«12 تامىز – حالىقارالىق جاستار كۇنى» ونكۇندىگى اياسىندا قىزىلوردا قالاسىنداعى پرەزيدەنت پاركىنىڭ امفيتەاترىندا «جاستار جانە زاڭ مەن ءتارتىپ» تاقىرىبىندا وبلىستىق «جايدارمان» ويىندارى ۇيىمداستىرىلدى.
ءىس-شارانىڭ نەگىزگى ماقساتى – مەملەكەت باسشىسىنىڭ «زاڭ مەن ءتارتىپ» قاعيداتىن قوعامدا كەڭىنەن ناسيحاتتاۋ، جاستاردىڭ قۇقىقتىق ساۋاتتىلىعى مەن مادەنيەتىن ارتتىرۋ، زاڭعا قۇرمەتپەن قاراۋ جانە ازاماتتىق جاۋاپكەرشىلىك قۇندىلىقتارىن قالىپتاستىرۋ.
سايىسقا قىزىلوردا قالاسى مەن وبلىس اۋداندارىنان جاس جايدارمانشىلار قاتىسىپ، قوعامداعى وزەكتى ماسەلەلەردى ءازىل مەن ۇتقىر وي ارقىلى جەتكىزدى. قاتىسۋشىلار ءوز قويىلىمدارىندا زاڭ تالاپتارىن ساقتاۋ، قوعامدىق ءتارتىپ، جاۋاپكەرشىلىك، قۇقىقتىق مادەنيەت جانە ازاماتتىق بەلسەندىلىك تاقىرىپتارىن كەڭىنەن قامتىدى.
شارا بارىسىندا وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ جاستارعا باعىتتالعان مۇنداي باستامالاردىڭ تاربيەلىك جانە قوعامدىق ماڭىزىنا توقتالدى.
– زاڭ مەن ءتارتىپ – ورنىقتى قوعامنىڭ نەگىزگى تىرەگى. قۇقىقتىق مادەنيەت تەك زاڭ تالاپتارىن ءبىلۋ نەمەسە ونى ورىنداۋمەن شەكتەلمەيدى. ول – ءار ازاماتتىڭ ءوز قۇقىعى مەن مىندەتىن تەرەڭ تۇسىنۋىنەن، قوعامدىق ورتاداعى جاۋاپكەرشىلىگىن سەزىنۋىنەن باستالادى. اسىرەسە، ەلدىڭ ەرتەڭىن قالىپتاستىراتىن جاستاردىڭ بويىندا وسى قۇندىلىقتاردىڭ بەرىك ورنىعۋى اسا ماڭىزدى. بۇگىنگى «جايدارمان» ويىنى – جاستاردىڭ شىعارماشىلىق الەۋەتىن تانىتۋمەن قاتار، قوعامداعى وزەكتى ماسەلەلەردى اشىق كوتەرۋدىڭ، ازاماتتىق ۇستانىمدى ءازىل ارقىلى جەتكىزۋدىڭ ءتيىمدى الاڭى. جاستاردىڭ قۇقىقتىق ساۋاتى جوعارى، ويى سەرگەك، جاۋاپكەرشىلىگى مول بولعان سايىن قوعام دا سوعۇرلىم بەرىك بولادى. سوندىقتان «زاڭ مەن ءتارتىپ» قاعيداتى كۇندەلىكتى ءومىر سالتىنا اينالۋى ءتيىس، – دەدى رۋسلان مۇحامەدالىۇلى.
ويىن بارىسىندا كوماندالار ساحنالىق قويىلىمدار ارقىلى قۇقىق بۇزۋشىلىقتىڭ الدىن الۋ، قوعامدىق ءتارتىپتى ساقتاۋ، زاڭ تالاپتارىنا قۇرمەتپەن قاراۋ جانە ازاماتتىق جاۋاپكەرشىلىكتى ارتتىرۋ ماسەلەلەرىن كورەرمەن نازارىنا ۇسىندى.
ايتا كەتۋ قاجەت، بيىلعى حالىقارالىق جاستار كۇنىنە ارنالعان مەرەكەلىك شارالار قازاقستان رەسپۋبليكاسى كونستيتۋتسياسىنىڭ كۇشىنە ەنۋى جانە الدا وتەتىن قۇرىلتاي دەپۋتاتتارىنىڭ سايلاۋى اياسىندا وتكىزىلۋدە. 10–12 تامىز ارالىعىندا رەسپۋبليكا كولەمىندە «جاستارمەن بىرگە!» اكتسياسى ۇيىمداستىرىلىپ، ونىڭ باستى ءىس-شاراسى استاناداعى «Jastar Fest» رەسپۋبليكالىق جاستار فەستيۆالى بولماق.
سونىمەن قاتار، وڭىرىمىزدە اباي كۇنىنە ارنالعان ادەبي كەشتەر، كىتاپ وقۋ مادەنيەتىن ناسيحاتتايتىن «وقى. ويلان. وزگەر.» اكتسياسى، «100 مينۋت وقۋ» چەللەندجى، جاستاردىڭ تسيفرلىق ساۋاتتىلىعىن ارتتىرۋعا ارنالعان كەزدەسۋلەر، سونداي-اق ەكولوگيالىق جانە ۆولونتەرلىك اكتسيالار وتكىزىلەدى. سونداي-اق، جاستارعا ءبىلىم الۋ، جۇمىسقا ورنالاسۋ، كاسىپكەرلىك پەن مەملەكەتتىك قولداۋ تەتىكتەرى بويىنشا كەڭەس بەرەتىن بىرىڭعاي جاستار الاڭدارى جۇمىس ىستەيدى.
#زاڭ مەن ءتارتىپ
#زاكون ي پوريادوك
#حالىقارالىق جاستار كۇنى