"نۇرلى جول" ۆوكزالىندا ۇلى جەڭىس كۇنىنە وراي استانا قالاسىنىڭ مەملەكەتتىك ءارحيۆىنىڭ ۇيىمداستىرۋىمەن "ەرلىك داستانى" اتتى ارحيۆتىك قۇجاتتاردان جانە سۋرەتتەردەن تۇراتىن كورمە اشىلدى.
ءىس-شاراعا ارحيۆ قىزمەتكەرلەرى، تەمىر جول سالاسىنىڭ ماماندارى مەن باسشىلىعى قاتىستى.
استانا قالاسى مەملەكەتتىك ءارحيۆىنىڭ ديرەكتورى جانگەلدى ءبيمولديننىڭ ايتۋىنشا، بۇل كورمە اقمولادا قۇرىلعان ديۆيزيالار جونىندە سىر شەرتەدى. سونداي-اق وسى وڭىردەن شىققان مايدانگەرلەر، سونىڭ ىشىندە ەكى مارتە كەڭەس وداعىنىڭ باتىرى تالعات بيگەلدينوۆ، رەيحستاگقا جەڭىس تۋىن العاشقى بولىپ تىككەن حالىق قاھارمانى راقىمجان قوشقارباەۆ، كەڭەس وداعىنىڭ باتىرى، تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆ، «داڭق» وردەنىنىڭ تولىق يەگەرى المۇقان سەمبينوۆ سىندى قازاقتىڭ داڭقتى پەرزەنتتەرىنىڭ ەرلىگى مەن ەڭبەگىن ۇلىقتاۋعا ارنالدى.
ەلىمىزدە ەكىنشى دۇنيەجۇزىلىك سوعىس ورتىنە شارپىلماعان اۋەلەت جوق شىعار. سول سياقتى اقمولاداعى ءبىر وتباسىنان التى بىردەي ادامنىڭ سوعىسقا اتتانعانى تۋرالى دا قۇجاتتار كورمەگە قويىلدى.
مەرەكەگە وراي ارنايى تاقىرىپتىق ستەندتەر ءىلىنىپ، تاريحي جادىنى جاڭعىرتۋعا باعىتتالعان مازمۇنداعى اقپاراتتىق ماتەريالدار كوپشىلىك نازارىنا ۇسىنىلدى.
بۇل كورمەنى 12 مامىردان باستاپ 15 مامىرعا دەيىن «جىبەك جولى» ساۋدا ۇيىنەن دە تاماشالاۋعا بولادى.