«اناعا تاعزىم» ورتالىعىندا ۇلتتىق قولونەردى زاماناۋي تەحنولوگيالارمەن ۇشتاستىرىپ، كرەاتيۆتى كاسىپكەرلەردىڭ جاڭا ءونىم ازىرلەۋىنە مۇمكىندىك بەرگەن «Creative Battle: AI × ۇلتتىق قولونەر» سايىسى ءوز مارەسىنە جەتتى. حاكاتون جانە باتتل ەلەمەنتتەرىن بىرىكتىرگەن جوبا ماقساتى – ۇلتتىق مادەني مۇرانى ساقتاي وتىرىپ، جاڭا يدەيالار نەگىزىندە سىر ءوڭىرىنىڭ برەندتىك ەرەكشەلىگىن ايقىندايتىن، نارىق سۇرانىسىنا ساي جاڭا ونىمدەردى ازىرلەۋگە قولداۋ كورسەتۋ.
جوبا اياسىندا الدىمەن قاتىسۋشىلار ءۇشىن اكسەلەراتسيالىق كەزەڭ ۇيىمداستىرىلىپ، ولار ءوز يدەيالارىن جەتىلدىرۋ، ءونىم تۇجىرىمداماسىن قالىپتاستىرۋ جانە ونى نارىققا بەيىمدەۋ باعىتىندا پراكتيكالىق جۇمىستار جۇرگىزدى.
ال ىرىكتەۋ كەزەڭىندە قاتىسۋشى كوماندالار «سىردان سىي» تاقىرىبى اياسىندا ازىرلەگەن ونىمدەرىن تانىستىرىپ، ولاردىڭ سىر ءوڭىرىنىڭ برەندتىك ەرەكشەلىگىن قالاي كورسەتەتىنىن قازىلار القاسىنىڭ الدىندا قورعادى. ناتيجەسىندە قازىلار القاسىنىڭ شەشىمىمەن «Creative queens»، «ورنەك»، «Korik-ai»، «تۇمار»، «سىر ءورىمى» جانە «Aydia» كوماندالارى فينالدىق كەزەڭگە جولداما الدى.
وڭىردەگى كرەاتيۆتى يندۋستريانى دامىتۋعا باعىتتالعان جوبا ەرەجەسىنە ساي فينالدىق كەزەڭدە قاتىسۋشىلار قر ەكونوميكالىق قىزمەت تۇرلەرىنىڭ جالپى جىكتەۋىشىنە (وكەد) سايكەس دايىن توقىما بۇيىمدارى، ۇلتتىق كيىم جانە اكسەسسۋارلار، بىلعارى بۇيىمدار، اعاشتان جانە تابيعي ماتەريالداردان جاسالعان بۇيىمدار، كەراميكالىق تۇرمىستىق جانە ساندىك بۇيىمدار، زەرگەرلىك بۇيىمدار سونداي-اق، كادەسىي جانە وزگە دە دايىن بۇيىمدار باعىتتارى بويىنشا ءوز جۇمىستارىن ۇسىندى. دايىن بۇيىمداردى قايتا وڭدەۋ ارقىلى جاڭا ءونىم جاساۋ قابىلەتتەرىن دە تانىتتى.
قولونەر شەبەرى، ديزاينەر جانە جي مامانىنان قۇرالعان كوماندالار جۇمىسى ءونىمنىڭ كرەاتيۆتىلىگى، جاسالۋ تەحنيكاسى، ساپاسى، قاپتاماسى، كوركەم بەزەندىرىلۋى جانە ماركەتينگتىك قۇرالداردى ءتيىمدى پايدالانۋى بويىنشا باعالاندى.
سايىس قورىتىندىسى بويىنشا جەڭىمپاز كوماندالار باس جۇلدە، I, II جانە III دارەجەلى ديپلومدارمەن، سونداي-اق ىنتالاندىرۋ سىيلىقتارىمەن ماراپاتتالدى. جۇلدە قورى 1 000 000 تەڭگەنى قۇراعان جوبا كاسىپكەرلەردىڭ تاجىريبە الماسۋىنا، شىعارماشىلىق الەۋەتىن دامىتۋىنا سەپتىگىن تيگىزىپ، ۇلتتىق قولونەر مەن زاماناۋي تەحنولوگيانىڭ جاڭا مۇمكىندىكتەرىن توعىستىرعان كرەاتيۆتى الاڭعا اينالدى.