ءىس-شاراعا جامبىل وبلىسىنىڭ اكىمى ەربول قاراشوكەەۆ، قر پرەزيدەنتى اكىمشىلىگىنىڭ مەملەكەتتىك ينسپەكتورى باعلان قازيەۆ، اۋدان اكىمى ەرنار ەسىركەپوۆ، سونداي-اق اۋداندىق قوعامدىق جانە ارداگەرلەر كەڭەستەرىنىڭ توراعالارى مەن بەلسەندى جاستار قاتىستى.
وبلىس اكىمى ەربول قاراشوكەەۆ ءوز سوزىندە تابيعي سۋ كوزدەرىن قورعاۋعا باعىتتالعان «ءمولدىر بۇلاق» اكتسياسى «تازا قازاقستان» تۇجىرىمداماسىنىڭ ماڭىزدى بولىگىنە اينالعانىن اتاپ ءوتتى.
– حالقىمىزدا «بۇلاق كورسەڭ، كوزىن اش» دەگەن ناقىل ءسوز بار. بۇل اكتسيا وسكەلەڭ ۇرپاقتىڭ ەكولوگيالىق مادەنيەتىن قالىپتاستىرۋعا ىقپال ەتەدى. بارشا قاتىسۋشىلارعا العىسىمدى بىلدىرەمىن. الداعى ۋاقىتتا دا وسىنداي يگى ىستەر جالعاسىن تاباتىنىنا سەنىمدىمىن، – دەدى ءوڭىر باسشىسى.
بۇدان كەيىن اۋداندىق ارداگەرلەر كەڭەسىنىڭ توراعاسى قوجايحان بيجانوۆ اق باتاسىن بەردى.
اكتسيا اياسىندا قۇلان اۋىلىنداعى ءسۇلۋتور تاۋ بوكتەرىندە بۇلاق كوزى اشىلىپ، اۋماقتى اباتتاندىرۋ جانە كوگالداندىرۋ جۇمىستارى جۇرگىزىلدى.
– بۇگىن قۇلاندىق جاستار جاۋىن-شاشىنعا قاراماستان بىرىگىپ، بۇلاقتىڭ كوزىن اشىپ، اينالاسىن كۇل-قوقىستان تازارتتى. بۇل – تۋعان جەر الدىنداعى ورتاق پارىزىمىز، – دەدى بەلسەندى جاس جاندوس رۋسلان.
ايتا كەتەيىك، جامبىل وبلىسىندا جىل باسىنان بەرى «تازا قازاقستان» جالپىحالىقتىق ەكولوگيالىق اكتسياسىنا 18 مىڭنان استام ادام جانە 850 كاسىپورىن مەن مەكەمە قاتىستى.
سەنبىلىكتەر بارىسىندا 45,8 مىڭ ءتۇپ جاسىل جەلەك وتىرعىزىلىپ، 1,8 مىڭ شاقىرىم كوشە جولدارى، 410 شاقىرىم ارىق جۇيەلەرى مەن كانالدار، سونداي-اق 72,4 مىڭ شارشى مەتر ساياباقتار مەن سكۆەرلەردىڭ اۋماعى تازالاندى. سونىمەن قاتار 1,8 مىڭ توننا كۇل-قوقىس شىعارىلدى.
اكىمدىكتىڭ ءباسپاسوز قىزمەتى