استاناداعى Coventry University Kazakhstan الاڭىندا كلاسسيكالىق شاحماتتان ەرلەر مەن ايەلدەر اراسىنداعى 2026 جىلعى قازاقستان رەسپۋبليكاسىنىڭ چەمپيوناتى ءوز مارەسىنە جەتتى. ەل بىرىنشىلىگىندە 15 جاستاعى استانالىق شاحماتشى ساۋات نۇرعاليەۆ سەنساتسيالىق ناتيجە كورسەتىپ، قازاقستان چەمپيونى اتاندى
جاس سپورتشى 13 تۋر قورىتىندىسى بويىنشا 5 جەڭىس، 8 تەڭ ويىن كورسەتىپ، بىردە-ءبىر پارتيادا جەڭىلمەي، 9 ۇپاي جينادى.
ناتيجەسىندە ول قازاقستان چەمپيونى اتانىپ، وسى جىلدىڭ ەڭ ۇزدىك شاحماتشىسى اتاعىن يەلەندى.
سونداي-اق ەرلەر اراسىنداعى جارىستا تاعى ءبىر ەلوردالىق شاحماتشى جاندوس اقمانوۆ 8,5 ۇپايمەن كۇمىس جۇلدەگە قول جەتكىزدى. ال قولا جۇلدە الماتىلىق رامازان جالماحانوۆتىڭ ەنشىسىنە بۇيىردى.
ايەلدەر اراسىنداعى دودا سوڭعى سەكۋندتارعا دەيىن تارتىستى ءوتتى. ءتورت شاحماتشىنىڭ ۇپايى تەڭ ءتۇسىپ، چەمپيون تاعدىرى قوسىمشا كورسەتكىشتەر مەن تاي-برەيك ارقىلى شەشىلدى. راپيد جانە بليتس ويىندارىنىڭ ناتيجەسىندە استانالىق مەرۋەرت كاماليدەنوۆا كۇمىس جۇلدەگەر اتاندى. ءبىرىنشى ورىندى اتىراۋلىق سپورتشى زارينا نۇرعاليەۆا يەلەنسە، قولا جۇلدە شىمكەنتتىك شاحماتشى ەلناز قالياحمەتكە بۇيىردى.
ايتا كەتەيىك، بۇل چەمپيونات ۇلتتىق قۇراماعا ىرىكتەۋدىڭ ماڭىزدى كەزەڭى سانالادى. سونداي-اق جەڭىمپازدار قازاقستان اتىنان حالىقارالىق جارىستاردا، سونىڭ ىشىندە دۇنيەجۇزىلىك شاحمات وليمپياداسىندا ونەر كورسەتۋ مۇمكىندىگىنە يە بولادى.