قىزىلوردا وبلىسىندا «ستۋدەنتتەر سارايىندا» «وعىزداردىڭ ماتەريالدىق جانە رۋحاني مادەنيەتى» اتتى عىلىمي-تانىمدىق كىتاپ-كاتالوگىنىڭ تانىستىرىلىمى ءوتتى. سونداي-اق، «جانكەنت ارحەولوگيالىق ەكسپەديتسياسىنا – 20 جىل» اتتى حالىقارالىق عىلىمي-تاجىريبەلىك دوڭگەلەك ۇستەل ۇيىمداستىرىلدى.
شارا وعىزداردىڭ رۋحاني مادەنيەتىن جۇرتشىلىققا كەڭىنەن ناسيحاتتاۋعا، جانكەنتتىڭ تاريحي-ارحەولوگيالىق مۇراسىن عىلىمي تۇرعىدا زەردەلەۋگە، وتاندىق جانە شەتەلدىك عالىمدار اراسىنداعى ءوزارا ىنتىماقتاستىقتى نىعايتۋعا باعىتتالدى.
قاتىسۋشىلار ارنايى ۇيىمداستىرىلعان «جانكەنت قالاسىنىڭ جادىگەرلەرى» اتتى كورمەنى، «اپتاپ ىستىق كۇن استىندا جانكەنتتە وتكەن 20 جىل» فوتوكورمەسىن تاماشالادى. وندا ارحەولوگيالىق جادىگەرلەر جانە ەكسپەديتسيانىڭ جيىرما جىلدىق زەرتتەۋ جولىن بەينەلەيتىن فوتوسۋرەتتەر قويىلعان.
جيىنعا رەسەي، گەرمانيا، ۇلىبريتانيا، وزبەكستان جانە ەلىمىزدىڭ ءار وڭىرىنەن كەلگەن عالىمدار قاتىسىپ، جانكەنت قالاشىعىن زەرتتەۋ بارىسىندا جيناقتاعان عىلىمي ەڭبەكتەرىن تانىستىردى. اشىلۋ راسىمىنە وبلىس اكىمىنىڭ كەڭەسشىسى رۋسلان رۇستەموۆ، قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى – رەكتور ناۋرىزباي بايقاداموۆ، ءا.ح. مارعۇلان اتىنداعى ارحەولوگيا ينستيتۋتىنىڭ باس ديرەكتورى، تاريح عىلىمدارىنىڭ كانديداتى اقان وڭعارۇلى جانە ەبەرحارد كارل اتىنداعى تيۋبينگەن ۋنيۆەرسيتەتىنىڭ قۇرمەتتى پروفەسسورى Heinrich Haerke قاتىسىپ، جانكەنتتى زەرتتەۋدىڭ تاريحي ءارى عىلىمي ماڭىزىنا توقتالدى.
«وعىزداردىڭ ماتەريالدىق جانە رۋحاني مادەنيەتى» عىلىمي-تانىمدىق كىتاپ-كاتالوگىندا وعىزداردىڭ تاريحى مەن رۋحاني مادەنيەتى، تۇرمىس-تىرشىلىگى، قولونەرى مەن مۇراسى كەڭىنەن قامتىلعان. سونىمەن قاتار جانكەنت قالاشىعىندا جۇرگىزىلگەن كوپجىلدىق ارحەولوگيالىق زەرتتەۋلەردىڭ ناتيجەسى جۇيەلەنىپ، قۇندى ارحەولوگيالىق جادىگەرلەر تۋرالى عىلىمي مالىمەتتەر ۇسىنىلعان.
دوڭگەلەك ۇستەلدىڭ ەكىنشى بولىمىندە وتاندىق جانە شەتەلدىك عالىمدار جانكەنت پەن سىر وڭىرىندەگى ورتاعاسىرلىق قالالاردىڭ تاريحى مەن ارحەولوگياسىنا قاتىستى زەرتتەۋ ناتيجەلەرىن ورتاعا سالدى. ماسكەۋ، تيۋبينگەن، ليۆەرپۋل، سامارقان، استانا، الماتى، شىمكەنت جانە قىزىلوردا زەرتتەۋشىلەرى ءوزارا تاجىريبە الماسىپ، جانكەنتتىڭ سىرداريانىڭ تومەنگى اعىسىنداعى ورتاعاسىرلىق قالالار جۇيەسىندەگى ورنى مەن وعىزدار تاريحىن زەردەلەۋدەگى ماڭىزىنا قاتىستى جاڭا عىلىمي تۇجىرىمدارىن ۇسىندى.
جيىرما جىلدىق زەرتتەۋ بارىسىندا جيناقتالعان مول عىلىمي ماتەريال جانكەنت تاريحىن جاڭا قىرىنان زەردەلەۋگە مۇمكىندىك بەرىپ، وعىز وركەنيەتىنىڭ سىر وڭىرىندەگى تاريحي-مادەني ورنىن تەرەڭىرەك تۇسىنۋگە جول اشتى.
عىلىمي باسقوسۋ قورىتىندىسىندا زەرتتەۋشىلەر بىرقاتار ۇسىنىس ايتىپ، ءتيىستى رەزوليۋتسيا قابىلداندى.
اكىمدىكتىڭ ءباسپاسوز قىزمەتى