اتالعان تۇرعىن ءۇيدىڭ قۇرىلىسى وتكەن جىلى باستالعان. باس مەردىگەر – «بينوم» جشس. ءۇي بەس قاباتتان تۇرادى جانە 60 پاتەرلى.
وبلىس اكىمى وڭىردە تۇرعىن ۇيمەن قامتۋ باعىتىندا اتقارىلىپ جاتقان جۇمىستارعا قىسقاشا توقتالدى.
– ءبىز پاتەر كەزەگىندەگى تۇرعىندار سانىن ازايتۋ ماقساتىندا جىل سايىن تۇرعىن ءۇي قۇرىلىسىنىڭ كولەمىن ۇلعايتىپ كەلەمىز. اۋدان تۇرعىندارىن باسپانامەن قامتۋ بويىنشا اۋدان باسشىلىعىنا ناقتى مىندەتتەر جۇكتەلدى. بۇگىنگى قونىس يەلەرىن جاڭا ۇيلەرىمەن شىن جۇرەكتەن قۇتتىقتايمىن! – دەدى وبلىس اكىمى.
بەس بالانىڭ اناسى روزا كەرىمباەۆا كوپ جىلدار بويى پاتەر كەزەگىندە تۇرعانىن ايتىپ، قۋانىشىمەن ءبولىستى.
– كوپتەن كۇتكەن ارمانىمىز بۇگىن ورىندالدى. ۇزاق جىلدار بويى وسى ءساتتى كۇتتىك. بارشاڭىزعا كوپ راقمەت! سىزدەردىڭ دە ۇيلەرىڭىزدە وسىنداي قۋانىش بولسىن، – دەدى قونىس يەسى.
وتكەن جىلى وبلىس بويىنشا پايدالانۋعا بەرىلگەن تۇرعىن ۇيلەردىڭ جالپى كولەمى 759,0 مىڭ شارشى مەتردى قۇراپ، 2023 جىلمەن سالىستىرعاندا 4,5%-عا ارتقان.
ال بيىل وبلىس بويىنشا 765,0 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر.
الەۋمەتتىك وسال توپتار ءۇشىن 21,5 ملرد. تەڭگەگە 1 415 پاتەر ساتىپ الۋ كوزدەلۋدە.
جالپى، 2024 جىلى 2 830 باسپانا پايدالانۋعا بەرىلسە، اعىمداعى جىلى 3 445 وتباسى باسپانامەن قامتىلادى دەپ كۇتىلۋدە. بۇل وتكەن جىلمەن سالىستىرعاندا 21,7%-عا ارتىق كورسەتكىش.