بەلگىلەنگەن جىلدامدىق رەجيمىن ساقتاۋ مەن دەمالىسقا ءۇزىلىس جاساۋ جاي عانا كەڭەس ەمەس، بۇل ومىرلىك ماڭىزدى قاۋىپسىزدىك شارالارى. جول-كولىك وقيعالارىنان قازا تاپقانداردىڭ 60%-ى — قالا سىرتىنداعى جولداردا بولعان اپاتتاردىڭ قۇرباندارى، ال ولاردىڭ ىشىندە ءاربىر ءۇشىنشى ادام جىلدامدىقتى اسىرۋ سالدارىنان اپاتقا ۇشىراعان. اۋا رايىنىڭ قولايسىزدىعى، بۇرىلىستار نەمەسە كورىنۋ جاعدايىنىڭ تومەندىگى دە قاۋىپ تۋدىرۋى مۇمكىن. سونداي-اق دەمالىس رەجيمىن ساقتاۋ وتە ماڭىزدى. شارشاعان جۇرگىزۋشى — جولداعى قاۋىپتىڭ ءبىر ءتۇرى. ۇيقىنىڭ قانباۋى مەن ۇزاق ۋاقىت توقتاۋسىز كولىك جۇرگىزۋ ادامنىڭ زەيىنىن تومەندەتىپ، رەاكتسياسىن باياۋلاتادى، بۇل ءوز كەزەگىندە جولدا قاتەلىك جاساۋ قاۋپىن ارتتىرادى. ىشكى ىستەر مينيسترلىگى ەسكەرتەدى: كولىك تىزگىنىندە ءسىز تەك ءوز ءومىرىڭىز ءۇشىن عانا ەمەس، جولاۋشىلاردىڭ، باسقا جۇرگىزۋشىلەر مەن جاياۋ جۇرگىنشىلەردىڭ ءومىرى ءۇشىن دە جاۋاپتىسىز.
اقپارات: polisia.kz