قر ساۋدا جانە ينتەگراتسيا ءمينيسترى ارمان شاققاليەۆ ۇكىمەت وتىرىسىندا رەسپۋبليكاداعى ساۋدا سالاسىنىڭ دامۋى تۋرالى باياندادى.
ول ءبىرىنشى جارتىجىلدىقتىڭ قورىتىندىسى بويىنشا ساۋدانىڭ تۇراقتى ءوسۋى قامتاماسىز ەتىلگەنىن اتاپ ءوتتى.
«ناقتى كولەم يندەكسى 105,7%-دى قۇرادى، ساۋدا كولەمى 36,2 ترلن تەڭگەگە جەتتى، بۇل وتكەن جىلدىڭ سايكەس كەزەڭىنەن 15,3%-عا ارتتى. كوتەرمە ساۋدا 6,6%-عا (24,5 ترلن تەڭگەگە), بولشەك ساۋدا 3,8%-عا (11,5 ترلن تەڭگەگە) ءوستى. جىل سوڭىنا دەيىن وڭدەلگەن تاۋارلار بويىنشا ساتۋدىڭ بولجامدى كولەمى كەمىندە 40 ترلن تەڭگەنى قۇراۋى ءتيىس. تاۋار اينالىمىنىڭ 70%-دان استامى بەس وڭىرگە – الماتى، استانا، شىمكەنت قالالارىنا، سونداي-اق اتىراۋ جانە قاراعاندى وبلىستارىنا تيەسىلى. ەڭ جوعارى ءوسىم قارقىنى پاۆلودار وبلىسىندا – 125,3%، سولتۇستىك قازاقستان وبلىسىندا – 121,8%، تۇركىستان وبلىسىندا – 121,4% جانە شىمكەنت قالاسىندا – 121,8% دەڭگەيىندە قامتاماسىز ەتىلدى. وڭ سەرپىندى ساقتاۋ ماقساتىندا ىشكى ساۋدانى دامىتۋ جونىندەگى جۇيەلى شارالار كەشەنى جۇزەگە اسىرىلۋدا»، — دەدى ارمان شاققاليەۆ.
سونداي-اق مينيستر ساۋدا ينفراقۇرىلىمىن دامىتۋعا مەملەكەتتىك قولداۋ شارالارىن جۇزەگە اسىرۋ جالعاسىپ جاتقانىن ايتتى. بۇگىنگى تاڭدا جالپى سوماسى 10 ملرد تەڭگەگە 978 جوبا قارجىلاندىرىلدى. سونىمەن قاتار وتاندىق وندىرۋشىلەردى قولداۋ جۇمىستارى كۇشەيتىلۋدە. ساۋدا جەلىلەرىمەن بىرلەسىپ، قازاقستاندىق ونىمدەرگە ارنالعان سورە كەڭىستىگى كەڭەيتىلەدى. وتاندىق تاۋار وندىرۋشىلەر تىزىلىمىمەن ۇيلەستىرىلگەن وتاندىق ونىمدەر كاتالوگى قالىپتاستىرىلۋدا. جانە اكىمدىكتەرمەن بىرلەسىپ، ءونىمسىز دەلدالدارعا باقىلاۋ كۇشەيتىلىپ، تاۋار قوزعالىسىن كەزەڭ كەزەڭمەن قاداعالاۋ جۇيەسى ەنگىزىلدى. شيكىزاتتىق ەمەس ەكسپورت بويىنشا دا وڭ ديناميكا ساقتالۋدا.
«ءبىرىنشى جارتىجىلدىقتىڭ قورىتىندىسى بويىنشا شيكىزاتتىق ەمەس تاۋارلار مەن قىزمەتتەر ەكسپورتىنىڭ كولەمى 14,6%-عا ءوسىپ، $14,9 ملرد-تى قۇرادى. ەكسپورتتاۋشىلاردى قولداۋ شارالارى مەن جەتكىزۋ گەوگرافياسىن دايەكتى تۇردە كەڭەيتەمىز. جىل باسىنان بەرى 150-دەن استام وتاندىق كومپانيانىڭ قاتىسۋىمەن 7 ساۋدا-ەكونوميكالىق ميسسيا ۇيىمداستىرىلدى. ناتيجەسىندە جالپى سوماسى $700 ملن-نان استام سوماعا ەكسپورتتىق كەلىسىمشارتتارعا قول قويىلدى. ەكسپورتتىق-كرەديتتىك اگەنتتىك جەلىسى بويىنشا 400 ملرد تەڭگەدەن استام قارجىلىق قولداۋ كورسەتىلدى. جىل سوڭىنا دەيىن ساقتاندىرۋ قولداۋىنىڭ سىيىمدىلىعىن 1,2 ترلن تەڭگەگە دەيىن ارتتىرۋ جوسپارلانۋدا»، — دەدى ارمان شاققاليەۆ.
سونداي-اق قازاقستاندىق ونىمدەردى شەتەلدىك ساۋدا جەلىلەرىنىڭ سورەلەرىنە شىعارۋدىڭ جاڭا قۇرالى ىسكە قوسىلدى. ساۋدا مينيسترلىگى سالانىڭ نىسانالى كورسەتكىشتەرىنە قول جەتكىزۋ بويىنشا جۇيەلى جۇمىستى جالعاستىرادى.
#ساۋدا #ەكونوميكا #ۇكىمەت وتىرىسى