قۇرىلىس باسقارماسىنىڭ باسشىسى ەرلان ورىنباەۆتىڭ حابارلاۋىنشا، وبلىستا بارلىعى 181 نىساننىڭ قۇرىلىسى ءجۇرىپ جاتىر. ونىڭ ىشىندە 137 نىسان جىل سوڭىنا دەيىن پايدالانۋعا بەرىلمەك. قالعان 44-ءى كەلەسى جىلعا وتپەلى رەتىندە قاراستىرىلعان.
بۇگىنگە كۇنگە دەيىن 30 نىسان ەل يگىلىگىنە تاپسىرىلدى.
اتاپ ايتقاندا، 3 مەكتەپ، 3 دەنساۋلىق ساقتاۋ نىسانى، 12 ينجەنەرلىك-كوممۋنيكاتسيالىق ينفراقۇرىلىم جوباسى، 3 مادەنيەت ءۇيى، سونداي-اق 8 تۇرعىن ءۇي مەن 1 «جايلى مەكتەپ» پايدالانۋعا بەرىلدى.
جىل سوڭىنا دەيىن 11 ءبىلىم بەرۋ، 6 دەنساۋلىق ساقتاۋ، 4 سپورت جانە 9 مادەنيەت نىسانى اشىلادى دەپ كۇتىلۋدە.
«جايلى مەكتەپ» ۇلتتىق جوباسىنا 2025 جىلى 13,5 ملرد تەڭگە قاراستىرىلدى. جىل سوڭىنا دەيىن 3 مەكتەپتىڭ قۇرىلىسىن اياقتاۋ جوسپارلانۋدا.
اۋىل شارۋاشىلىعى سالاسىندا 5 ماڭىزدى جوبانى جۇزەگە اسىرۋ ءۇشىن 1,1 ملرد تەڭگە ءبولىندى.
2025 جىلدىڭ العاشقى 6 ايىنىڭ قورىتىندىسى بويىنشا قۇرىلىس جۇمىستارىنىڭ كولەمى 11,5 پايىزعا ورىندالدى. وسى مەرزىمدە 317,7 مىڭ شارشى مەتر تۇرعىن ءۇي پايدالانۋعا بەرىلدى.
بيىل كەزەكتە تۇرعان ازاماتتاردى تۇرعىن ۇيمەن قامتاماسىز ەتۋگە 36 ملرد تەڭگە ءبولىندى. بۇل قاراجاتتىڭ ارقاسىندا 3 805 ادام باسپانالى بولادى، ونىڭ ىشىندە 1 865 ازامات – حالىقتىڭ الەۋمەتتىك وسال توپتارى ساناتىنا جاتادى.
اتاپ ايتقاندا، 14,5 ملرد تەڭگەگە 2 550 پاتەرلىك 52 كوپقاباتتى تۇرعىن ءۇي سالىنسا، ونىڭ 50-ءىن (2390 پاتەرلى) جىل سوڭىنا دەيىن اياقتاۋ جوسپارلانۋدا.
بۇدان بولەك، الەۋمەتتىك وسال ساناتتاعى ازاماتتاردى قولداۋ ماقساتىندا رەسپۋبليكالىق بيۋدجەت ەسەبىنەن 21,5 ملرد تەڭگەگە 1 415 جالعا بەرىلەتىن پاتەر ساتىپ الىنباق.
وبلىس اكىمى ءوز سوزىندە قۇرىلىس جۇمىستارىنىڭ ساپاسى مەن مەرزىمىنە قاتىستى جۇيەلى ماسەلەلەردىڭ بار ەكەنىن باسا ايتتى. وسىعان بايلانىستى ءوڭىر باسشىسى جوبالىق-سمەتالىق قۇجاتتامالاردى ازىرلەيتىن كومپانيالاردىڭ جاۋاپكەرشىلىگىن زاڭ اياسىندا قاراستىرۋدى تاپسىردى.
– قۇرىلىس، كۇردەلى جوندەۋ جانە قايتا جاڭعىرتۋعا قاتىستى جوبالىق-سمەتالىق قۇجاتتار ساۋلەت جانە قالاقۇرىلىسى باسقارماسىنا قاراستى «ارت بيۋرونىڭ» مۇقيات ساراپتاماسىنان ءوتۋى قاجەت، – دەدى ەربول قاراشوكەەۆ. – بۇل قۇرىلىم بيۋدجەت قاراجاتىن ءتيىمدى يگەرۋگە جانە جوبالىق قۇجاتتاردى نەگىزسىز قىمباتتاتۋعا جول بەرمەۋگە ءتيىس، – دەپ ناقتىلادى.
سونىمەن بىرگە قۇرىلىس جۇمىستارىنىڭ مەرزىمىنەن كەشىگۋىنە بايلانىستى ەكى نەگىزگى سەبەپتى اتاپ ءوتتى.
– قۇرىلىس جۇمىستارىنىڭ كەشىگۋىنە كوبىنە كەش قارجىلاندىرۋ نەمەسە سوت شەشىمىنىڭ نەگىزىندە توقتاتىلۋى سەبەپ. جىلدىق جوسپارلاۋ ناقتى جۇرگىزىلىپ، مۇمكىندىگى بولا تۇرا مەملەكەتتىك ساتىپ الۋ راسىمدەرىن كەيىنگە قالدىرماۋ كەرەك، – دەدى ءوڭىر باسشىسى. – قۇرىلىس جۇمىستارى سوت شەشىمىمەن بەكەردەن-بەكەر توقتاتىلمايدى. سوندىقتان جوسىقسىز مەردىگەرلەرگە زاڭ اياسىندا ءتيىستى شارالار قولدانىلۋى كەرەك. الداعى ۋاقىتتا «سانى بار، ساپاسى جوق» مەردىگەرلەر ءوز مۇمكىندىگىن ناقتى باعالاپ بارىپ عانا كونكۋرسقا قاتىساتىن بولادى، – دەپ تۇيىندەدى ەربول قاراشوكەەۆ.
اپپاراتىق كەڭەس قورىتىندىسى بويىنشا بيىل جوسپارلانعان قۇرىلىس نىساندارىن باقىلاپ، جۇمىستاردىڭ ساپالى ءارى ۋاقىتىندا اياقتالۋىن قامتاماسىز ەتۋ، تۇرعىن ۇيگە مۇقتاج ازاماتتارعا ارنالعان باسپانالاردى ساتىپ الۋدى جەدەلدەتۋ تاپسىرىلدى.
ءباسپاسوز قىزمەتى