بۇگىن الماتى قالاسىنداعى «پرينتمەديا تەحنولوگيالار كوللەدجىندە» تەحنيكالىق جانە كاسىپتىك ءبىلىم بەرۋ ۇيىمدارىنىڭ ءبىلىم الۋشىلارىنا ارنالعان «كىتاپ - ءبىلىم بۇلاعى» اتتى بايقاۋ ءوتتى. ءىس-شارا ۇلتتىق كىتاپ كۇنىنە وراي ۇيىمداستىرىلدى.
بايقاۋدىڭ ماقساتى - تەحنيكالىق جانە كاسىپتىك ءبىلىم بەرۋ ۇيىمدارى ستۋدەنتتەرىنىڭ كىتاپ وقۋعا دەگەن قىزىعۋشىلىعىن ارتتىرۋ، كىتاپتى ءبىلىمنىڭ ماڭىزدى قاينار كوزى رەتىندە ناسيحاتتاۋ، ولاردىڭ زياتكەرلىك جانە شىعارماشىلىق الەۋەتىن دامىتۋ، سونداي-اق ۇلتتىق ادەبي مۇرانى كەڭىنەن دارىپتەۋ.
بايقاۋ بارىسىندا قاتىسۋشىلار كوركەم ءسوز وقۋ، شىعارماشىلىق تاپسىرمالار ورىنداۋ ارقىلى ءوز قابىلەتتەرىن تانىتىپ، قازاق ادەبيەتىنىڭ باي مۇراسىن جاڭا قىرىنان ناسيحاتتاۋعا مۇمكىندىك الدى. ءىس-شارا جاستاردىڭ وقۋ مادەنيەتىن قالىپتاستىرۋعا، رۋحاني قۇندىلىقتارعا قۇرمەتىن ارتتىرۋعا جانە شىعارماشىلىق بەلسەندىلىگىن قولداۋعا باعىتتالدى.
بايقاۋ 2026 جىلى مەرەيتويلارى اتالىپ وتەتىن قازاق ادەبيەتى مەن مادەنيەتىنىڭ كورنەكتى تۇلعالارىنىڭ شىعارماشىلىعىنا ارنالدى. اتاپ ايتقاندا، ىبىراي التىنسارين، جامبىل جاباەۆ، مۇقاعالي ماقاتاەۆ، قابدەش ءجۇمادىلوۆ جانە سايىن مۇراتبەكوۆ شىعارمالارى كەڭىنەن ناسيحاتتالدى.