جامبىل وبلىسىندا بيىل 208 مىڭنان استام وقۋشىنى جازعى دەمالىس جانە ساۋىقتىرۋ شارالارىمەن قامتۋ جوسپارلانىپ وتىر. بۇل ماسەلە وبلىس اكىمى ەربول قاراشوكەەۆ توراعالىق ەتكەن كەڭەستە قارالدى.
جيىندا بالالاردىڭ جازعى دەمالىسىن ۇيىمداستىرۋ جانە ۇلتتىق بىرىڭعاي تەستىلەۋگە دايىندىق بارىسى سارالاندى. ءبىلىم باسقارماسىنىڭ باسشىسى نۇربەك ورشىبەكوۆ وڭىردەگى 531 مەكتەپتى بيىل 245 مىڭنان استام وقۋشى اياقتايتىنىن ايتتى. ونىڭ ىشىندە 23 253 وقۋشى – 9-سىنىپ، 14 437 تۇلەك – 11-سىنىپ بىتىرۋشىلەرى.
بيىل 670 تۇلەك «التىن بەلگىگە»، ال 1 182 وقۋشى ۇزدىك اتتەستاتقا ۇمىتكەر. 11-سىنىپ تۇلەكتەرىنىڭ 11 911-ءى نەمەسە 82,5 پايىزى ۇبت-عا قاتىسۋعا نيەت بىلدىرگەن. وبلىستا ەكى تەستىلەۋ پۋنكتى جۇمىس ىستەيدى.
بالالاردىڭ جازعى دەمالىسىن ۇيىمداستىرۋعا جەرگىلىكتى بيۋدجەتتەن 662,4 ميلليون تەڭگە بولىنگەن. جوسپارعا سايكەس 1-10 سىنىپتاعى 217 757 وقۋشىنىڭ 208 235-ءى جازعى ساۋىقتىرۋ جانە دەمالىس شارالارىمەن قامتىلادى. ونىڭ ىشىندە 15 مىڭنان استام بالا قالا سىرتىنداعى لاگەرلەردە دەمالادى. نەگىزگى باسىمدىق كوپبالالى جانە از قامتىلعان وتباسىلاردان شىققان، جەتىم جانە اتا-اناسىنىڭ قامقورلىعىنسىز قالعان بالالارعا بەرىلمەك.
وڭىردەگى 6 وقۋ-ساۋىقتىرۋ ورتالىعى بالالاردى قابىلداۋعا دايىندالىپ جاتىر. ال 1 ماۋسىمنان باستاپ 407 مەكتەپ جانىنداعى لاگەر جۇمىسىن باستايدى. وندا الەۋمەتتىك قولداۋدى قاجەت ەتەتىن وتباسىلاردان شىققان 31 967 بالانى قامتۋ كوزدەلگەن.
سونىمەن قاتار ءتۇرلى بايقاۋ مەن جارىستاردىڭ جەڭىمپازى اتانعان 279 وقۋشى «بالداۋرەن» رەسپۋبليكالىق وقۋ-ساۋىقتىرۋ ورتالىعىنا جولداما الادى. ال كوپبالالى جانە از قامتىلعان وتباسىلاردان شىققان 10 بالا الماتى قالاسىنداعى بوبەك ساۋىقتىرۋ ورتالىعىندا دەمالادى.
كەڭەستە بالالار قاۋىپسىزدىگى باستى نازاردا بولۋى كەرەكتىگى ايتىلدى. وبلىس اكىمى بارلىق جازعى لاگەرلەردە قاۋىپسىزدىك تالاپتارىن كۇشەيتىپ، تاۋلىك بويعى باقىلاۋدى قامتاماسىز ەتۋدى تاپسىردى. سونداي-اق بۋللينگتىڭ الدىن الۋ، تاربيەشىلەردىڭ جاۋاپكەرشىلىگىن ارتتىرۋ، لاگەر قىزمەتكەرلەرىنە ارنايى نۇسقامالىق وقىتۋ جۇرگىزۋ قاجەتتىگىن اتاپ ءوتتى.
بۇدان بولەك، پوليتسيا، توتەنشە جاعدايلار جانە ءبىلىم سالاسى ماماندارىنان قۇرالعان مونيتورينگتىك توپتاردىڭ جۇمىسىن جانداندىرىپ، اتا-انالارمەن تۇراقتى كەرى بايلانىس ورناتۋ مىندەتى قويىلدى.
جازعى دەمالىس كەزىندە بالالاردى سپورتتىق جانە تانىمدىق ۇيىرمەلەرگە تارتۋ، ولاردىڭ بوس ۋاقىتىن ءتيىمدى ۇيىمداستىرۋ ماسەلەسىنە دە باسىمدىق بەرىلمەك. سونىمەن قاتار مەكتەپ بىتىرۋشىلەر اراسىندا جول قاۋىپسىزدىگى، قوعامدىق ءتارتىپ جانە كامەلەتكە تولماعانداردىڭ قاۋىپسىزدىگى بويىنشا ءتۇسىندىرۋ جۇمىستارى كۇشەيتىلەدى.