ارنايى وپەراتسيانى ۇقك قىزمەتكەرلەرى پروكۋراتۋرا ورگاندارىنىڭ ۇيلەستىرۋىمەن جانە قر ءىىم ۇلتتىق ۇلانىنىڭ "بۇركىت" ارنايى ماقساتتاعى بولىمشەلەرىنىڭ كۇشتىك قولداۋىمەن جۇرگىزدى.
تەرروريزمدى ناسيحاتتاپ، ءدىني الاۋىزدىقتى قوزدىردى، ونىڭ ىشىندە الەۋمەتتىك جەلىلەر ارقىلى دەگەن كۇدىكپەن 4 قازاقستاندىق ۇستالدى، ولاردىڭ بىرەۋى بۇرىن سوتتىلى بولعان.
تۇرعىن ۇيلەرىن ءتىنتۋ بارىسىندا زاتتاي دالەلدەمەلەر الىندى. قىلمىستىق كودەكستىڭ 174 جانە 256-باپتارى بويىنشا سوتقا دەيىنگى تەرگەپ-تەكسەرۋلەر جۇرگىزىلۋدە.
قىلمىستىق-پروتسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتۋگە جاتپايدى.
بۇدان بولەك، ۇقك بۇرىن تەرگەگەن قىلمىستىق ىستەر بويىنشا سوت اقتوبە، قاراعاندى جانە تۇركىستان وبلىستارىنىڭ 3 تۇرعىنىنا قاتىستى ايىپتاۋ ۇكىمدەرىن شىعاردى. سوتتالعاندار الەۋمەتتىك جەلىدە جانە اينالاسىندا تەرروريزم مەن ءدىني ەكسترەميزم يدەولوگياسىن تاراتقان.