الەۋمەتتىك جەلىلەر مەن مەسسەندجەرلەردە بالا 1,5 جاسقا تولعاننان كەيىن ايەلدەردىڭ جۇمىسسىزدىق بويىنشا الەۋمەتتىك تولەمدەردى راسىمدەي الاتىنى تۋرالى شىندىققا سايكەس كەلمەيتىن اقپارات تارالۋدا.
مۇنداي حابارلامالاردىڭ اۆتورلارى ازاماتتارعا التى اي بويى تولەم الۋ ءۇشىن مانساپ ورتالىعىندا جۇمىسسىز رەتىندە تىركەلۋدى ۇسىنادى.
قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى بۇل «سحەمانىڭ» زاڭدى نەگىزى جوق ەكەنىن جانە ول ازاماتتاردى جاڭىلىستىراتىنىن رەسمي تۇردە تۇسىندىرەدى.
قولدانىستاعى زاڭناماعا سايكەس، بالا كۇتىمى بويىنشا دەمالىستا وتىرعان ايەلدىڭ جۇمىس ورنى ساقتالادى، سوندىقتان ول جۇمىسسىز دەپ تانىلمايدى. جۇمىسسىز مارتەبەسى تەك ناقتى جۇمىس ىزدەپ جۇرگەن جانە جۇمىسقا كىرىسۋگە دايىن ادامدارعا عانا بەرىلەدى.
سونداي-اق جۇمىسىنان ايىرىلۋ بويىنشا الەۋمەتتىك تولەم تەك مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا تاعايىندالاتىنىن ەسكە سالامىز. ولار جۇمىسسىز رەتىندە تىركەلىپ، بەلگىلەنگەن تالاپتاردى ورىنداۋى ءتيىس. تولەم الۋشى جۇمىسقا ورنالاسقان جاعدايدا بۇل تۋرالى مانساپ ورتالىعىن ۋاقتىلى حاباردار ەتۋگە مىندەتتى. ەگەر جالعان مالىمەتتەر ۇسىنىلسا، تولەنگەن قاراجات زاڭنامادا بەلگىلەنگەن تارتىپپەن قايتارىلاتىن بولادى.
مينيسترلىك سونداي-اق الەۋمەتتىك تولەمدەردى الۋ ماقساتىندا ادەيى جالعان مالىمەتتەر بەرۋ الاياقتىق رەتىندە باعالانۋى مۇمكىن ەكەنىن ەسكەرتەدى. وسىنداي جالعان نۇسقاۋلىقتاردى تاراتاتىن تۇلعالار دا جاۋاپكەرشىلىككە تارتىلۋى ىقتيمال.
2025 جىلى ەلىمىزدىڭ 12 وڭىرىندە الاياقتىق فاكتىلەرى بويىنشا 30-دان استام قىلمىستىق ءىس قوزعالدى. بەس وڭىردە قازىردىڭ وزىندە 7 سوت ۇكىمى شىعارىلدى. تەرگەۋ بارىسىندا ازاماتتاردىڭ الەۋمەتتىك جەلىلەردەگى (سونىڭ ىشىندە Instagram-داعى) جارنامالىق جاريالانىمدارعا سەنىپ، الەۋمەتتىك تولەمدەردى زاڭسىز الۋ سحەمالارىنا تارتىلعانى انىقتالدى.
وسىعان بايلانىستى ازاماتتاردى مەسسەندجەرلەر مەن الەۋمەتتىك جەلىلەردەگى بەيتانىس ادامدارعا سەنبەۋگە، جەكە دەرەكتەرىن بوگدە تۇلعالارعا بەرمەۋگە جانە اقپاراتتىڭ تەك رەسمي كوزدەرىن پايدالانۋعا شاقىرامىز.
الەۋمەتتىك قولداۋ شارالارى تۋرالى تولىق اقپارات enbek.gov.kz سايتىندا، مينيسترلىكتىڭ الەۋمەتتىك جەلىلەردەگى رەسمي اككاۋنتتارىندا، سونداي-اق 1414 ءنومىرى بويىنشا بايلانىس ورتالىعى ارقىلى قولجەتىمدى.