عاني بەيسەمباەۆ زاعيپتار مەن ناشار كورەتىن بالالارعا ارنالعان №4 ارنايى مەكتەپ ينتەرناتىندا جۋىردا عانا مەملەكەت باسشىسىنىڭ قولىنان «قازاقستاننىڭ ەڭبەك ەرى» مەملەكەتتىك ناگراداسىن العان ماتەماتيكا ءپانىنىڭ مۇعالىمى گۇلجانار نۇرپەيىسوۆانىڭ ساباعىنا ارنايى باس سۇعىپ، مۇعالىممەن، وقۋشىلارمەن سۇحباتتاستى. ۇستاز ميسسياسىنا ادال پەداگوگ ەرەكشە بالالارمەن جۇمىس جاساۋدى ءوز جۇرەك قالاۋىمەن تاڭداعان.
عاني بەيسەمباەۆ گۇلجانار نۇرپەيىسوۆا سىندى ۇستازداردىڭ ەلىمىزدىڭ ماقتانىشى ەكەنىن، ال ونىڭ كاسىبيلىگى مەن ءوز ىسىنە ادالدىعى كوپشىلىككە ۇلگى-ونەگە ەكەنىن ايتتى.
«بارلىق بالالار ءۇشىن ساپالى بىلىمگە تەڭ قولجەتىمدىلىك - ەلىمىزدىڭ نەگىزگى باسىمدىقتارىنىڭ ءبىرى. وسىعان بايلانىستى ارنايى جانە ينكليۋزيۆتى ءبىلىم بەرۋدىڭ قولجەتىمدىلىگىن قامتاماسىز ەتۋ جانە ساپاسىن ارتتىرۋ ءۇشىن زاڭنامانى جەتىلدىرۋ جونىندەگى جۇمىس جالعاسۋدا. ءوز ەڭبەك جولىن وسىنداي ەرەكشە بالالارعا ارناعان پەداگوگتەرگە ەرەكشە كوڭىل بولىنۋدە. ولاردىڭ كاسىبيلىكپەن قاتار، شىدامدىلىق، ءوز ىسىنە ادالدىق تانىتۋى - ەڭ جوعارى ماراپاتقا لايىقتى. گۇلجانار نۇرپەيىسوۆا سىندى ۇستازدار ناعىز اعارتۋشى، قوعام تورگە وزدىراتىن تۇلعانىڭ قانداي بولۋى كەرەك ەكەنىن ءوز ۇلگىسىمەن دالەلدەپ كەلەدى»، - دەپ اتاپ ءوتتى مينيستر.
اتالعان مەكتەپ-ينتەرناتتا 236 ەرەكشە ءبىلىم بەرۋدى قاجەت ەتەتىن بالا ءبىلىم الادى. وقۋ پروتسەسى ولاردىڭ ەرەكشەلىگىن ەسكەرە وتىرىپ ۇيىمداستىرىلعان، مۇندا بالالاردىڭ ەرەكشەلىكتەرىنە قاراي بەيىمدەلگەن ادىستەمەلىك ماتەريالدار قولدانىلادى.
ەلىمىزدە 496 ارنايى ۇيىمدا ەرەكشە ءبىلىم بەرۋ قاجەتتىلىكتەرى بار بالالارمەن بارلىعى 9 مىڭ پەداگوگ جۇمىس جاسايدى. بالالاردى ارنايى بىلىممەن قامتۋ 84%-عا جەتتى. ايتا كەتۋ كەرەك، بيىلعى جىلدان باستاپ مۇگەدەكتىگى بار بالالار ءۇشىن كوللەدجگە ءتۇسۋ كۆوتاسى 1 پايىزدان 10 پايىزعا ۇلعايتىلدى.