شىمكەنتتە ەگىن وراعى تولىعىمەن اياقتالدى. اۋىل شارۋاشىلىعى مينيسترلىگىنىڭ جەدەل دەرەكتەرىنە سايكەس، قازىردىڭ وزىندە 1,7 ملن گەكتار استىق جينالدى، بۇل جالپى ەگىن القابىنىڭ 10,7%-ىن قۇرايدى جانە 2,4 ملن توننا استىق باستىرىلدى.
ەگىن جيناۋ جۇمىستارىنا 300 مىڭنان استام تەحنيكا: 139 مىڭ تراكتور، 31 مىڭ كومباين، 17 مىڭ استىق جيناۋ ماشينا جانە 130 مىڭ باسقا دا تەحنيكالار جۇمىلدىرىلدى.
ەنەرگەتيكا مينيسترلىگىمەن بىرلەسىپ، ديزەل وتىنىن تيەپ جونەلتۋ بويىنشا مۇناي وڭدەۋ زاۋىتتارىنا وڭىرلەردى ءبولۋ كەستەسى بەكىتىلدى. سونىڭ ارقاسىندا اۋىل شارۋاشىلىعى تاۋارىن وندىرۋشىلەرى ديزەل وتىنىن ليترىنە 254 تەڭگەدەن الىپ وتىر، بۇل نارىقتاعى باعادان 18-20%-عا تومەن. قازىرگى ۋاقىتتا 135,4 مىڭ توننا جانارماي جونەلتىلدى.
ديقاندار جوسپارداعى مينەرالدى تىڭايتقىشتارمەن 89% قامتاماسىز ەتىلگەن، جالپى 1,7 ملن توننا تىڭايتقىش جەتكىزىلدى. قويمالاردا تاعى 43,3 مىڭ توننا تىڭايتقىش بار.
مەملەكەت باسشىسىنىڭ تاپسىرماسى بويىنشا العاش رەت 2024 جىلى ەگىس جانە جيىن-تەرىم ناۋقانىن ەرتە قارجىلاندىرۋ باعدارلاماسى ىسكە قوسىلدى. بۇگىندە فەرمەرلەردى قارجىلاندىرۋ جالعاسۋدا:
جەڭىلدەتىلگەن نەسيەلەۋ باعدارلاماسى بويىنشا 502,7 ملرد تەڭگەگە 7594 ءوتىنىم بەرىلدى،
«جەڭىلدىكتى ليزينگ» باعدارلاماسى بويىنشا 153,4 ملرد تەڭگەگە كەلىسىم-شارت جاسالدى،
«دامۋ» قورى ارقىلى 228 ملرد تەڭگەگە 1312 كەپىلدىك بەرىلدى.
جينالعان ەگىننىڭ ساقتالۋىن قامتاماسىز ەتۋ ءۇشىن ەلەۆاتورلاردىڭ جاڭا ءونىمدى قابىلداۋعا دايىندىعىنا تۇراقتى باقىلاۋ جۇرگىزىلەدى.
وبلىس اكىمدىكتەرىنىڭ دەرەكتەرى بويىنشا رەسپۋبليكاداعى استىق ساقتاۋ قويمالارىنىڭ جالپى سىيىمدىلىعى 30,7 ملن توننانى قۇرايدى، ونىڭ ىشىندە جۇمىس ىستەپ تۇرعان ليتسەنزياسى بار استىق قابىلداۋ كاسىپورىندارىندا (اقك) – 13,3 ملن توننا، اۋىل شارۋاشىلىعى تاۋارىن وندىرۋشىلەردە – 17,4 ملن توننا.
ساقتاۋ سىيىمدىلىعىنىڭ كورسەتىلگەن كولەمى وتكەن جىلداردىڭ اۋىسپالى قالدىقتارىن ەسكەرە وتىرىپ، جينالعان ەگىندى ساقتاۋعا جەتكىلىكتى. ليتسەنزيالانعان استىق قويمالارىنىڭ تولتىرىلۋ كورسەتكىشى 2,2 ملن توننانى نەمەسە 16%-دى قۇرايدى. ەلەۆاتورلار مەن استىق قويمالارىندا ورىن تاپشىلىعى جوق.
2025 جىلعى ەگىن جيناۋ ناۋقانىنىڭ بارىسى ۇكىمەتتىڭ تۇراقتى باقىلاۋىندا.