ەڭسەلى ەلوردامىزدا ءدۇبىرلى دودالاردا توپ جارىپ، قالامىزبەن قاتار ەلىمىزدىڭ ابىرويىن اسقاقتاتىپ جۇرگەن ساڭلاقتار جەتەرلىك.
2025 جىلدىڭ 1-جارتىجىلدىعىندا قالا قۇراماسىنىڭ سپورتشىلارى 5000-نان استام ءتۇرلى مەدالعا يە بولدى (التىن – 1956, كۇمىس – 1706, قولا-1613). تەك قالالىق دەڭگەيدەگى جارىستاردا سپورتشىلار 1255 جۇلدەلى ورىن يەلەنسە، رەسپۋبليكالىق دەڭگەيدەگى جارىستاردا — 3374 مەدال، ال حالىقارالىق جارىستاردا 646 مەدال جەڭىپ الدى. بۇل تۋرالى استانانىڭ كوممۋنيكاتسيالىق قىزمەت الاڭىندا وتكەن بريفينگتە دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ازامات اعزاموۆ ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.
ازامات اعزاموۆتىڭ ايتۋىنشا، استانا قالاسىنىڭ قۇراما كومانداسىنىڭ سپورتشىلارى 1308 سپورتتىق ءىس-شاراعا قاتىستى. اتاپ ايتقاندا:
• قالالىق جارىستار – 54,
• رەسپۋبليكالىق جارىستار – 661,
• حالىقارالىق جارىستار – 266,
• وقۋ-جاتتىعۋ جيىندارى – 327.
ەلوردالىق سپورتشىلاردىڭ الەمدىك دودالارداعى جەڭىستەرى مەن جوعارى ناتيجەلەرى ەلىمىزدەگى سپورت سالاسىنىڭ قارقىندى دامىپ كەلە جاتقانىنىڭ بىردەن-ءبىر دالەلى. ولار ەلىمىزدىڭ كوك تۋىن كوكتە جەلبىرەتىپ، «قازاقستان» اتاۋىن دۇنيەجۇزىنە تانىتىپ، ەل ابىرويىن اسقاقتاتىپ ءجۇر.
اتاپ وتسەك، اقپان ايىندا استانا قالاسىنىڭ قۇراما كومانداسى حاربين قالاسىندا وتكەن IX قىسقى ازيا ويىندارىندا باق سىنادى. جارىستار جالپى 11 سپورت ءتۇرى بويىنشا ۇيىمداستىرىلدى. قازاقستان رەسپۋبليكاسىنىڭ ۇلتتىق قۇراماسى ساپىندا ونەر كورسەتكەن استانا قالاسىنىڭ كومانداسى بەس سپورت تۇرىنەن 37 سپورتشىمەن ۇسىنىلدى: شايبالى حوككەي، شورت-ترەك، كونكيمەن جۇگىرۋ، مانەرلەپ سىرعاناۋ جانە كەرلينگ. استانا قالاسىنىڭ سپورتشىلارى كەشەندى جارىستىڭ قورىتىندىسى بويىنشا 6 مەدال جەڭىپ الدى.
سونىمەن قاتار، ءتورت جىلدا ءبىر رەت وتەتىن VI قىسقى سپارتاكيادادا استانا قالاسىنىڭ قۇراماسى جالپىكوماندالىق ەسەپتە 2-ورىندى يەلەنىپ، 14 التىن، 15 كۇمىس جانە 6 قولا مەدال جەڭىپ الدى. ءۇش ايعا سوزىلعان تارتىستى دودادا ەلوردامىزدىڭ نامىسىن 7 سپورت ءتۇرى بويىنشا 70 سپورتشى قورعادى.
اممان قالاسىندا وتكەن بوكستان جاسوسپىرىمدەر اراسىنداعى ازيا چەمپيوناتىندا (U15 جانە U17) ەلوردالىق دوسجان جۇماقان مەن سانجار ماتاسوۆ قازاقستاننىڭ نامىسىن ابىرويمەن قورعاپ، التىن مەدالعا يە بولدى.
2025 جىلدىڭ 1–30 ماۋسىمى ارالىعىندا تىرەك-قيمىل اپپاراتى، كورۋ ورگاندارى زاقىمدالعان جانە ينتەللەكتۋالدىق دامۋ ەرەكشەلىكتەرى بار سپورتشىلار اراسىندا قازاقستان رەسپۋبليكاسىنىڭ VII سپارتاكياداسى ءوتتى. اتالعان جارىستا استانا قالاسى جالپىكوماندالىق ەسەپتە 1-ورىندى يەلەندى.
ەلوردا تورىندە گرەك-ريم، ەركىن جانە ايەلدەر كۇرەسىنەن قازاقستان رەسپۋبليكاسىنىڭ كۋبوگى ءوتتى. بۇل ءدۇبىرلى دودادا استانا قالاسىنىڭ نامىسىن قورعاعان گرەك-ريم كۇرەسىنىڭ ساڭلاقتارى ەرەكشە تاباندىلىق پەن قايسار مىنەز كورسەتىپ، جالپىكوماندالىق ەسەپتە كوش باستاپ، 1-ورىنعا يە بولدى. بوزكىلەم شەبەرلەرى 2 التىن، 2 كۇمىس جانە 3 قولا مەدالدى قانجىعالارىنا بايلادى.
سونداي-اق استانادا ەرلەر مەن ايەلدەر اراسىندا بوكستان الەم كۋبوگى ءوتتى. بۇل – وليمپيادالىق WORLD BOXING ۇيىمىنىڭ قازاقستانداعى العاشقى جارىسى. بۇل بەدەلدى باسەكەدە استانانىڭ نامىسىن ءۇش سپورتشىمىز قورعادى: سانجار تاشكەنباي مەن اعايىندى ايبەك جانە نۇربەك ورالبايلار. ناتيجەسىندە:
سانجار تاشكەنباي – التىن مەدال،
نۇربەك ورالباي – كۇمىس مەدال،
ايبەك ورالباي – اسا اۋىر سالماقتا التىن مەدال يەلەندى.
وسىلايشا قازاقستان ءوز جەرىندە وتكەن الەم كۋبوگىن سەگىز التىن مەدالمەن قورىتىندىلاپ، ەل مەرەيىن اسقاقتاتتى.
استانادا وتكەن اۋىر اتلەتيكادان جاسوسپىرىمدەر مەن جاستار اراسىنداعى ازيا چەمپيوناتىندا قوس سپورتشىمىز جۇلدەگەر اتاندى. اتاپ ايتساق، تالانتتى سپورتشىمىز ەدىگە ەمبەردى ازيا رەكوردىمەن جاستار اراسىندا ازيا چەمپيونى اتاندى. ول سەرپە كوتەرۋ مەن قوسسايىس ناتيجەسىندە ەكى بىردەي ازيا رەكوردىن جاڭارتتى. تاعى ءبىر سپورتشىمىز اڭسار تۇرسىمبەك +94 كەلىدەن جوعارى سالماق دارەجەسىندە ەل نامىسىن قورعاپ، سەرپە كوتەرۋدە 182 كەلى، ال قوسسايىستا 326 كەلىنى (144+182) ەڭسەرىپ، ەكى كۇمىس مەدال جەڭىپ الدى.
كۇنى كەشە سوفيادا وتكەن الەم چەمپيوناتىندا ەلىمىزدىڭ اتىن اسقاقتاتقان كوركەم گيمناستيكا شەبەرى اقمارال ەرەكەشەۆا قوس التىن جانە ءبىر كۇمىس مەدال جەڭىپ الىپ، قازاقستان سپورت تاريحىنا جارقىن ءىز قالدىردى.
قازىرگى ۋاقىتتا ەلىمىزدە قازاقستان رەسپۋبليكاسىنىڭ جاستار سپورت ويىندارى ءوتىپ جاتىر. قازىرگى تاڭدا استانا قالاسىنىڭ قۇراماسى جالپىكوماندالىق ەسەپتە 2-ورىندا كەلەدى - دەيدى.
سونداي-اق باسقارما باسشىسىنىڭ مىندەتىن اتقارۋشى ازامات اعزاموۆ بريفينگ بارىسىندا ەلوردالىق سپورتشىلاردىڭ الداعى جارىستارى تۋرالى باياندادى.
وسى سىندى جەتىستىكتەرىمىز كۇن ساناپ ارتىپ، ەل سپورتىنىڭ دامۋىنا ۇلكەن ۇلەس قوسۋدا. بۇل – ەسەلى ەڭبەك پەن ءتالىم بەرگەن باپكەرلەردىڭ جەمىسى.
البەتتە، وزگە دە ساڭلاق سپورتشىلارىمىز جەتەرلىك - دەدى ازامات اعزاموۆ.
ءباسپاسوز قىزمەتى