قما باتىس قازاقستان وبلىسى بويىنشا دەپارتامەنتى اۆتوموبيل جولدارىن كۇردەلى جوندەۋگە بولىنگەن بيۋدجەت قاراجاتىن جىمقىرۋ فاكتىسى بويىنشا تەرگەۋدى اياقتادى.
2023 جىلعى ناۋرىزدا مەملەكەتتىك ساتىپ الۋ قورىتىندىسى بويىنشا «سىرىم اۋداندىق تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمى» مم مەن «ساپاك» وندىرىستىك كووپەراتيۆى اراسىندا جىمپيتى اۋىلىنداعى جولداردى جوندەۋگە 259 ملن تەڭگە سوماسىنا شارت جاسالعان.
الايدا «ساپاك» وك ديرەكتورى «اك-بي» جشس-ءنىڭ ديرەكتورى ءسوز بايلاسىپ، سەنىپ تاپسىرىلعان قاراجاتتى يەمدەنۋ سحەماسىن ۇيىمداستىرعان.
كۇدىكتىلەر ورىندالعان جۇمىستار اكتىلەرىنە جالعان مالىمەتتەردى جۇيەلى تۇردە ەنگىزىپ وتىرعان. قۇجاتتاردا اسفالت توسەۋ، جەر قازۋ، بەتونداۋ، سۋ قۇبىرلارىن جۇرگىزۋ جانە باسقا دا جول جۇمىستارى تولىق كولەمدە كورسەتىلگەنىمەن، ءىس جۇزىندە ولار ورىندالماعان نەمەسە الدەقايدا از كولەمدە اتقارىلعان.
جالعان اكتىلەر نەگىزىندە تاپسىرىس بەرۋشى بيۋدجەت قاراجاتىن «ساپاك» وك-ءنىڭ ەسەپشوتىنا اۋدارىپ وتىرعان. كەيىن قاراجات سحەماعا قاتىسۋشىلار اراسىندا بولىنگەن.
مەملەكەتكە كەلتىرىلگەن ماتەريالدىق زالال 56,5 ملن تەڭگەنى قۇرادى.
سوت سانكتسياسىمەن كۇدىكتىلەردىڭ ءبىرىنىڭ پاتەرىنە تىيىم سالىندى.
ولارعا قاتىستى ەشقايدا كەتپەۋ جانە ءتيىستى مىنەز-قۇلىق تۋرالى قولحات تۇرىندەگى بۇلتارتپاۋ شاراسى قولدانىلدى.
قىلمىستىق ءىس سوتقا جولداندى.
بۇدان بولەك، بۇعان دەيىن سوت ۇكىمىمەن «سىرىم اۋداندىق تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمى» مم باسشىسى لاۋازىمدىق وكىلەتتىكتەرىن تەرىس پايدالانعانى ءۇشىن كىنالى دەپ تانىلعان.
قازاقستان رەسپۋبليكاسىنىڭ قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
قر قما ءباسپاسوز قىزمەتى