دۇنيەجۇزىلىك دەنساۋلىق ساقتاۋ ۇيىمى «يممۋندىق پاترۋل» اتتى ءبىلىم بەرۋ ويىنىن ىسكە قوستى. وسى ارقىلى الەمنىڭ تۇكپىر-تۇكپىرىندەگى وقۋشىلارعا ۆيرۋستاردىڭ، يممۋنيتەتتىڭ جانە ۆاكتسيناتسيانىڭ قالاي جۇمىس ىستەيتىنى تۇسىندىرىلەدى. پلاتفورما قازاق تىلىنە دە اۋدارىلعان. استانادا №113 جايلى مەكتەپتىڭ 8-سىنىپ وقۋشىلارى وزدەرىن سىناپ كوردى
الدىمەن وقۋشىلارعا ۆيرۋستاردىڭ نە ەكەنى جانە ولاردىڭ قالاي تارالاتىنى ءتۇسىندىرىلدى، كەيىن تسيفرلىق پلاتفورما كورسەتىلىپ، سىنىپ تاجىريبەلىك بولىمگە ءوتتى.
«يممۋندىق پاترۋل» باعدارلاماسىندا وقۋ ماتەريالى ويىن سيمۋلياتسياسىنا ەنگىزىلگەن. وقۋشىلار شاعىن توپتارعا ءبولىنىپ، كومپيۋتەرلەردە جۇمىس ىستەي باستادى. ەكراندا ينفەكتسيالاردىڭ اعزاعا ەنۋى مودەلدەنەدى، ال قاتىسۋشىلاردىڭ مىندەتى – يممۋندىق جۇيەنىڭ قالاي ارەكەت ەتەتىنىن جانە قانداي مەحانيزمدەر ىسكە قوسىلاتىنىن ءتۇسىنۋ.
وقۋ بارىسىندا بالالار ناقتى ەلەمەنتتەردى مەڭگەرەدى. ماسەلەن، دەندريتتىك جاسۋشالاردىڭ قالاي ارەكەت ەتەتىنى، ت- جانە ۆ-ليمفوتسيتتەردىڭ ايىرماشىلىعى، انتيدەنەلەردىڭ قالاي تۇزىلەتىنى جانە فاگوتسيتتەردىڭ قانداي ءرول اتقاراتىنى قاراستىرىلادى. بۇل پروتسەستەردىڭ بارلىعى شەشىم قابىلداۋدى تالاپ ەتەتىن ستسەناريدىڭ ءبىر بولىگىنە اينالادى جانە ونىڭ ناتيجەسى بىردەن كورىنەدى.
سيۋجەتتىك قۇرىلىم «اكادەميا» فورماتىندا جاسالعان، وندا وقۋشىلار ينفەكتسيالارمەن كۇرەسۋ ءۇشىن دايىندىقتان وتەدى. ءار مودۋل قىسقاشا كىرىسپەدەن، سىنىپتاعى تالقىلاۋدان جانە پراكتيكالىق تاپسىرمادان تۇرادى.
مۇنداي فورمات تەوريانى تىڭداپ قانا قويماي، ونى بىردەن تاجىريبەدە تەكسەرۋگە مۇمكىندىك بەرەدى.
باعدارلاما سونىمەن قاتار ۆاكتسيناتسيا، ۇجىمدىق يممۋنيتەت، اۋرۋلاردىڭ تارالۋى جانە ۆاكتسينالاردى ازىرلەۋ سياقتى كەڭ اۋقىمدى تاقىرىپتاردى قامتيدى. اقپاراتتى سىني باعالاۋعا دا ەرەكشە كوڭىل بولىنەدى – ونىڭ ىشىندە شىنايى دەرەكتەردى بۇرمالانعان نەمەسە جالعان اقپاراتتان اجىراتۋ ماسەلەسى قاراستىرىلادى.
«يممۋندىق پاترۋل» دانيا، فرانتسيا، ارمەنيا، مولدوۆا، تۇركيا جانە ەۋروپانىڭ باسقا دا ەلدەرىندە ءساتتى ەنگىزىلىپ، بالالاردىڭ دەنساۋلىق ساۋاتتىلىعىن ارتتىرۋدا ايتارلىقتاي ناتيجە كورسەتكەن.
«بۇرىن ۆيرۋستاردىڭ نە ەكەنىن جانە ولاردىڭ قالاي اسەر ەتەتىنىن تولىق تۇسىنبەيتىنمىن، ال مۇندا ءبارى ناقتى پروتسەسس ارقىلى كورسەتىلگەندىكتەن، الدەقايدا تۇسىنىكتى بولدى»، – دەدى ادىلەت ەسىمدى 8-سىنىپ وقۋشىسى.
وقۋشىلاردىڭ ايتۋىنشا، بۇل فورمات قىزىقتى عانا ەمەس، سونىمەن قاتار پايدالى بولعان.
«يممۋنيتەتتىڭ قالاي جۇمىس ىستەيتىنىن جانە ونى نە ءۇشىن قولداۋ كەرەكتىگىن تۇسىندىك. ەندى ەكپەنىڭ نە ءۇشىن قاجەت ەكەنىن جانە ونىڭ اعزانى قالاي قورعايتىنىن بىلەمىز»، – دەيدى ولار.