وسى مەرەكەگە وراي ەلوردالىق سپورتشىلار «جۋرناليستەرگە العىس» اتتى اسەرلى چەللەندج باستادى. ونىڭ ماقساتى – ءوز جەتىستىكتەرىن ناسيحاتتاپ، ۇلكەن سپورتتىڭ كورەرمەنگە بەيمالىم قىرلارىن تانىتىپ جۇرگەن جۋرناليستەرگە شىنايى العىس ءبىلدىرۋ، دەپ حابارلايدى استانا قالاسى اكىمدىگىنىڭ رەسمي سايتى.
سپورتشىلار قىسقاشا بەينەروليكتەر ازىرلەپ، سپورتتىق جولىنداعى ءارتۇرلى ساتتەردە باق وكىلدەرى قولداۋ كورسەتكەنىن باياندادى. ءبىرى ءوزى جايلى العاش گازەتكە شىققان ماقالانى ەسكە السا، ەندى ءبىرى جەڭىسكە جەتكەنگە دەيىنگى ۇزاق جولىن ارقاۋ ەتكەن رەپورتاجدى، ال تاعى ءبىرى تۋعان-تۋىستارى مەن جانكۇيەرلەرى تاماشالاعان تۋرنيرلەردەگى تىكەلەي ەفيرلەردى ايتىپ ءوتتى.
«جەڭىسىڭ جايلى گازەتتەن وقىپ نەمەسە تەلەديداردان سيۋجەت كورگەندە ەرەكشە سەزىمگە بولەنەسىڭ. بۇل سەنىڭ ەڭبەگىڭ ەلەنىپ، وزگەلەرگە شابىت سىيلاي الاتىنىڭدى بىلدىرەدى. وليمپيادا كەزىندە مەنى قولداعان بارلىق جانعا ءارى سول ساتتەردى كوپشىلىككە جەتكىزگەن جۋرناليستەرگە العىس ايتامىن»، – دەدى بوكستان وليمپيادا ويىندارىنىڭ كۇمىس جۇلدەگەرى نۇربەك ورالباي.
شىنايى تىلەكتەرىن ءبىلدىرىپ، ءوز ەستەلىگىن ايتقان سپورتشىلاردىڭ قاتارىندا پارادزيۋدودان پاراليمپيادا ويىندارىنىڭ كۇمىس جۇلدەگەرى ەرعالي شامەي، كاراتەدەن ازيا جانە قازاقستان چەمپيونى، سپورت شەبەرى ۆەنەرا جاقسىباەۆا، دجيۋ-دجيتسۋدان حالىقارالىق دارەجەدەگى سپورت شەبەرى نۇرسۇلتان دۇيسەنقۇلوۆ، ەلوردالىق گاندبولشى قىزدار، گرەك-ريم كۇرەسىنەن حالىقارالىق دارەجەدەگى سپورت شەبەرى ايبەك ايتبەكوۆ، پاراكاراتەدەن سپورتشى ءلاززات ءجۇسىپوۆا، پارادزيۋدوشى باۋىرجان ارىستانبەكوۆ جانە سپورتتىق گيمناستيكادان ازيانىڭ ءۇش دۇركىن چەمپيونى ايىم مەيىرجانوۆا بولدى.
كەيبىر سپورتشىلار ءتىپتى جۋرناليستەرگە ارناپ شاعىن ولەڭ شۋماقتارىن شىعارىپ، ولاردى كاسىبىنە دەگەن ىقىلاسى، شىنايىلىعى مەن كاسىبيلىگى ءۇشىن ەرەكشە اتاپ ءوتتى.
«جۋرناليست – ءار مەدالدىڭ ارتىندا نە جاتقانىن كورە الاتىن جانە سونى كوپشىلىككە جەتكىزە بىلەتىن جان. ولار جۇزدەگەن ساعاتتىق جاتتىعۋ، اۋىرتپالىق، قۋانىش پەن الاڭداۋشىلىق سەكىلدى ساتتەردى اشىپ كورسەتەدى. ناتيجەنى عانا ەمەس، سپورتتىڭ جان-دۇنيەسىن كورسەتە بىلگەندەرىڭىز ءۇشىن راقمەت»، — دەپ اتاپ ءوتتى گيمناست ايىم مەيىرجانوۆا.
بۇل كۇن – تاعى ءبىر ەسكە سالۋ ءساتى: سپورتتىق وقيعالاردىڭ سىرتىندا ءاردايىم جۋرناليستەر مەن مەديا ماماندار تۇرادى. ولاردىڭ ارقاسىندا جانكۇيەرلەر سپورتشىلارىمىزدىڭ جەتىستىكتەرىنەن حاباردار بولىپ، ولارمەن بىرگە قۋانىپ، ماقتانا الادى.
استانا قالاسىنىڭ دەنە شىنىقتىرۋ جانە سپورت باسقارماسى دا مەرەكەمەن قۇتتىقتاپ، جۋرناليستەرگە كۇش-قۋات، شىعارماشىلىق شابىت تىلەدى. ولاردىڭ ەڭبەگى قوعام ءۇشىن اسا ماڭىزدى جانە قاجەت.