مەملەكەت باسشىسىنىڭ باستاماسىمەن جۇزەگە اسىرىلىپ جاتقان «جايلى مەكتەپ» ۇلتتىق جوباسى اياسىندا قوستاناي وبلىسىنىڭ ارقالىق قالاسىندا جانە جامبىل وبلىسىنىڭ تاراز قالاسىندا تاعى ەكى جايلى مەكتەپ اشىلدى دەلىنگەن اقپاراتتىق حابارلامادا. ارقالىقتاعى مەكتەپ 300 ورىنعا ارنالعان، وندا بالالاردىڭ بويىندا زەرتتەۋشىلىك داعدىلارىن قالىپتاستىرۋ ماقساتىندا زاماناۋي جابدىقتارمەن جاراقتاندىرىلعان 26 وقۋ كابينەتى بار. ايتا كەتەتىنى، مەكتەپتە وقۋشىلاردىڭ IT-قۇزىرەتتىلىگىن، عىلىمي جانە شىعارماشىلىق الەۋەتىن قولداۋ ءۇشىن زاماناۋي روبوتوتەحنيكا كابينەتتەرى، كومپيۋتەرلىك سىنىپتار جانە STEM-زەرتحانالارى دا قاراستىرىلعان. ەستەرىڭىزگە سالا كەتەيىك، جۋىردا وسى ءوڭىردىڭ زارەچنىي اۋىلىندا دا جاڭا جايلى مەكتەپ قولدانىسقا بەرىلگەن بولاتىن. تاراز قالاسىندا دا 1200 ورىندىق جايلى مەكتەپ وقۋشىلارعا ءوز ەسىگىن ايقارا اشتى. مەكتەپ عيماراتىندا ءماجىلىس زالى، 60-قا جۋىق وقۋ كابينەتى، اسحانا، 2 سپورت زالى، 2 لينگافون كابينەتى، 3 زەرتحانا، كىتاپحانا، كومپيۋتەر زالدارى، سونىمەن قاتار 3 شەبەرحانا مەن 10 كوۆوركينگ-ورتالىق بار. بۇل جامبىل وبلىسىندا اشىلىپ وتىرعان ەكىنشى جايلى مەكتەپ. ايتا كەتۋ كەرەك، جىل باسىنان بەرى ەلىمىزدە 84 مىڭ وقۋشى ورنىنا ارنالعان 32 جايلى مەكتەپ اشىلدى.
فوتو اشىق دەرەككوزدەردەن الىندى