءبىلىم بەرۋ، الەۋمەتتىك اۋدارىمدار سياقتى شىعىندارى بويىنشا شەگەرىمدەردى وڭتايلاندىرۋ ۇسىنىلۋدا. قازىرگى 14 اەك ورنىنا 30 اەك مولشەرىندە بىرىڭعاي بازالىق شەگەرىم ەنگىزىلەدى. سونىمەن قاتار، قوسىمشا شەگەرىمدەر الىنىپ تاستالادى، بۇل بۋحگالتەرلەردىڭ جۇمىسىن جەڭىلدەتىپ، جەكە تۇلعالارعا سالىق ورگاندارىنا ارتىق قۇجات تاپسىرۋ قاجەتتىلىگىن جويادى.
بۇدان باسقا، ەكسپورتتىق-كرەديتتىك اگەنتتىككە سالىق سالۋ ءتارتىبىن بەلگىلەۋ جانە بانك قىزمەتى ءۇشىن كورپوراتيۆتىك تابىس سالىعىنىڭ مولشەرلەمەسىن ناقتىلاۋ ۇسىنىلادى، بۇل وسى سالاداعى بەلگىسىزدىكتى جويادى.
سونداي-اق مەملەكەتتىك جانە كۆازيمەملەكەتتىك باعالى قاعازداردان تۇسەتىن تابىستارعا سالىق سالۋدى ەنگىزۋ جوسپارلانۋدا. بۇل مەملەكەتتىك بيۋدجەتتىڭ قوسىمشا كوزى.
حالىقارالىق تاجىريبەگە سايكەس، قوعامدىق دەنساۋلىققا قوسىمشا قامقورلىق جاساۋ ءۇشىن ەنەرگەتيكالىق سۋسىندارعا اكتسيزدەر بەلگىلەنەدى.
مۇناي سالاسىنداعى سالىق جۇيەسىن رەفورمالاۋ اياسىندا «سالىقتىق مانەۆر» جۇرگىزۋ كوزدەلۋدە – ەكسپورتتىق تولەمدەرگە، سونىڭ ىشىندە رەنتالىق سالىققا تۇسەتىن جۇكتەمەنى مۇناي ءوندىرۋ كەزەڭىندە تولەنەتىن سالىققا اۋىستىرۋ ۇسىنىلادى. بۇل سالىق جۇيەسىن جەڭىلدەتىپ، بيۋدجەتتىڭ كىرىسىن تۇراقتاندىرۋعا مۇمكىندىك بەرەدى.
سالىق اكىمشىلەندىرۋدى كۇشەيتۋگە باعىتتالعان بولەك تۇزەتۋلەر بلوگى ۇسىنىلعان. ول سالىق ورگاندارىنىڭ باقىلاۋ فۋنكتسيالارىن قايتا قاراۋدى جانە سالىق مىندەتتەمەلەرىن جيناۋ مەن مونيتورينگتەۋ تەتىكتەرىن ناقتىلاۋدى كوزدەيدى.
سونىمەن قاتار، ەكىنشى پاكەت اياسىندا تۇرعىن ءۇي-كوممۋنالدىق شارۋاشىلىعى، ينۆەستيتسيالىق ساياسات، الەۋمەتتىك تولەمدەر ءتارتىبى سەكىلدى بىرقاتار ىلەسپە زاڭدارعا وزگەرىستەر ەنگىزۋ جوسپارلانىپ وتىر.
مىندەتتى الەۋمەتتىك جانە مەديتسينالىق ساقتاندىرۋ سالاسىنداعى، سونداي-اق ارنايى سالىق رەجيمدەرىن قولدانۋداعى بۇزۋشىلىقتار ءۇشىن جاۋاپكەرشىلىكتى كۇشەيتۋ ۇسىنىلادى. بۇل – ەلدەگى سالىقتىق ءتارتىپتى كۇشەيتۋگە باعىتتالعان كەشەندى ستراتەگيانىڭ ءبىر بولىگى.
جالپى العاندا، ۇكىمەت جاڭا سالىق كودەكسى جوباسى مەن وعان ىلەسپە زاڭدارعا 71 تۇزەتۋ، ال قولدانىستاعى سالىق كودەكسىنە 67 تۇزەتۋ ۇسىندى.