"ەلوردادا اۋا رايى جىلىنعان ۋاقىتتان باستاپ جولداردى اباتتاندىرۋ، كوگالداندىرۋ جانە جوندەۋ جۇمىستارى باستالدى.
بيىل 60-تان استام كوشەنى جوندەۋدى جوسپارلاپ وتىرمىز. جول جۇمىسى ەلدى مەكەندەردەگى جولداردى دا قامتيدى. قالانى ارالاۋ بارىسىندا بىرقاتار جولدىڭ سالىنۋ بارىسىمەن تانىستىم.
قازىرگى ۋاقىتتا ەلدى مەكەندەردەگى مىنا كوشەلەردە جوندەۋ جۇمىسى باستالدى: جاڭاقونىس، قارتالى، فاحتبەن ابدۋل ازيز، گەرتسەن، بوكەەۆ جانە ت.ب. سول سياقتى الاش تاسجولىنىڭ 69-كوشەدەن 191-كوشەگە دەيىن، قورعالجىن تاسجولىنىڭ تۇران داڭعىلىنان 128-كوشەگە دەيىن، كەرەي جانىبەك حاندار كوشەسىنىڭ ساۋران كوشەسىنەن مۇرتازا كوشەسىنە دەيىن جانە ت.ب.
بۇدان وزگە، بيىل ۇزىندىعى 14,7 كم بولاتىن 43 نىساننىڭ قۇرىلىسى جوسپارلانىپ وتىر. 8 جوبا بويىنشا جۇمىس تولىق كولەمدە اياقتالادى، 28 جوبا بويىنشا ارى قاراي جالعاسادى، تاعى 7 نىساننىڭ جۇمىسى باستالادى، ونىڭ ىشىندە:
- ق.قايسەنوۆ كوشەسى بۇقار جىراۋ كوشەسىنەن ۇلى دالا داڭعىلىنا دەيىن;
- بۇقار جىراۋ كوشەسى ءال-فارابي داڭعىلىنان جوشى حان كوشەسىنە دەيىن;
- رىسقۇلوۆ كوشەسى ماڭگىلىك ەل داڭعىلىنان نۇرا-ەسىل ارناسىنا دەيىن;
- تاۋەلسىزدىك داڭعىلى قابانباي باتىر داڭعىلى جاعىنان جانە ت.ب.
سونداي-اق، قازىرگى ۋاقىتتا تىلەنديەۆ داڭعىلى مەن بەيسەكوۆ كوشەسىنىڭ قيىلىسىندا ەكى دەڭگەيلى كولىك ايرىعىن سالۋ جوباسى جۇزەگە اسىپ جاتىر. بۇل – قالانىڭ نەگىزگى ماگيسترالدارىنىڭ بىرىندە كولىك اعىنىن وڭتايلاندىرۋعا ارنالعان ماڭىزدى ينفراقۇرىلىمدىق نىسان. جوبا قيىلىستا كولىك قوزعالىسىن ەداۋىر جىلدامداتىپ، جول ءجۇرۋ ۋاقىتىن قىسقارتادى.
بيىل بەيسەكوۆ كوشەسىنىڭ بويىندا تىلەنديەۆ داڭعىلى ارقىلى تولىققاندى قوزعالىستى قامتاماسىز ەتەتىن وتپە جولدار مەن سەزدەردىڭ مەتالل ارالىقتارىنىڭ قۇرىلىسىن اياقتاۋ جوسپارلانىپ وتىر.
سونىمەن قاتار، ايتماتوۆ كوشەسى مەن قورعالجىن تاسجولىنىڭ قيىلىسىندا كولىك اعىنىن سەيىلتۋ ءۇشىن جىل سوڭىنا دەيىن قوزعالىستى قامتاماسىز ەتە وتىرىپ، ق.مۇحامەدحانوۆ كوشەسىن سالۋ جوباسىن ىسكە اسىرۋ جۇرگىزىلىپ جاتىر.
جول جۇمىسى جول توسەمىنىڭ ساپاسىن جاقسارتۋعا عانا ەمەس، سول سياقتى قوزعالىس قاۋىپسىزدىگى مەن تۇرعىنداردىڭ جايلىلىعىن ارتتىرۋعا باعىتتالعان. سونداي-اق، جوسپارلانعان جۇمىستاردىڭ قاتارىندا جاڭا تروتۋارلار سالۋ، ايالدامالارعا كىرمە تۇستاردى، پاندۋستاردى جانە ت.ب. جايلاستىرۋ بار" ، - دەپ جازدى جەڭىس قاسىمبەك.